លោក Putin ថា អ៊ុយក្រែន គ្មានបំណងបំពេញតាមលក្ខខណ្ឌ នៃកិច្ចព្រមព្រៀងសន្តិភាពបឋមទេ 

ប្រធានាធិបតីរុស្ស៊ី លោក Vladimir Putin នៅថ្ងៃពុធ ទី២០ ខែកក្កដានេះ បាននិយាយថា ទីក្រុងមូស្គូ មិនបានឃើញបំណងប្រាថ្នាណាមួយពីភាគីអ៊ុយក្រែន ក្នុងការបំពេញលក្ខខណ្ឌនៃអ្វីដែលលោកពណ៌នាថាជា កិច្ចព្រមព្រៀងសន្តិភាពបឋម ដែលបានព្រមព្រៀងគ្នាក្នុងខែមីនានោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មាន បន្ទាប់ពីដំណើរទស្សនកិច្ចទៅប្រទេសអ៊ីរ៉ង់ លោក Putin បាននិយាយថា អារ៉ាប៊ីសាអូឌីត និងអារ៉ាប់រួម កំពុងផ្តល់ការសម្របសម្រួលរវាងរុស្ស៊ី និងអ៊ុយក្រែន។

ទោះបីជាយ៉ាងណាក៏ដោយ មិនមានការឆ្លើយតបភ្លាមៗពីរដ្ឋាភិបាលអ៊ុយក្រែន ចំពោះការលើកឡើងរបស់លោក Putin ទេនៅព្រឹកព្រលឹមថ្ងៃពុធ។

នៅពេលត្រូវបានសួរអំពីកិច្ចប្រជុំដែលអាចកើតមានជាមួយប្រធានាធិបតីអ៊ុយក្រែន Volodymyr Zelensky, លោក Putin និយាយថា រដ្ឋាភិបាលទីក្រុង កៀវ មិនបានបំពេញតាមលក្ខខណ្ឌនៃកិច្ចព្រមព្រៀងសន្តិភាពបឋម ដែលសម្រេចបានជាក់ស្តែង នៅក្នុងខែមីនានោះទេ។

លទ្ធផលចុងក្រោយ គឺអាស្រ័យលើឆន្ទៈរបស់ភាគីកិច្ចសន្យា ក្នុងការអនុវត្តកិច្ចព្រមព្រៀងដែលបានឈានដល់។ សព្វ​ថ្ងៃ​នេះ ​យើង​មើល​ឃើញ​ថា មហា​អំណាច​នៅទី​ក្រុងកៀវ ​មិន​មាន​បំណងប្រាថ្នា​បែប​នេះ​ឡើយ។

ការ​ចរចា​បាន​កើត​ឡើង​ក្នុង​ខែ​មីនា ដោយ​ភាគី​ទាំង​ពីរ​បាន​ធ្វើ​សំណើ​ ប៉ុន្តែ​គ្មាន​ការ​ទម្លាយភាពទាល់ច្រកទេ។ នៅពេលនោះ លោក Zelensky និយាយថា មានតែលទ្ធផលជាក់ស្តែងពីកិច្ចពិភាក្សាប៉ុណ្ណោះ ដែលអាចជឿទុកចិត្តបាន។

ប្រធានាធិបតីរុស្ស៊ី លោក Putin បានជួបជាមួយមេដឹកនាំកំពូលអ៊ីរ៉ង់ Ayatollah Ali Khamenei នៅទីក្រុង តេហេរ៉ង់ កាលពីថ្ងៃអង្គារ ដោយសង្កត់ធ្ងន់លើទំនាក់ទំនងកាន់តែជិតស្និទ្ធរវាងប្រទេសទាំងពីរ ខណៈស្ថិតនៅក្រោមការដាក់ទណ្ឌកម្មរបស់លោកខាងលិច។

ក្នុងអំឡុងដំណើរទស្សនកិច្ចនៅអ៊ីរ៉ង់ លោក Putin ក៏បានជួបជាមួយប្រធានាធិបតីតួកគី Tayyip Erdogan ផងដែរ ដើម្បីពិភាក្សាអំពីកិច្ចព្រមព្រៀងដែលនឹងចាប់ផ្តើមការនាំចេញគ្រាប់ធញ្ញជាតិពីសមុទ្រខ្មៅរបស់អ៊ុយក្រែនឡើងវិញ៕

ប្រែសម្រួល៖ Vann Vann

ប្រភព៖ Reuters

ចុចអាន៖ លោក Khamenei ប្រាប់ Putin ថា ទោះរុស្ស៊ី មិនធ្វើប្រតិបត្តិការនៅអ៊ុយក្រែន ក៏ ណាតូ បង្កសង្គ្រាមដែរ