ត្រឹម ៣ថ្ងៃ ស្លាប់ ១ ០០០​នាក់​នៅ​បារាំង ព្រោះ​រលកកម្ដៅ

នៅប្រទេសបារាំង អាកាសធាតុកំពុងតែក្ដៅខ្លាំងដូចនៅ​ជិត​មាត់ចង្រ្កាន ដែលបង្កឱ្យមានគ្រោះថ្នាក់ដល់ជីវិតមនុស្សគួរឱ្យខ្លាច។ ក្នុងរយៈពេលត្រឹមតែ ៣ថ្ងៃប៉ុណ្ណោះ រលកកម្ដៅដែល​ហក់​ឡើង​ដល់ជាង ៤៤​អង្សាសេ​នេះ បានឆក់យកអាយុជីវិតមនុស្សប្រហែល ១ ០០០នាក់ឯណោះ។ នេះបើយោងតាម​ការ​ចុះផ្សាយរបស់ BBC នាថ្ងៃទី​២៩ ខែមិថុនា ឆ្នាំ​២០២៦។

ភ្នាក់ងារសុខាភិបាលជាតិបារាំង បានរាយការណ៍ថា ភាគច្រើននៃអ្នកស៊ូទ្រាំនឹងកម្ដៅមិនរួចទាំងនេះ គឺមានអាយុចាប់ពី ៦៥ឆ្នាំឡើងទៅ ស្មើនឹង ៨៥ភាគរយ ហើយពួកគេបានស្លាប់នៅតាមផ្ទះរៀងៗ​ខ្លួន ជាពិសេសនៅក្នុងទីក្រុងប៉ារីស ដែលជាកន្លែងក្ដៅខ្លាំងជាងគេ រហូតដល់ថ្នាក់រដ្ឋាភិបាលប្រកាសអាសន្ន «ពណ៌ក្រហម»។

តាមធម្មតា នៅប្រទេសបារាំង តែងតែមានមនុស្សស្លាប់ជាមធ្យមជិត ១ ០០០នាក់ក្នុងមួយថ្ងៃ ដោយសារជំងឺ ចាស់ជរា ឬគ្រោះថ្នាក់ផ្សេងៗ។ យ៉ាង​ណាមិញ នៅ​ពេលមានរលកកម្ដៅបក់បោកទៅដល់ ចំនួនអ្នកស្លាប់បានហក់ឡើងខ្លាំង គឺគ្រាន់តែ​ថ្ងៃពុធ សប្ដាហ៍​មុន មានមនុស្ស​ស្លាប់ជាង ១ ២០០នាក់ ឯថ្ងៃព្រហស្បតិ៍ និងថ្ងៃសុក្រ ស្លាប់រហូតដល់ជាង ១ ៤០០នាក់ក្នុងមួយថ្ងៃៗ។

សរុបមក ក្នុងពេល ៣ថ្ងៃនោះ មានមនុស្សស្លាប់សរុបដល់ទៅប្រហែល ៤ ០០០នាក់។ ក្នុងចំណោមនោះ មានមនុស្សប្រហែល ១ ០០០នាក់ បានស្លាប់ ដោយសារតែទ្រាំនឹងធាតុអាកាសក្ដៅខ្លាំងពេកមិនរួច។

ក្រុមមន្ត្រីសុខាភិបាល បានព្រមានថា ចំនួនអ្នកបាត់បង់ជីវិតផ្លូវការ អាចនឹងបន្តកើនឡើងលើសនេះទៀត ខណៈទិន្នន័យនៃការស្លាប់នៅតាមផ្ទះ កំពុងបន្តប្រមូលបន្ថែម។

ក្រុមអ្នកជំនាញ និងអង្គការសុខភាពពិភពលោក បានពន្យល់ថា កម្ដៅដ៏សាហាវដែលមិនធ្លាប់មាននេះ គឺបណ្តាលមកពីការប្រែប្រួលអាកាសធាតុ។ វាបានក្លាយជា «ឃាតកលាក់មុខ» ព្រោះផ្ទះសម្បែងរបស់ប្រជាជនបារាំង និងអឺរ៉ុប មិនត្រូវបានសាងសង់ឡើង ដើម្បីទប់ទល់នឹងអាកាសធាតុដ៏ក្តៅ​បែបនេះឡើយ៕

ប្រែសម្រួល៖ ឈាង