អូស្ត្រាលី៖ ស្ត្រី​ម្នាក់​គៀបជាប់ក្នុង​ក្រហែង​ថ្ម​៧ម៉ោង​ដោយសារព្យាយាម​ទាញ​យក​ទូរស័ព្ទ​​ធ្លាក់​ចូល​

ស្ត្រី​ម្នាក់​ដែល​ព្យាយាម​ទៅ​យក​ទូរស័ព្ទ​ដែលធ្លាក់​ចូល​​នៅចន្លោះ​ផ្ទាំងថ្ម​ធំៗ​ក្នុង​តំបន់ជ្រលងភ្នំ Hunter របស់​ប្រទេស​អូស្ត្រាលី​​បាន​ជាប់គាំង​រយៈពេល​ប្រាំពីរ​ម៉ោង​ មុនពេល​នាង​ត្រូវបាន​ជួយ​សង្គ្រោះ​កាលពីដើម​ខែ​នេះ។ នេះបើយោងតាមការចេញផ្សាយរបស់សារព័ត៌មាន​CNN នៅថ្ងៃទី២៣ខែតុលានេះ។

ស្ត្រីរូបនេះ មានអាយុ២៣​ បានដើរលេងជាមួយមិត្តភ័ក្តិនៅលើដីឯកជនមួយក្នុងទីក្រុង Laguna ដែលជាទីក្រុងជនបទនៅជ្រលងភ្នំ Hunter ចម្ងាយប្រហែល​១២០​គីឡូម៉ែត្រ​ពីទីក្រុងស៊ីដនី។

នាងបានធ្លាក់ទូរសព្ទ័ចូលចន្លោះផ្ទាំងថ្មនៅពេលដែលនាងព្យាយាមយកវាមកវិញ នាងបានរអិលចូលទៅក្នុងប្រឡោះប្រវែង​៣​ម៉ែត្រ រវាងផ្ទាំងថ្មធំពីរ ដែលមានជម្រៅជ្រៅពេក ទើបមិត្តរបស់នាងមិនអាចចូលទៅជួយនាងបាន ទើបមិត្តភក្តិរបស់​នាងទាក់ទងក្រុមជំនួយ។ ឈ្មោះ​របស់​ស្ត្រី​រូប​នេះ​មិន​ត្រូវ​បាន​គេ​បញ្ចេញ​ជា​ផ្លូវការ​ដោយ​សេវា​ជួយ​សង្គ្រោះ​ទេ ។

អស់រយៈពេលប្រាំពីរម៉ោងបន្ទាប់ ប៉ូលិស រថយន្តសង្គ្រោះ អគ្គីភ័យ និងក្រុមជួយសង្គ្រោះស្ម័គ្រចិត្តបានធ្វើការទាញយកនាងចេញ ក្នុងស្ថានភាពដ៏លំបាកដោយសារតែត្រូវយកថ្មធំៗចេញដោយប្រុងប្រយ័ត្ន។​ ដោយ​អព្ភូតហេតុ នាង​បានរួចផុតជីវិតដោយ​មាន​តែ​ស្នាម​របួស និង​ស្នាម​ជាំ​បន្តិចបន្តួច។ ស្ត្រី​រូប​នេះ​ត្រូវ​បាន​គេ​យក​ទៅ​កាន់​មន្ទីរពេទ្យ​ដើម្បី​ពិនិត្យ ។ ទោះយ៉ាងណាក៏ដោយ ទូរស័ព្ទរបស់នាងនៅតែជាប់នៅចន្លោះថ្ម៕

អត្ថបទ៖ ប៊ុន សុភាព