ម៉ាឡេស៊ី លុបចោលមាតិកា Scam ជាង ៤ម៉ឺន ក្នុងរយៈពេលត្រឹម ៣ខែ

បញ្ហាបោកប្រាស់តាមប្រព័ន្ធអ៊ីនធឺណិត (Scam) កំពុងក្លាយជាវិបត្តិដ៏គួរឲ្យ​ព្រួយបារម្ភ នៅក្នុងប្រទេសម៉ាឡេស៊ី ដោយ​អនុរដ្ឋមន្ត្រីក្រសួងទំនាក់ទំនង លោកស្រី Teo Nie Ching បានបង្ហើប​ឲ្យ​ដឹងថា ត្រឹមតែ ៣ខែដំបូង នៃឆ្នាំ២០២៦ មាតិកាដែលពាក់ព័ន្ធនឹងការបោកប្រាស់ រួមទាំងគណនីក្លែងក្លាយ និងបន្លំខ្លួនជាអ្នកដទៃចំនួន ៤៣ ៦១៨ ត្រូវបានលុបចោលទាំងស្រុង។

សារព័ត៌មាន Strait Times បាន​ចុះផ្សាយ​នា​ថ្ងៃទី​២៨ ខែមេសា ថា តួលេខនេះ បានបង្ហាញពីការកើនឡើងយ៉ាងគំហុក​គួរ​ឲ្យ​តក់ស្លុត បើប្រៀបធៀបទៅនឹងឆ្នាំមុនៗ ដែលក្នុងឆ្នាំ២០២៤ មានត្រឹមជាង ៦ម៉ឺនករណី ប៉ុន្តែបានហក់ឡើងដល់ជិត ១០ម៉ឺនករណីក្នុងឆ្នាំ២០២៥ កន្លងទៅ។

អ្វីដែលគួរឲ្យ​ខ្លាចជាងនេះទៅទៀតនោះ គឺក្រុមអ្នកបោកប្រាស់ បានចាប់ផ្ដើមប្រើប្រាស់បច្ចេកវិទ្យាបញ្ញាសិប្បនិម្មិត ឬ AI ដើម្បីធ្វើសកម្មភាពបោកបន្លំឲ្យ​កាន់តែដូចពិតៗ។

លោកស្រី Teo Nie Ching បានលើកឡើងថា មានករណីប្រើប្រាស់ AI ដើម្បីក្លែងសំឡេងរបស់ព្រះមហាក្សត្រម៉ាឡេស៊ី គឺព្រះចៅស៊ុលតង់ អ៊ីប្រាហ៊ីម ក្នុងវីដេអូបោកប្រាស់ ដែលផ្សព្វផ្សាយពីជំនួយហិរញ្ញវត្ថុមិនពិត។ លោក​ស្រី បាន​បន្ថែម​ថា មិនត្រឹមតែនៅក្នុងប្រទេសម៉ាឡេស៊ីប៉ុណ្ណោះទេ សូម្បីតែរូបភាពរបស់អតីតប្រធានាធិបតីសិង្ហបុរី លោកស្រី Halimah Yacob ក៏ត្រូវបានគេយកទៅកែច្នៃដោយ AI ដើម្បីប្រើក្នុងគោលបំណងបោកប្រាស់ស្រដៀងគ្នានេះដែរ។

គួរ​រំលឹក​ថា យោងតាមទិន្នន័យចុងក្រោយសម្រាប់ឆ្នាំ២០២៥ ការខាតបង់សរុបដោយសារអំពើឆបោកនៅក្នុងប្រទេសម៉ាឡេស៊ី មានចំនួនប្រហែល ៦៦០លានដុល្លារ។ ចំនួននេះ តំណាងឲ្យ​ការកើនឡើងយ៉ាងខ្លាំងរហូតដល់ ៧៦% បើធៀបទៅនឹងឆ្នាំ២០២៤ ដែលកាលនោះមានការខាតបង់ត្រឹមតែប្រហែល ៣៧០លានដុល្លារ​ប៉ុណ្ណោះ។

ក្នុងនោះ ការឆបោកលើការវិនិយោគ គឺជាប្រភពនៃការបាត់បង់ទឹកប្រាក់ធំជាងគេបំផុត ដែលមានតម្លៃសរុបប្រហែល ៣២៥លានដុល្លារ។ បច្ចុប្បន្ន រដ្ឋាភិបាលម៉ាឡេស៊ី កំពុងបង្កើនកិច្ចខិតខំប្រឹងប្រែងតាមរយៈច្បាប់ថ្មីៗ ដើម្បីការពារប្រជាពលរដ្ឋពីការបាត់បង់សាច់ប្រាក់កាន់តែច្រើនក្នុងឆ្នាំ២០២៦ នេះ៕

ប្រែសម្រួល៖ ឈាង