វៀតណាម កុម្ម៉ង់ទិញវ៉ាក់សាំងកូវីដ ៣០លានដូសពី អង់គ្លេស

ប្រទេសវៀតណាមបានកុម្ម៉ង់ទិញវ៉ាក់សាំងកូវីដចំនួន៣០លានដូសដែលផលិតដោយក្រុមហ៊ុនអង់គ្លេស AstraZeneca ហើយក៏កំពុងស្វែងរកការទិញពីប្រភពដទៃទៀតផងដែរ។

អនុរដ្ឋមន្រ្តីក្រសួងសុខាភិបាលវៀតណាមលោក Truong Quoc Cuong បាននិយាយកាលពីថ្ងៃចន្ទថា “យើងបានចុះហត្ថលេខាលើកិច្ចព្រមព្រៀងធានាវ៉ាក់សាំងសម្រាប់មនុស្ស១៥លាននាក់ពោលគឺស្មើនឹង៣០លានដូស”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Cuong បានឲ្យដឹងថា អាជ្ញាធរមូលដ្ឋានក៏កំពុងចរចាជាមួយអ្នកផ្គត់ផ្គង់វ៉ាក់សាំងផ្សេងទៀតរួមទាំងប្រទេសចិន រុស្ស៊ីនិងសហរដ្ឋអាមេរិកផងដែរ។

មន្រ្តីសុខាភិបាលបាននិយាយថា ប្រទេសវៀតណាមក៏រំពឹងផងដែរថានឹងទិញវ៉ាក់សាំងកូវីដពី COVAX ដែលជាគំនិតផ្តួចផ្តើមអន្តរជាតិដឹកនាំដោយអង្គការសុខភាពពិភពលោកនិងដៃគូដើម្បីធានាបាននូវការទទួលបានវ៉ាក់សាំងជាសកលប្រកបដោយសមធម៌។

នៅពាក់កណ្តាលខែធ្នូឆ្នាំមុន ប្រទេសវៀតណាមបានចាប់ផ្តើមការសាកល្បងវ៉ាក់សាំងកូវីដផលិតក្នុងស្រុកលើកដំបូងរបស់ខ្លួនលើអ្នកស្ម័គ្រចិត្តជាមួយក្តីរំពឹងថា នឹងប្រើវាក្នុងចំណោមសាធារណជននៅត្រឹមខែឧសភាឆ្នាំ២០២១។

គិតមកត្រឹមព្រឹកថ្ងៃអង្គារនេះ វៀតណាមបានរាយការណ៍ថាមានការឆ្លងជំងឺកូវីដ១៩ចំនួន១,៤៩៧ករណី ស្លាប់៣៥នាក់និងជាសះស្បើយ១,៣៣៩នាក់៕

ប្រែសម្រួលដោយ៖ Vann Vann

ប្រភព៖ Xinhua