ធ្លាយឧស្ម័នពុលនៅកំពង់ផែ ហ្ស៊កដានី សម្លាប់មនុស្ស១១នាក់ របួសជាង ២៥០នាក់

ការលេចធ្លាយឧស្ម័នក្លរីនពុល នៅឯកំពង់ផែសមុទ្រក្រហម Aqaba របស់ប្រទេស ហ្ស៊កដានី បានសម្លាប់មនុស្សចំនួន ១១ នាក់ និងជាង ២៥០ នាក់ផ្សេងទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរ​​និយាយ​ថា កុងតឺន័រ​ផ្ទុក​សារធាតុ​គីមី​មួយ ​បាន​ធ្លាក់​ ពេល​កំពុង​ដឹក​ជញ្ជូន​ដោយ​សារតែមានបញ្ហាបច្ចេកទេសជាមួយ ​រថយន្ត​ស្ទូច​។

វីដេអូកាមេរ៉ាសុវត្ថិភាព បានបង្ហាញ​កុងតឺន័រ កំពុង​ត្រូវ​បានស្ទូច​ឡើង ប៉ុន្តែ​ភ្លាមៗ​នោះ ​បាន​ធ្លាក់​ទៅ​លើ​កប៉ាល់​មួយគ្រឿង ហើយ​​ផ្ទុះតែម្តង។

ឧស្ម័នពណ៌លឿងយ៉ាងក្រាស់ ត្រូវបានគេឃើញរីកសាយភាយ ពាសពេញដី ដោយបង្ខំឲ្យមនុស្សរត់ទៅរកសុវត្ថិភាព។

យោងតាមប្រព័ន្ធផ្សព្វផ្សាយរដ្ឋ, អ្នករងរបួសចំនួន ១៩៩ នាក់ កំពុងទទួលការព្យាបាលនៅមន្ទីរពេទ្យក្នុងស្រុក ដោយសារប៉ះពាល់ជាមួយសារធាតុគីមី។ អ្នកខ្លះត្រូវបានគេរាយការណ៍ថា ស្ថិតក្នុងស្ថានភាពធ្ងន់ធ្ងរ។

ក្លរីន គឺជាសារធាតុគីមីដែលប្រើក្នុងវិស័យឧស្សាហកម្ម និងក្នុងផលិតផលសម្អាតក្នុងផ្ទះ។ វាជាឧស្ម័នពណ៌លឿងលាយបៃតង នៅសីតុណ្ហភាព និងសម្ពាធធម្មតា.

នៅពេលដែលឧស្ម័នក្លរីនត្រូវបានស្រូបចូល លេប ឬប៉ះនឹងស្បែក វាមានប្រតិកម្មជាមួយនឹងទឹកដើម្បីបង្កើតអាស៊ីតដែលបំផ្លាញកោសិកាក្នុងរាងកាយ។ ការ​ស្រូប​យក​សារធាតុ​ក្លរីន​ក្នុង​កម្រិត​ខ្ពស់​ ធ្វើឲ្យ​មាន​ជាតិ​ទឹក​ឡើងខ្លាំង​ក្នុង​សួត ដែល​ជា​ស្ថានភាព​គំរាមកំហែងដល់​អាយុ​ជីវិត ឬ​គេ​ស្គាល់​ថា​ជា​ជំងឺ​ ស្ទះ​សួត៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រជាជនអាមេរិក ត្រឹម ១១% ប៉ុណ្ណោះ ដែលស្តីបន្ទោសលោក ពូទីន ចំពោះ ការឡើងថ្លៃឧស្ម័ន