យោធាមីយ៉ាន់ម៉ានឹងអនុញ្ញាតឲ្យជនស៊ីវិលមានអាយុលើសពី ១៨ ឆ្នាំដែលគេចាត់ទុកថា “ស្មោះត្រង់នឹងរដ្ឋ” មានសិទ្ធិកាន់កាប់អាវុធ និងគ្រាប់កាំភ្លើងប្រភេទផ្សេងៗគ្នាបាន ខណៈមន្ត្រីរាជការសាធារណៈ និងបុគ្គលិកយោធាចូលនិវត្តន៍ ក៏ស្ថិតក្នុងចំណោមអ្នកដែលត្រូវអនុញ្ញាតឲ្យមានសិទ្ធិកាន់កាប់អាវុធបានដូចគ្នាផងដែរ ។

ឯកសារលេចធ្លាយចំនួន ១៥ ទំព័រស្តីពីសិទ្ធិកាន់កាប់កាំភ្លើងនេះ ត្រូវបានគេសន្មតថា ជាកម្មសិទ្ធរបស់ក្រសួងមហាផ្ទៃរបស់រដ្ឋបាលយោធាមីយ៉ាន់ម៉ា ហើយត្រៀមនឹងដាក់ចេញនូវលក្ខខណ្ឌទាំងនេះដល់ជនស៊ីវិលអាយុលើសពី ១៨ ឆ្នាំដែលស្មោះត្រង់នឹងរដ្ឋ ។

ឯកសារនោះបានឲ្យដឹងទៀតថា អ្នកទទួលបានការអនុញ្ញាតឲ្យកាន់កាប់កាំភ្លើងត្រូវតែ “ស្មោះត្រង់ចំពោះជាតិ មានសីលធម៌ល្អ” និងមិនពាក់ព័ន្ធដល់ការរំខានដល់សន្តិសុខរដ្ឋ” ។

ស្របពេលជាមួយគ្នានេះ អ្នកកាន់លិខិតអនុញ្ញាតក៏ត្រូវតែអនុវត្តតាម នៅពេលដែលអាជ្ញាធរមូលដ្ឋានបញ្ជាឲ្យចូលរួមក្នុងការរក្សាសុខសន្តិសុខ ការអនុវត្តច្បាប់ និងស្ថេរភាព ក៏ដូចជាវិធានការបង្ការឧក្រិដ្ឋកម្មជាដើម ។

គួរបញ្ជាក់ថា រដ្ឋប្រហារកាលពីខែកុម្ភៈ ឆ្នាំ ២០២១ បានទម្លាក់មីយ៉ាន់ម៉ាឲ្យចូលទៅក្នុងវិបត្តិយ៉ាងធ្ងន់ធ្ងរ ដែលអ្នកជំនាញអង្គការសហប្រជាជាតិ (UN) មួយចំនួនបានកំណត់ថា ជាសង្រ្គាមស៊ីវិល ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ វៀតណាម ចាយលុយជាង ១ ពាន់លានដុល្លារ ទិញគ្រាប់ស្វាយចន្ទីឆៅពី កម្ពុជា