រុស្ស៊ី​បន្ថែម​កងទ័ព ៧ពាន់​នាក់​ទៀតទៅ​ជិត​ព្រំដែន​អ៊ុយក្រែន ផ្ទុយពីការអះអាងរបស់ ពូទីន

សហរដ្ឋអាមេរិកបានព្រមានថា ប្រទេសរុស្ស៊ីបានបន្ថែមទាហានដល់ទៅ៧,០០០នាក់ នៅជិតព្រំដែនអ៊ុយក្រែន បើទោះបីជាមានការប្រកាសរបស់វិមានក្រឹមឡាំងថា កងកម្លាំងកំពុងត្រូវបានដកចេញពីតំបន់ក៏ដោយ។

ថ្វីបើភាពភ័យខ្លាចអំពីការវាយប្រហាររបស់រុស្ស៊ី លើអ៊ុយក្រែន ហាក់ដូចជាថមថយក៏ដោយ ប៉ុន្តែសហរដ្ឋអាមេរិក និងសម្ព័ន្ធមិត្តបានអះអាងថា ការគំរាមកំហែងនេះនៅតែមានកម្រិតខ្ពស់ដដែល។

យោងតាមការប៉ាន់ប្រមាណរបស់បស្ចិមប្រទេសបានឲ្យដឹងថា ប្រទេសរុស្ស៊ីបានដាក់ពង្រាយកងទ័ពជាង១៥០,០០០នាក់ នៅភាគខាងកើត ខាងជើង និងខាងត្បូងប្រទេសអ៊ុយក្រែន។

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានផ្តល់សញ្ញាថា លោកចង់បានផ្លូវសន្តិភាពមួយចេញពីវិបត្តិ ហើយប្រធានាធិបតីសហរដ្ឋអាមេរិក លោក ចូ បៃដិន បានសន្យាថា សហរដ្ឋអាមេរិកនឹងបន្តផ្តល់វិធីការទូត “គ្រប់ឱកាស” ប៉ុន្តែលោកបានបង្ហាញការសង្ស័យអំពីចេតនារបស់ទីក្រុងមូស្គូ។

លោក បៃដិន ក៏បានទទូចផងដែរថា ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួននឹងមិនលះបង់គោលការណ៍ជាមូលដ្ឋាន នៃការគោរពអធិបតេយ្យភាពអ៊ុយក្រែនឡើយ៕

ប្រែសម្រួល៖ Vann Vann

ប្រភព៖ AP

ចុចអាន៖ ថៃ រឹតបន្តឹងសន្តិសុខ នៅ ស្ថានទូត អ៊ុយក្រែន និង រុស្ស៊ី ក្នុង ទីក្រុង បាងកក