អ៊ីស្រាអែល និងក្រុមហាម៉ាស ប្រកាសសង្គ្រាមរយៈពេលវែង ក្រោយបទឈប់បាញ់

ទាំងក្រុមហាម៉ាស់ និងអ៊ីស្រាអែលសុទ្ធតែប្រកាសដូចគ្នាថា ពួកគេត្រៀមខ្លួនជាស្រេចដើម្បីបន្តសង្រ្គាមអូសបន្លាយរយៈពេលវែង បន្ទាប់ពីការផ្អាកបាញ់រយៈពេលខ្លីនៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំងពីរ នឹងផ្អាកការប្រយុទ្ធគ្នារយៈពេល៤ថ្ងៃ ដោយចាប់ផ្តើមពីម៉ោង៧ព្រឹកទៅ (ម៉ោងនៅអ៊ីស្រាអែល) ដោយផ្អែកលើកិច្ចព្រមព្រៀងរវាងអ៊ីស្រាអែល និងក្រុមឥស្លាមប៉ាឡេស្ទីន។

អ្នកនាំពាក្យរបស់កងកម្លាំងប្រដាប់អាវុធ Al-Qassam ដែលជាសម្ព័ន្ធចលនាហាម៉ាស បានចេញសេចក្តីថ្លែងការណ៍ជាវីដេអូមួយ បន្ទាប់ពីសេចក្តីប្រកាសអំពីការផ្អាកមនុស្សធម៌នោះថា យុទ្ធជនប៉ាឡេស្ទីន នៅតែត្រៀមខ្លួន ដើម្បីប្រឈមមុខជាមួយកងកម្លាំងអ៊ីស្រាអែល ដរាបណាសង្រ្គាមនៅតែបន្ត។

លោកបន្ថែមថា លក្ខខណ្ឌដែលព្រមព្រៀងសម្រាប់ការផ្អាកបាញ់ គឺដូចទៅនឹងលក្ខខណ្ឌ ដែលក្រុមហាម៉ាសបានស្នើឡើង មុនពេលអ៊ីស្រាអែលចាប់ផ្តើមប្រតិបត្តិការជើងគោករបស់ខ្លួននៅហ្គាហ្សាដែរ។ ដំបូងឡើយ អ៊ីស្រាអែលបានច្រានចោលសំណើនេះ ដោយអះអាងថា ខ្លួនអាចសម្រេចបាននូវគោលដៅរបស់ខ្លួនជាមួយនឹងអំណាចយោធា។

ស្របពេលជាមួយគ្នានោះ អ្នកនាំពាក្យយោធាអ៊ីស្រាអែល លោក Daniel Hagari បាននិយាយកាលពីល្ងាចថ្ងៃព្រហស្បតិ៍ទី២៣ខែវិច្ឆិកាថា ការនាំយកតំបន់ហ្គាហ្សាភាគខាងជើងមកគ្រប់គ្រង គឺគ្រាន់តែជាដំណាក់កាលដំបូងនៃសង្រ្គាមដ៏យូរប្រឆាំង នឹងក្រុមហាម៉ាសប៉ុណ្ណោះ។

លោកនិយាយថា នៅប៉ុន្មានថ្ងៃខាងមុខ កងកម្លាំងអ៊ីស្រាអែលនឹងផ្តោតលើការរៀបចំផែនការ និងបញ្ចប់ការត្រៀមលក្ខណៈ សម្រាប់ដំណាក់កាលបន្ទាប់នៃការប្រយុទ្ធ ។ អ៊ីស្រាអែល​នឹង​រក្សា​កម្លាំង​របស់​ខ្លួន​នៅ​តំបន់ហ្គាហ្សា ​អំឡុង​ពេល​ផ្អាកបាញ់ ហើយ​គោរព​តាម​កិច្ច​ព្រមព្រៀងនោះ ប៉ុន្តែ​ក៏នឹង​បន្ត​ប្រតិបត្តិការ​យោធា​វិញផងដែរ ​នៅ​ពេល​ការ​ផ្អាក​នេះ​បញ្ចប់ ៕

ប្រែសម្រួល៖ Vann Vann

ប្រភព៖ NHK

ចុចអាន៖ អ៊ីស្រាអែល ប្រកាស សម្លាប់បានមេទ័ពជើងទឹកក្រុមហាម៉ាស