វៀតណាម​ រឹបអូសភ្លុកដំរីខុសច្បាប់តាមផ្លូវសមុទ្រ ជិតកន្លះតោន

បើតាមប្រព័ន្ធផ្សព្វផ្សាយវៀតណាម VNA បានចុះផ្សាយថា អាជ្ញាធរគយ និងឆ្មាំឆ្នេរសមុទ្រនៃទីក្រុង Hai Phong ភាគខាងជើងនៃប្រទេសវៀតណាមបានរឹបអូសភ្លុកដំរីជិតកន្លះតោន បន្ទាប់ពីត្រូវបានរត់ពន្ធតាមសមុទ្រ ។

កាលពីថ្ងៃសុក្រអាជ្ញាធរបានរកឃើញកុងតឺន័រមួយផ្ទុកភ្លុកដំរីសរុបចំនួន ១១៧ ដុំ ទម្ងន់ ៤៩០ គីឡូក្រាម លាយជាមួយនឹងស្នែងគោនាំចូលពីកំពង់ផែអន្តរជាតិ Lach Huyen ។

ទីភ្នាក់ងារព័ត៌មានបានរាយការណ៍ទៀតថា បន្ទាប់ពីទទួលបានព័ត៌មានអំពីការមកដល់នៃក្រុមខុសច្បាប់ទាំងនេះ ចាប់តាំងពីដើមខែមករាមក អាជ្ញាធរក៏បានសហការគ្នាដើម្បីធ្វើការត្រួតពិនិត្យករណីពាក់ព័ន្ធ ហើយធ្វើការបង្រ្កាបតែម្ដង ខណៈពេលនេះក៏កំពុងស៊ើបអង្កេតករណីនេះបន្ថែមទៀតផងដែរ ។

គួរបញ្ជាក់ថា វៀតណាមបានហាមប្រាមការជួញដូរភ្លុកដំរីតាំងពីឆ្នាំ ១៩៩២ មកម្ល៉េះ ហើយយោងតាមច្បាប់របស់វៀតណាម បុគ្គលណាដែលរក្សាទុក ដឹកជញ្ជូន ជួញដូរ ឬផ្សាយពាណិជ្ជកម្មពីភ្លុកដំរីទម្ងន់ ២ គីឡូក្រាមឡើងទៅត្រូវផ្តន្ទាទោសដាក់ពន្ធនាគារ ១៥ ឆ្នាំ និងពិន័យជាប្រាក់រហូតដល់ ៦៣៣,៨២០ ដុល្លារ ៕

ប្រែសម្រួលដោយ ៖​ នាង រតនៈ

ប្រភព ៖​ Xinhua

ចុចអាន ៖ ចិន ជោគជ័យបង្កាត់ពូជគោផលិតទឹកដោះបាន ១០០ តោនក្នុងមួយជីវិតរបស់វា