លោក ពូទីន ថា ព្រោះតែបដិវត្តន៍ពណ៌របស់ អាមេរិក ទើបផ្ទុះសង្គ្រាមនៅ អ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីពេលថ្មីៗនេះថា ការប្រើប្រាស់បដិវត្តន៍ពណ៌របស់អាមេរិក និងការគាំទ្របដិវត្តន៍ Maidan ឆ្នាំ ២០១៤ ដែលជាការតវ៉ាដ៏ធំនាំទៅដល់ការទម្លាក់លោកប្រធានាធិបតី Viktor Yanukovych គឹជាដើមចមធ្វើឲ្យផ្ទុះសង្រ្គាមនៅអ៊ុយក្រែន ។

លោក ពូទីន បានប្រាប់ឯកអគ្គរដ្ឋទូតអាមេរិកប្រចាំនៅរុស្ស៊ីលោកស្រី Lynne Tracy ថា “អាមេរិកបានប្រើគោលនយោបាយបដិវត្តន៍ពណ៌ និងការគាំទ្រដល់​រដ្ឋប្រហារ​នៅ​ទីក្រុងកៀវកាលពី​ឆ្នាំ ២០១៤ ហើយនៅទីបំផុត​បាន​នាំ​ទៅរក​វិបត្តិ​អ៊ុយក្រែននាពេល​បច្ចុប្បន្ននេះ” ។

ប្រធានាធិបតីរូបនេះបញ្ជាក់ទៀតថា គោលនយោបាយរបស់សហរដ្ឋអាមេរិកក៏បានរួមចំណែកអវិជ្ជមានផងដែរ ដល់ការចុះខ្សោយនៃទំនាក់ទំនង រុស្ស៊ី-អាមេរិក ហើយបច្ចុប្បន្ននេះមាន “វិបត្តិយ៉ាងជ្រាលជ្រៅ” នៅក្នុងទំនាក់ទំនងរវាងទីក្រុងមូស្គូ និងវ៉ាស៊ីនតោន ដែលពិភពលោកកំពុងពឹងផ្អែកដោយផ្ទាល់ទាំងលើសន្តិសុខ និងស្ថិរភាពមួយនេះ ។

យោងតាមលោក ពូទីន វិបត្តិក្នុងទំនាក់ទំនងរុស្ស៊ី-អាមេរិកគឺផ្អែកលើ “វិធីសាស្រ្តផ្សេងគ្នាចំពោះការបង្កើតសណ្តាប់ធ្នាប់ពិភពលោកទំនើប” ហើយទីក្រុងមូស្គូតែងតែតស៊ូមតិក្នុងការកសាងទំនាក់ទំនងជាមួយអាមេរិកលើគោលការណ៍សមភាព និងការគោរព ។

គួរបញ្ជាក់ថា រហូតមកដល់ពេលនេះប្រតិបត្តិការសឹករបស់រុស្ស៊ីលើអ៊ុយក្រែនបានអូសបន្លាយពេលជាង ១ ឆ្នាំមកហើយ បន្ទាប់ពីកងកម្លាំងទីក្រុងមូស្គូបើកការលុកលុយលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោកស្រី Tsai និយាយផ្គើន ចិន ក្រោយជួបជាមួយប្រធានសភា អាមេរិក