ម៉ាឡេស៊ី សម្រុកដំឡើងរបងបន្លាលួសនៅតាមព្រំដែនជាមួយ​ថៃ ដើម្បីបង្ក្រាប​​បទល្មើស

ដើម្បីកាត់ផ្តាច់ផ្លូវរត់ពន្ធ និងការជួញដូរមនុស្ស អាជ្ញាធរម៉ាឡេស៊ីបានចាប់ផ្តើមដំឡើងរបងបន្លាលួស​ប្រវែង១,៥​គីឡូម៉ែត្រ នៅតាមបណ្តោយព្រំដែនទន្លេជាប់ប្រទេសថៃ។

យោង​តាម​ការ​ចុះផ្សាយ​កាល​ពីថ្ងៃទី​១៣​ខែ​កុម្ភៈ​របស់​​បាងកក​ប៉ុស្តិ៍ ប៉ូលិសរដ្ឋ Kelantan បានចាប់ផ្តើមគម្រោងនេះកាលពីថ្ងៃព្រហស្បតិ៍ ដោយផ្ដោតលើតំបន់ចន្លោះ Rantau Panjang និងប៉ុស្តិ៍សន្តិសុខ Pos Ibrahim Pencen ដែលជាចំណុចក្តៅនៃបទល្មើសឆ្លងដែន ស្ថិតនៅទល់មុខខេត្ត Narathiwat របស់ថៃ។

បាងកក​ប៉ុស្តិ៍ បាន​​អះអាងថា របងបន្លា​លួស​នេះនឹងត្រូវដាក់នៅតាម «មូលដ្ឋានខុសច្បាប់» ចំនួន​២៦កន្លែង ដែលត្រូវបានកម្ទេចដោយកងកម្លាំងសន្តិសុខនាពេលថ្មីៗនេះ។ ចំណតទូក និងផ្លូវខុស​ច្បាប់​ទាំងនេះ ត្រូវបានគេប្រើប្រាស់ជាយូរមកហើយសម្រាប់ការរត់ពន្ធទំនិញ គ្រឿងញៀន និងការជួញដូរមនុស្សឆ្លងកាត់ទន្លេ Golok។ ជាមួយនឹងកញ្ចប់ថវិកា​១០០ ០០០​រីងហ្គីត ពីរដ្ឋាភិបាលកណ្តាល កម្មករកំពុងប្រញាប់ប្រញាល់បញ្ចប់ការងារនេះ​ឲ្យ​ទាន់មុនពេលចាប់ផ្តើមពិធីបុណ្យ​រ៉ាម៉ាដាន នា​ថ្ងៃទី​១៨​ខែកុម្ភៈ​ខាង​មុខ។

ទោះបីជាបច្ចុប្បន្នគេប្រើប្រាស់របងបន្លា​លួស​ក៏ដោយ ក៏​យុទ្ធសាស្ត្ររយៈពេលវែងសម្រាប់ព្រំដែននេះនៅតែជាប្រធានបទត្រូវ​ដេញដោល​គ្នា​បន្ត​ទៀត។ មន្ត្រីរដ្ឋ Kelantan បានជំរុញ​ឲ្យមានការសាងសង់ជញ្ជាំងបេតុងអចិន្ត្រៃយ៍ ប៉ុន្តែរដ្ឋមន្ត្រីក្រសួងមហាផ្ទៃម៉ាឡេស៊ីបានបង្ហាញចំណាប់អារម្មណ៍លើ​ដំណោះស្រាយ​ប្រព័ន្ធបច្ចេកវិទ្យាខ្ពស់​ជំនួស​វិញ។ សម្រាប់ពេលនេះ របងថ្មី​នឹងដើរតួជាវិធានការបង្ការបន្ទាន់ប្រឆាំងនឹងសកម្មភាពខុសច្បាប់នានាដែលកើតមាននៅក្នុងស្រុក Sungai Kolok៕

ប្រែសម្រួល៖ ឈាង