មហាសេដ្ឋី វៀតណាម មួយរូប ក្លាយជាអ្នកមានលំដាប់ទី៤ នៅអាស៊ី ដោយសារតែក្រុមហ៊ុនរថយន្តអគ្គិសនី VinFast Auto

មហាសេដ្ឋីវៀតណាមលោក Pham Nhat Vuong បានក្លាយជាអ្នកមានបំផុតមួយរូបប្រចាំនៅអាស៊ី ​ដោយសារតែ​ក្រុមហ៊ុនរថយន្ត​អគ្គិសនី​ VinFast Auto របស់លោកទទួលបានជោគជ័យជាលើកដំបូងនៅផ្សារហ៊ុន Nasdaq របស់អាមេរិក ។

ដោយមានទ្រព្យសម្បត្តិក្នុងដៃចំនួន ៤៤.៥ ពាន់លានដុល្លារ​ លោកមហាសេដ្ឋី Pham Nhat Vuong បានក្លាយជាអ្នកមានបំផុត​ទី ៤ នៅអាស៊ី បន្ទាប់ពីមហាសេដ្ឋីឥណ្ឌា Mukesh Ambani មានទ្រព្យសម្បត្តិសុទ្ធ ៩៧.៣ ពាន់លានដុល្លារ, មហាសេដ្ឋីចិន Zhong Shanshan ទ្រព្យសម្បត្តិសុទ្ធ ៦២.៤ ពាន់លានដុល្លារ និងលោកមហាសេដ្ឋីឥណ្ឌា Gautam Adani ដែលមានទ្រព្យសម្បត្តិសុទ្ធ ៦២.៣ ពាន់លានដុល្លារ ។

​បើ​យោងតាម​ទស្សនាវដ្ដី CEOWORLD បានឲ្យដឹងថា បន្ទាប់ពីផ្សារហ៊ុនអាមេរិក Nasdaq កើនឡើង ហ៊ុនរបស់​​ក្រុមហ៊ុនរថយន្ត​អគ្គិសនី​ VinFast Auto ក៏បានកើនតម្លៃ ២៥៥ ភាគរយក្នុងទំហំទឹកប្រាក់ជាង ៣៩ ពាន់លានដុល្លារ ដោយបង្កើនទ្រព្យសម្បត្តិសុទ្ធ​របស់លោក Pham Nhat Vuong ឡើងដល់ ៤៤.៥ ពាន់លានដុល្លារ ។

គួរបញ្ជាក់ថា បច្ចុប្បន្ន តម្លៃនៃទីផ្សាររបស់ក្រុមហ៊ុនរថយន្តអគ្គិសនី VinFast Auto បានកើនឡើង ៤ ដង ពោលដល់ ៨៥ ពាន់លានដុល្លារ ដែលលើសពីក្រុមហ៊ុនអាមេរិក General Motors ចំនួន ៤៦ ពាន់លានដុល្លារ និងក្រុមហ៊ុន Ford ចំនួន ៤៨ ពាន់លានដុល្លារ ប៉ុន្តែនៅតែទាបជាងទីផ្សាររបស់ក្រុមហ៊ុន Tesla ចំនួន ៧៣៩ ​ពាន់លានដុល្លារ និងដៃគូប្រកួតប្រជែង BYD របស់ចិនចំនួន ៩៣ ​ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖ CEO World Magazine