ហេតុអ្វីឆ្នាំនេះ ព្យុះសាហាវៗម្ល៉េះ?

មិនមែនជារឿងចម្លែកឡើយដែលរាល់ឆ្នាំ ពិភពលោកតែងតែរងការវាយប្រហារដោយខ្យល់ព្យុះ ប៉ុន្តែអ្វីដែលគេនឹកស្មានមិនដល់គឺថា ឆ្នាំនេះ មានព្យុះជាច្រើនហើយសុទ្ធតែខ្លាំងៗទៀត ទើបមានការចោទជាសំណួរថា ហេតុអ្វីឆ្នាំ២០២៤ មានព្យុះសាហាវៗម៉្លេះ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីអ្នកជំនាញវៀតណាមកាលពីថ្ងៃអាទិត្យទី១៣ខែតុលាឆ្នាំ២០២៤, មូលហេតុធំ២ ដែល២០២៤មានព្យុះសាហាវៗជាងរាល់ឆ្នាំគឺដោយសារតែកត្តាបម្រែបម្រួលអាកាសធាតុ និងការផ្លាស់ប្តូរយ៉ាងឆាប់រហ័សពីបាតុភូត El Nino ទៅ La Nina បណ្តាលឲ្យសីតុណ្ហភាពមហាសមុទ្រនិងបរិយាកាសកើនឡើង។

ដូចអ្នកដឹងស្រាប់ហើយ ឆ្នាំ២០២៤នេះ ពិភពលោកបានជួបប្រទះព្យុះកាចជាច្រើន ដោយព្យុះនីមួយៗមានល្បឿនខ្យល់មិនក្រោម២០០គីឡូម៉ែត្រក្នុងមួយម៉ោងទេ តួយ៉ាងដូចជាព្យុះទីហ្វុង Yagi នៅសមុទ្រចិនខាងត្បូង, ព្យុះ Gaemi និង Krathon ដែលបោកបក់លើប្រទេសចិន ក៏ដូចជាព្យុះសង្ឃរា Helene និង Milton នៅសហរដ្ឋអាមេរិកជាដើម។

ជុះវិញបញ្ហានេះ លោក Truong Ba Kien នាយករងនៃមជ្ឈមណ្ឌលស្រាវជ្រាវឧតុនិយមនិងអាកាសធាតុ វៀតណាម បានពន្យល់ថា កាលណាសីតុណ្ហភាពកើនឡើងនោះទឹកសមុទ្រកាន់តែក្តៅ ហើយវានឹងជះបញ្ជូនចំហាយទឹកនិងថាមពលកាន់តែច្រើនចូលក្នុងប្រព័ន្ធអាកាសធាតុ ជាហេតុនាំឲ្យកម្លាំងព្យុះកាន់តែខ្លាំង។

ម្យ៉ាងវិញទៀត បើកាលណា សីតុណ្ហភាពជាសកល កើនឡើង១អង្សាសេនោះ កម្លាំងខ្យល់ព្យុះក៏នឹងកើនឡើង ៤០%ដែរ។

និយាយពី El Nino និង La Nina វិញ, កាលណាបាតុភូតនេះផ្លាស់ប្តូរលឿនពេកនៅតំបន់ប៉ាស៊ីហ្វិកកណ្តាល និងខាងកើត វានឹងធ្វើឲ្យមានអតុល្យភាពកម្តៅនិងសំណើមនៃមហាសមុទ្រ ដោយជួយបង្កើនថាមពលសម្រាប់ការកកើតព្យុះត្រូពិកដែលមានឥទ្ធិភពកាចសាហាវ។

សូមបញ្ជាក់ថា ឆ្នាំ​ដែល​មាន​បាតុភូត El Nino ខ្លាំងបំផុតគឺ១៩៩៧ ​ដោយកាលនោះ​មាន​ព្យុះចំនួន៣១កកើតនៅ​មហាសមុទ្រ​ប៉ាស៊ីហ្វិកប៉ែកពាយព្យ ហើយមកដល់ឆ្នាំ១៩៩៨ បាតុភូត La Nina បានបង្កើតព្យុះកាចចំនួន២៦៕

អត្ថបទ៖ សុខ សុវណ្ណ

ចុចអាន៖ ព្យុះ ២ទៀត នឹងវាយប្រហារវៀតណាម ក្នុងខែនេះ