អង់គ្លេសអះអាងថា រុស្ស៊ី កំពុងបញ្ជូនទាហានស៊ីឈ្នួលចូលទៅក្នុងតំបន់ Donbas

កងទ័ព និងទាហានស៊ីឈ្នួលរុស្ស៊ី កំពុងត្រូវបានបញ្ជូនចូលទៅក្នុងតំបន់ Donbas ភាគខាងកើតប្រទេសអ៊ុយក្រែន។ នេះបើតាមការអះអាងពីក្រសួងការពារជាតិ អង់គ្លេស។

ទាហានស៊ីឈ្នួលទាំងនេះ គឺមកពីក្រុមហ៊ុន Wagner Group ដែលមានទំនាក់ទំនងជាមួយ រដ្ឋរុស្ស៊ី។

ក្រសួងការពារជាតិអង់គ្លេស បាននិយាយនៅក្នុងព័ត៌មាន Update ចុងក្រោយរបស់ខ្លួនថា “កងទ័ពរុស្ស៊ីកំពុងបន្តប្រមូលផ្តុំ និងរៀបចំឡើងវិញ នៅពេលពួកគេផ្តោតការវាយលុកជាថ្មី នៅក្នុងតំបន់ Donbas ភាគខាងកើតប្រទេសអ៊ុយក្រែន”។

Wagner Group គឺជាក្រុមហ៊ុនយោធាឯកជនមួយ ដែលគេសង្ស័យមានទំនាក់ទំនងជាមួយវិមានក្រឹមឡាំង ហើយពីមុន បានរងការចោទប្រកាន់ពីបទឧក្រិដ្ឋកម្មសង្គ្រាម។

ក្រសួងការពារជាតិអង់គ្លេស បាននិយាយកាលពីមុនថា Wagner Group ត្រូវបានគេរំពឹងថានឹងដាក់ពង្រាយទាហានស៊ីឈ្នួលជាង ១ពាន់នាក់ រួមទាំងមេដឹកនាំជាន់ខ្ពស់នៃអង្គភាពនេះផងដែរ ដើម្បីចូលរួមក្នុងប្រតិបត្តិការប្រយុទ្ធ៕

ប្រែសម្រួល៖ Vann Vann

ប្រភព៖ SKY

ចុចអាន៖ ក្រុងមូស្គូ ចោទថា អាមេរិក និងណាតូ បញ្ជាឲ្យប្រឌិតរឿងនៅ Bucha ដើម្បីដាក់កំហុស រុស្ស៊ី