អាមេរិក រកឃើញ ថ្នាំបន្តក់ភ្នែកមួយប្រភេទ មានមេរោគផ្សិត អាចបណ្តាលឲ្យខ្វាក់ ឬស្លាប់

ក្រុមហ៊ុន Alcon របស់អាមេរិក បានប្រកាសប្រមូលថ្នាំបន្តក់ភ្នែក Systane Lubricant Eye Drops Ultra PF ពីលើទីផ្សារវិញ ក្រោយរកឃើញថា មានមេរោគផ្សិតនៅក្នុងថ្នាំនេះ ដែលអាចបណ្តាលឲ្យខ្វាក់ភ្នែក ឬឈានដល់បាត់បង់ជីវិតចំពោះអ្នកដែលមានប្រព័ន្ធភាពស៊ាំខ្សោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ NBC កាលពីថ្ងៃពុធទី២៥ខែធ្នូឆ្នាំ២០២៤ ក្រុមហ៊ុនឱសថដែលមានមូលដ្ឋាននៅរដ្ឋតិចសាស់មួយនេះ បានជូនដំណឹងទៅរដ្ឋបាលចំណីអាហារ និងឱសថ (FDA) រួចហើយ ឯ FDA ក៏បានចេញការព្រមានដល់អ្នកគ្រប់គ្នាហើយដែរ។

សេចក្តីប្រកាសនេះធ្វើឡើង បន្ទាប់ពីមានអតិថិជនអះអាងថា មានសារធាតុម្យ៉ាងនៅក្នុងដបថ្នាំ ហើយនោះត្រូវបានគេសន្មត់ថា ជាមេរោគផ្សិត។ 

ទោះបីជាយ៉ាងណាក៏ដោយ មានតែប្រអប់ថ្នាំដែលមានលេខ 10101 ជាមួយកាលបរិច្ឆេទផុតកំណត់នៅខែកញ្ញា២០២៥ប៉ុណ្ណោះ ដែលត្រូវបានប្រមូលមកវិញ ខណៈមកទល់ពេលនេះ នៅមិនទាន់មានសេចក្តីរាយការណ៍ថា មាននរណាម្នាក់ត្រូវរងគ្រោះដោយសារថ្នាំនេះទេ។ 

ពាក់ព័ន្ធបញ្ហានេះដែរ លោក Steven Smith អ្នកនាំពាក្យក្រុមហ៊ុន Alcon បាននិយាយថា ក្រុមហ៊ុនកំពុងបើកការស៊ើបអង្កេតហើយ ប៉ុន្តែមិនមែនថ្នាំទាំងអស់សុទ្ធតែមានមេរោគទេ គ្រាន់តែក្រុមហ៊ុនប្រមូលមកវិញសិន ដើម្បីសុវត្ថិភាពប៉ុណ្ណោះ។

សូមបញ្ជាក់ថា Systane Lubricant Eye Drops Ultra PF គឺជាថ្នាំបន្តក់បំបាត់អាការឈឺភ្នែកនិងរលាកភ្នែក ហើយកំពុងមានលក់នៅតាមហាងលក់រាយទូទាំងសហរដ្ឋអាមេរិក និងតាមអ៊ីនធឺណិត៕

អត្ថបទ៖ សុខ សុវណ្ណ

ចុចអាន៖ FDA ព្រមានថា អ្នកប្រើប្រាស់ថ្នាំបន្តក់ភ្នែកពីហាង CVS, Rite Aid និង Target អាចប្រឈមមុខនឹងពិការភាព