ព័ត៌មានអន្ដរជាតិ

ម៉ាឡេស៊ី បំបែកសម្បុកពេស្យាចារ ឃាត់បាននារីថៃ វៀតណាម និងឥណ្ឌូណេស៊ី ៤៨នាក់

បានផុស

២ ខែ មុន

នៅ

ថ្ងៃចន្ទ ៨ មករា ២០២៤

ដោយ

កាលពីចុងសប្តាហ៍ នាយកដ្ឋានអន្តោប្រវេសន៍ម៉ាឡេស៊ី បានឃាត់ខ្លួនស្រ្តីបរទេសចំនួន៤៨នាក់ ក្នុងការឆ្មក់ចូលបំបែកសម្បុកពេស្យាចារចំនួនបីកន្លែង នៅទីក្រុងគូឡាឡាំពួ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយករងអន្តោប្រវេសន៍លោក Jafri Embok Taha និយាយថា ការវាយឆ្មក់កាលពីយប់ថ្ងៃសៅរ៍ទី៦ខែមករា ក៏បានរារាំងសកម្មភាពរបស់បណ្តាញមួយផងដែរ។ លោកនិយាយថា “យើងបានចាប់ខ្លួនស្ត្រីបរទេសចំនួន៤៨នាក់ ក្នុងនោះមានជនជាតិឥណ្ឌូណេស៊ី៣២នាក់ ថៃ១៣នាក់ និងវៀតណាម៣នាក់ រួមជាមួយបុរសម្នាក់មកពីប្រទេសអាហ្វហ្គានីស្ថាន”។

អគ្គនាយករងអន្តោប្រវេសន៍លោក Jafri Embok Taha (រូបថត៖ Bernama)

ដោយឡែក ក្នុងសេចក្តីថ្លែងការណ៍មួយកាលពីថ្ងៃអាទិត្យ លោក Jafri បន្ថែមថា បុរសក្នុងតំបន់បីនាក់ ក៏ត្រូវបានឃុំខ្លួនផងដែរ ដោយក្នុងនោះមានពីរនាក់ជាអ្នកមើលការខុសត្រូវអគារ ខណៈម្នាក់ជា អ្នកដឹកជញ្ជូន។ លោកបន្តថា ស្ត្រីថៃ៨នាក់ក្នុងចំណោមនោះ គឺមានឯកសារបញ្ជាក់ពីព័ត៌មានផ្ទាល់ខ្លួនត្រឹមត្រូវ ប៉ុន្តែនារីបរទេសផ្សេងទៀត គឺមិនមានឯកសារធ្វើដំណើរ ឬលិខិតឆ្លងដែនទេ។

លោកលើកឡើងទៀតថា “យើងបានរឹបអូសវត្ថុផ្សេងៗរួមមានស្រោមអនាម័យ, លិខិតឆ្លងដែនថៃចំនួន៨, លុយ៣០០រីងហ្គីត (៦៤ដុល្លារ), កន្សែង, កាមេរ៉ាសុវត្ថិភាពនិងរថយន្តមួយគ្រឿង”។

តាមការបញ្ជាក់ពីលោក Jafri, ក្រុមនេះដំណើរការជាងមួយឆ្នាំមកហើយ ដោយពួកគេផ្សព្វផ្សាយសេវាកម្មរបស់ស្ត្រី តាមរយៈការបង្ហោះរូបថតរបស់ពួកគេនៅលើ Telegram និង WhatsApp ហើយស្ត្រីទាំងនោះ នឹងត្រូវបញ្ជូនទៅកាន់សណ្ឋាគារឬទីតាំងណាត់ជួបរបស់អតិថិជន។ អតិថិជនម្នាក់ៗត្រូវបង់ប្រាក់ចាប់ពី៨៦ដុល្លារ ដល់២៥៨ដុល្លារ តាមកញ្ចប់ដែលពួកគេចង់បាន ហើយការទូទាត់គឺធ្វើឡើងជាសាច់ប្រាក់ ឬប្រតិបត្តិការតាមអនឡាញជាមុន មុនពេលនារីត្រូវបានបញ្ជូនទៅជួបអតិថិជន។

ជាចុងក្រោយ លោកប្តេជ្ញាថា ម៉ាឡេស៊ីនឹងបន្តប្រតិបត្តិការដដែលនេះនាពេលអនាគត ហើយចាត់វិធានការយ៉ាងម៉ឺងម៉ាត់បំផុត លើជនដែលប្រព្រឹត្តបទល្មើសអន្តោប្រវេសន៍៕

ប្រែសម្រួល៖ Vann Vann

ប្រភព៖ Nation

ចុចអាន៖ វៀតណាម ចាប់ខ្លួនមេអណ្តើក នាំបវរកញ្ញានិងតារាម៉ូដែល ទៅបម្រើសេវាកម្មផ្លូវភេទឲ្យភ្ញៀវ មួយយប់ ២០០០ដុល្លារ