វីរុសបំប្លែងខ្លួន Delta កំពុងវាយលុក! ថៃ ព្រមានអំពីស្ថានភាពអាក្រក់បំផុត មួយថ្ងៃអាចឆ្លង ១ម៉ឺនករណី

ស្របពេលវីរុសបំប្លែងខ្លួនឆ្លងខ្លាំង Delta កំពុងវាយលុកប្រទេសថៃ, មជ្ឈមណ្ឌលរដ្ឋបាលស្ថានភាពជំងឺកូវីដ-១៩​ (CCSA) បានព្រមានថា ចំនួនមធ្យមនៃករណីឆ្លងកូវីដប្រចាំថ្ងៃ នឹងកើនឡើងទ្វេដងក្នុងរយៈពេលប៉ុន្មានសប្តាហ៍ខាងមុខនេះ ខណៈបច្ចុប្បន្ន មន្ត្រីសុខាភិបាលកំពុងត្រៀមខ្លួនសម្រាប់ករណីថ្មីប្រចាំថ្ងៃ ដែលអាចឈានដល់១០,០០០ករណី។

ដោយសារតែវីរុសបំប្លែងខ្លួននេះ ថៃមិនមែនជួបប្រទះត្រឹមតែចំនួននៃការឆ្លងថ្មីកើនឡើងនោះទេ ប៉ុន្តែចំនួនអ្នកជំងឺដែលស្ថិតក្នុងស្ថានភាពធ្ងន់ធ្ងរនិងដាក់ខ្យល់អុកស៊ីសែន ក៏កើនឡើងផងដែរ។

ប្រធាននាយកដ្ឋានព័ត៌មាននៃក្រសួងការបរទេសលោកស្រី Pensom Lertsithichai បានឲ្យដឹងថា CCSA រំពឹងថា ករណីធ្ងន់ធ្ងរនឹងបន្តកើនឡើង។ អ្វីដែលយើងកំពុងជួបប្រទះនៅក្នុងប្រទេសថៃ គឺការរីករាលដាលយ៉ាងឆាប់រហ័សនៃវីរុសបំប្លែងខ្លួន Delta។

ដោយសំដៅទៅការសិក្សានាពេលថ្មីៗនេះ ស្តីពីការរីករាលដាលនៃវីរុសបំប្លែងខ្លួន Delta នៅក្នុងប្រទេសដទៃទៀត លោកស្រីនិយាយថា ផ្អែកលើទិន្នន័យដែលបានរកឃើញ ចំនួនករណី កូវីដអាចកើនឡើងទ្វេដងរៀងរាល់ ២ សប្តាហ៍។

ប្រទេសថៃ អាចនឹងមានករណីថ្មីៗប្រចាំថ្ងៃ កើនដល់ ១០,០០០ករណី ក្នុងពេលឆាប់ៗនេះ។

គួរបញ្ជាក់ថា ក្រសួងសុខាភិបាលថៃ បានប្រកាសនៅព្រឹកថ្ងៃពុធនេះថា ក្នុងរយៈពេល២៤ម៉ោងចុងក្រោយ មានអ្នកស្លាប់ដោយសារជំងឺកូវីដ-១៩ ចំនួន ៥៤នាក់និងឆ្លងថ្មី ៦,៥១៩ករណី៕

ប្រែសម្រួល៖ Vann Vann

ប្រភព៖ Thaiger