ព័ត៌មានអន្ដរជាតិ

ការបញ្ជូនកងទ័ពថ្មីរាប់ពាន់នាក់របស់អាមេរិក ទៅដល់មជ្ឈិមបូព៌ា ខណៈការប្រយុទ្ធថ្មើរជើងអាចផ្ទុះគ្រប់ពេល

បានផុស

៤ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

កងទាហានថ្មីរាប់ពាន់នាក់មកពីកងពលធំទ័ពអាកាសលេខ៨២ ដ៏ឆ្នើមរបស់កងទ័ពសហរដ្ឋអាមេរិកបានមកដល់មជ្ឈិមបូព៌ាហើយ។ នេះបើយោងតាមមន្ត្រីអាមេរិកពីររូបប្រាប់ទីភ្នាក់ងាររ៉យទ័រនៅថ្ងៃទី៣០ ខែមីនា ខណៈប្រធានាធិបតីសហរដ្ឋអាមេរិក លោក ដូណាល់ ត្រាំ កំពុងថ្លឹងថ្លែងនូវជំហានបន្ទាប់ក្នុងសង្គ្រាមប្រឆាំងនឹងអ៊ីរ៉ង់។

រ៉យទ័រ បានរាយការណ៍ជាលើកដំបូងនៅថ្ងៃទី១៨ខែមីនា ថា រដ្ឋបាលរបស់លោក ត្រាំ កំពុងពិចារណាដាក់ពង្រាយកងទ័ពអាមេរិកបន្ថែមរាប់ពាន់នាក់ទៅកាន់មជ្ឈិមបូព៌ា ជាចលនាមួយដែលនឹងពង្រីកជម្រើស ដើម្បីរួមបញ្ចូលការដាក់ពង្រាយកងកម្លាំងលើទឹកដីអ៊ីរ៉ង់។

យោធាអាមេរិកកំពុងប្រតិបត្តិការ Epic Fury ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ពឆ័ត្រយោង មានមូលដ្ឋាននៅ Fort Bragg រដ្ឋ North Carolina បានចូលរួមបន្ថែមលើកម្លាំងទាហានជើងទឹក និងកងកម្លាំងប្រតិបត្តិការពិសេសរាប់ពាន់នាក់ក្នុងតំបន់នៅមជ្ឈិមបូព៌ា។

គួរបញ្ជាក់ថា កាលពីចុងសប្តាហ៍កងម៉ារីនប្រហែល ២៥០០ នាក់បានដាក់ពង្រាយនៅមជ្ឈិមបូព៌ា។

មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះ ពួកគេមិនបានលើកឡើងជាក់លាក់ថាទាហានទាំងនោះកំពុងដាក់ពង្រាយនៅឯណាទេ។

ការដាក់ពង្រាយមានទាំងទាហាន កងទ័ពនៃទីស្នាក់ការកងពលទ័ពអាកាសលេខ៨២ ជាមួយសព្វាវុធមួយចំនួន និងការគាំទ្រផ្សេងទៀត រួមទាំងក្រុមប្រយុទ្ធកងពលតូចផងដែរ។

ប្រភពមួយនិយាយថា៖ «មកទល់ពេលនេះ អាមេរិកមិនទាន់មានការសម្រេចចិត្តធ្វើអ្វីមួយ ដើម្បីបញ្ជូនកងទ័ពចូលទៅក្នុងប្រទេសអ៊ីរ៉ង់ទេ ប៉ុន្តែពួកគេនឹងកសាងសមត្ថភាពយោធាសម្រាប់ប្រតិបត្តិការនាពេលអនាគតក្នុងតំបន់មជ្ឈិមបូព៌ា»។

មិនតែប៉ុណ្ណោះ ទាហានទាំងអស់នោះអាចត្រូវបានប្រើប្រាស់សម្រាប់គោលបំណងជាច្រើនក្នុងសង្គ្រាមនៅអ៊ីរ៉ង់ រួមទាំងការប៉ុនប៉ងដណ្តើមយកកោះ Kharg ដែលជាមជ្ឈមណ្ឌលសម្រាប់ការនាំចេញប្រេង ៩០ភាគរយរបស់ក្រុងតេហេរ៉ង់៕

ប្រែសម្រួល៖ ណឺ មិនា