មន្ត្រី​ជាន់​ខ្ពស់រុស្ស៊ី ព្រមាន​ប្រើ​នុយក្លេអ៊ែរ​ទៀតហើយ ពេល​​ស្ថានភាពសង្គ្រា​ម​អាក្រក់​​ខ្លាំង​

អនុរដ្ឋមន្ត្រីការបរទេសរុស្ស៊ី លោក Sergei Ryabkov នៅថ្ងៃព្រហស្បតិ៍ ទី៤ ខែមិថុនានេះ បានចេញការព្រមានថា នៅក្រោមសេណារីយ៉ូដ៏អាក្រក់បំផុត រាល់ការវាយប្រហារណាមួយមកលើបូរណភាពទឹកដីរបស់ប្រទេសរុស្ស៊ី អាចនឹងនាំឲ្យមានការប្រើប្រាស់អាវុធនុយក្លេអ៊ែរភ្លាមៗ។ នេះបើយោងតាមការចេញផ្សាយពីសារព័ត៌មាន tovima។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការថ្លែងទៅកាន់ក្រុមអ្នកយកព័ត៌មាននៅខាងក្រៅវេទិកាសេដ្ឋកិច្ចអន្តរជាតិ St. Petersburg (SPIEF) លោក Ryabkov បានសង្កត់ធ្ងន់ថា រាល់ការវាយលុកលើបូរណភាពទឹកដីរបស់រុស្ស៊ី ពីសំណាក់អ្នកឈ្លានពាន អាចនឹងហុចលទ្ធផលឲ្យមានការប្រើប្រាស់អាវុធនុយក្លេអ៊ែរ នៅក្នុងសេណារីយ៉ូដែលមិនអំណោយផលបំផុត។

លោក បានអះអាងទៀតថា «សម្រាប់យើង ស្ថានភាពធ្ងន់ធ្ងរជាសម្មតិកម្ម (ការសន្មតទុកជាមុន) ដែលការប្រើប្រាស់អាវុធទាំងនេះអាចទៅរួច គឺត្រូវបានពិពណ៌នាយ៉ាងច្បាស់លាស់នៅក្នុងគោលលទ្ធិយោធារបស់សហព័ន្ធរុស្ស៊ី និងនៅក្នុងគោលការណ៍គ្រឹះនៃគោលនយោបាយរដ្ឋក្នុងវិស័យទប់ស្កាត់នុយក្លេអ៊ែរ»។

មន្ត្រីជាន់ខ្ពស់រុស្ស៊ីរូបនេះបានបន្ថែមថា «បើនិយាយឲ្យងាយយល់ ខ្លឹមសារនៃឯកសារទាំងនោះគឺថា រាល់ការវាយប្រហារប្រឆាំងនឹងរុស្ស៊ី និងបូរណភាពទឹកដីរបស់ខ្លួនដោយក្រុមអ្នកឈ្លានពាន រួមទាំងអ្នកដែលមិនមានអាវុធនុយក្លេអ៊ែរដោយខ្លួនឯងផងនោះ ក៏អាចដឹកនាំឲ្យមានការឆ្លើយតបពីភាគីយើង ដោយពាក់ព័ន្ធនឹងការប្រើប្រាស់មធ្យោបាយ (អាវុធនុយក្លេអ៊ែរ) ទាំងនេះ ក្រោមសេណារីយ៉ូដ៏អាក្រក់បំផុតដែលអាចកើតមាន»។

ទន្ទឹមនឹងការព្រមាននេះ លោកអនុរដ្ឋមន្ត្រីការបរទេសរុស្ស៊ីបានលើកឡើងផងដែរថា ក្រុងម៉ូស្គូកំពុងស្វែងរកការធ្វើឲ្យទំនាក់ទំនងរបស់ខ្លួនជាមួយអាមេរិកឲ្យមានស្ថិរភាព និងភាពល្អប្រសើរឡើងវិញ នៅមុនពេលការបោះឆ្នោតប្រធានាធិបតីអាមេរិកបន្ទាប់ចូលមកដល់។ ជាក់ស្ដែង ភារកិច្ចរបស់យើងនៅពេលនេះ គឺប្រើប្រាស់ពេលវេលាដែលនៅសេសសល់រហូតដល់ការបោះឆ្នោតប្រធានាធិបតីបន្ទាប់ ដើម្បីឲ្យទំនាក់ទំនងរបស់យើងជាមួយអាមេរិកអាចបោះជំហានទៅមុខ មានស្ថិរភាព និងត្រឡប់ទៅរកភាពប្រក្រតីវិញ។

គួរបញ្ជាក់ផងដែរថា ទីប្រឹក្សាគោលនយោបាយការបរទេសរបស់លោក ពូទីន គឺលោក Yuri Ushakov បានប្រកាសថា គណៈប្រតិភូសហរដ្ឋអាមេរិកនឹងចូលរួមនៅក្នុងវេទិកាសេដ្ឋកិច្ចអន្តរជាតិ St. Petersburg (SPIEF) នេះជាលើកដំបូង ក្នុងរយៈពេលជាច្រើនឆ្នាំមកនេះ៕

អត្ថបទ ៖ សាង ស្រីល័ក្ខ