អ៊ុយក្រែន សុំប្រទេសលោកខាងលិច កុំបង្កឲ្យមានភាពភ័យស្លន់ស្លោ ជុំវិញបញ្ហារុស្ស៊ី

ប្រធានាធិបតីអ៊ុយក្រែនលោក Volodymyr Zelensky បានអំពាវនាវដល់ប្រទេសលោកខាងលិច កុំបង្កឲ្យមានភាពភ័យស្លន់ស្លោ ចំពេលរុស្ស៊ីដាក់ទ័ពនៅជាប់ព្រំដែនប្រទេសរបស់លោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់អ្នកយកព័ត៌មានថា ការព្រមានថារុស្ស៊ីជិតវាយចូលហើយនោះ កំពុងធ្វើឲ្យសេដ្ឋកិច្ចរបស់ប្រទេសអ៊ុយក្រែនស្ថិតក្នុងហានិភ័យ។

កាល​ពី​ថ្ងៃ​ព្រហស្បតិ៍ទី២៧ខែមករា ប្រធានាធិបតី​អាមេរិក លោក Joe Biden បានបង្ហាញការ​ជឿជាក់​ថា រុស្ស៊ី​អាច​វាយ​ប្រហារ​ប្រទេស​ជិត​ខាង​នៅ​ខែ​ក្រោយនេះ។

យ៉ាង​ណាក្តី រុស្ស៊ី​បាន​បដិសេធ​ថា ខ្លួនគ្មាន​គម្រោង​វាយចូលទេ ហើយ​កាល​ពី​ថ្ងៃ​សុក្រ រដ្ឋមន្ត្រី​ការ​បរទេស​របស់​ខ្លួន​បាន​និយាយ​ថា ទីក្រុងមូស្គូ​មិន​ចង់​មាន​សង្គ្រាម​ឡើយ។

ខណៈពេលដែលរុស្ស៊ីដាក់កងទ័ពប្រហែល១០០,០០០នាក់នៅតាមព្រំដែនអ៊ុយក្រែន លោក Zelensky បាននិយាយថា ពេលនេះ លោកមិនបានឃើញការគំរាមកំហែងខ្លាំងជាងពេលដែលរុស្ស៊ីប្រមូលផ្តុំកងទ័ពស្រដៀងគ្នានេះ កាលពីនិទាឃរដូវឆ្នាំមុននោះទេ។

លោកបានប្រាប់សន្និសីទសារព័ត៌មាននៅទីក្រុង គៀវ ថា មានសញ្ញាពីមេដឹកនាំរដ្ឋដែលគួរឲ្យគោរពជាច្រើន ពួកគេគ្រាន់តែនិយាយថា ថ្ងៃស្អែកនឹងមានសង្រ្គាម។ នេះជាការបង្កភាពភ័យស្លន់ស្លោ តើវាជះឥទ្ធិពលអ្វីខ្លះដល់រដ្ឋរបស់យើង? ស្ថានភាពវឹកវរនៅក្នុងប្រទេស គឺជាការគំរាមកំហែងដ៏ធំបំផុតសម្រាប់អ៊ុយក្រែន។

ទោះបីជាយ៉ាងណាក៏ដោយ លោក Zelensky បានរំលឹកថា ប្រជាជននៃប្រទេសរបស់លោក បានរស់នៅជាមួយនឹងការគំរាមកំហែងពីរុស្ស៊ី អស់រយៈពេលជាច្រើនឆ្នាំមកហើយ ហើយបើទោះបីជាមានការដាក់ពង្រាយកងទ័ព ក្នុងទំហំដូចបច្ចុប្បន្នក៏ដោយ ក៏លោកហាក់ដូចជាយល់ថា មិនជាមានគ្រោះថ្នាក់ណាស់ណាទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ ៥ចំណុចពិសេស មិនគួររំលងពាក់ព័ន្ធវិបត្តិ រុស្ស៊ី-អ៊ុយក្រែន ដែលកំពុងឡើងកម្តៅ