វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ

ប្រទេសវៀតណាម បានព្រមានឲ្យពលរដ្ឋរបស់ខ្លួននៅតំបន់ភាគខាងជើង ត្រូវត្រៀមលក្ខណៈជាមុន ព្រោះថា នៅចុងខែនេះ ទំនងជានឹងមានព្យុះ១ឬ២ទៀត វាយប្រហារ។ នេះបើតាមការចុះផ្សាយរបស់ VN Express។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសរបស់ក្រសួងធនធានធម្មជាតិនិងបរិស្ថាន កាលពីថ្ងៃអាទិត្យទី១៥ខែកញ្ញាឆ្នាំ២០២៤, ១០ថ្ងៃចុងក្រោយនៃខែនេះ សមុទ្រខាងកើតនឹងមានព្យុះ១ទៅ២ទៀត បក់បោកទៅតំបន់ភាគខាងជើង បណ្តាលឲ្យមានភ្លៀងធ្លាក់ខ្លាំងនិងគ្រោះទឹកជំនន់ធ្លាយដល់ខែតុលានិងវិច្ឆិកា។

ស្របពេលជាមួយគ្នានោះ ភ្នាក់ងារឧតុនិយមវៀតណាម បានចេញការព្យាករថា ប្រទេសទាំងមូលនឹងមានភ្លៀងធ្លាក់ ខណៈប៉ែកខាងជើងអាចរងគ្រោះធ្ងន់ធ្ងរជាងគេ ពោលគឺនឹងមានភ្លៀងធ្លាក់ខ្ពស់ជាងកម្រិតមធ្យមពី២០%ទៅ៤០%។

សូមបញ្ជាក់ថា តាំង​ពី​ដើម​ឆ្នាំនេះ​មក សមុទ្រ​ខាង​កើត​ កើតមាន​ខ្យល់​ព្យុះ​ចំនួន​បីរួចទៅហើយ ដែលក្នុងចំណោមនោះ ព្យុះទីហ្វុង យ៉ាកជី មានឥទ្ធិពលខ្លាំងជាងគេ ដោយបោកបក់នៅខេត្ត ក្វាងនិញ។

លើសពីនេះ ឥទ្ធិពលព្យុះ យ៉ាកជី បានសម្លាប់មនុស្សចំនួន២៩២នាក់ និង៦៧នាក់បាត់ខ្លួន ហើយធ្វើឲ្យទឹកទន្លេហក់ឡើងខ្ពស់ ជន់លិចផ្ទះជាង ៧៣ ០០០ខ្នងនៅភាគខាងជើង ខណៈទីក្រុងហាណូយ ក៏រងគ្រោះធ្ងន់ធ្ងរដែរ។

មិនត្រឹមប៉ុណ្ណឹង ​​ព្យុះនេះ​ ត្រូវគេប៉ាន់ស្មានថា ក៏បង្កការ​ខាត​បង់​ទ្រព្យសម្បត្តិ​រហូតដល់ទៅ ៤០ ទ្រីលាន​ដុង (១.៦ ប៊ីលាន​ដុល្លារ​) ផងដែរ៕

អត្ថបទ៖ សុខ សុវណ្ណ

ចុចអាន៖ ទីហ្វុងយ៉ាកជី បង្កការ​ខាត​បង់​ ១,៦ ប៊ីលាន​ដុល្លារ​នៅ​វៀតណាម និង​អាច​ទម្លាក់​កំណើន​សេដ្ឋកិច្ច​ប្រទេសនេះ​