អេហ្ស៊ីប ប្រាប់​អាមេរិក​ថា រដ្ឋ​អារ៉ាប់​ជំទាស់​នឹង​ផែនការ​តំបន់​ហ្គាហ្សា​របស់​លោក ត្រាំ

ក្រុម​រដ្ឋអារ៉ាប់ បានច្រានចោលផែនការ​របស់លោកប្រធានាធិបតីអាមេរិក ដូណាល់ ត្រាំ ក្នុង​ការ​គ្រប់គ្រង​តំបន់​ហ្គាហ្សា និង​ការផ្លាស់ទីលំនៅប្រជាជនប៉ាឡេស្ទីន​​ទៅ​កាន់​ប្រទេស​ផ្សេង។ នេះ​ជា​ការ​លើក​ឡើង​របស់​រដ្ឋមន្ត្រីការបរទេសអេហ្ស៊ីប លោក Badr Abdelatty ថ្លែង​ទៅ​កាន់​រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃចន្ទ​ទី​១០​ខែ​កុម្ភៈ​ឆ្នាំ​២០២៥។

នៅក្នុងកិច្ចប្រជុំមួយនៅទីក្រុងវ៉ាស៊ីនតោន លោក Abdelatty បានសង្កត់ធ្ងន់លើសារៈសំខាន់នៃការពន្លឿនការកសាងតំបន់ហ្គាហ្សាឡើងវិញ ខណៈដែល​​វត្តមាន​របស់​ប្រជាជន​ប៉ាឡេស្ទីន​​នៅទីនោះ​ដដែល។

បើយោងតាមសេចក្តីថ្លែងការណ៍របស់ក្រសួងការបរទេសអេហ្ស៊ីប លោក Abdelatty បាននិយាយថា លោកកំពុងទន្ទឹងរង់ចាំធ្វើការជាមួយរដ្ឋបាលថ្មីរបស់សហរដ្ឋអាមេរិក ដើម្បីសម្រេចបាននូវ​សន្តិភាព និងស្ថិរភាពដ៏ទូលំទូលាយ និងយុត្តិធម៌​នៅ​ក្នុងតំបន់។

ក្រសួងការបរទេស បាន​បន្ថែម​ថា លោក Abdelatty ក៏បានជួបជាមួយ​បេសកជន​​មជ្ឈិមបូព៌ារបស់អាមេរិក លោក Steve Witkoff នៅក្នុងកិច្ចប្រជុំដាច់ដោយឡែកមួយ​ផង​ដែរ ដើម្បី​ពិភាក្សា​លើ​បញ្ហា​​ដូច​គ្នា​នេះ។

សេចក្តីថ្លែងការណ៍របស់ក្រសួងការបរទេសអាមេរិកបន្ទាប់ពីកិច្ចប្រជុំ បាន​លើក​ឡើង​​ថា លោក Rubio បានរំលឹកឡើងវិញពីសារៈសំខាន់នៃកិច្ចសហប្រតិបត្តិការជិតស្និទ្ធ ដើម្បីជំរុញផែនការក្រោយជម្លោះសម្រាប់អភិបាលកិច្ច និងសន្តិសុខនៃតំបន់ហ្គាហ្សា ហើយបានសង្កត់ធ្ងន់ថា ក្រុមហាម៉ាស​មិនអាចគ្រប់គ្រងតំបន់ហ្គាហ្សា ឬគំរាមកំហែងអ៊ីស្រាអែលម្តងទៀតបានទេ។

សូម​បញ្ជាក់​ថា រាល់ការលើកឡើងដែល​ឲ្យ​ប៉ាឡេស្ទីនចាកចេញពីតំបន់ហ្គាហ្សា ដែលជាទឹកដីដែលពួកគេចង់បង្កើត​ជា​រដ្ឋឯករាជ្យនោះ គឺជាការប្រមាថដល់ថ្នាក់ដឹកនាំប៉ាឡេស្ទីនជាច្រើនជំនាន់ ហើយត្រូវបានបដិសេធម្តងហើយម្តងទៀតដោយរដ្ឋអារ៉ាប់ចាប់តាំងពីសង្រ្គាមហ្គាហ្សា​​បានចាប់ផ្តើមនៅក្នុងខែតុលា​ឆ្នាំ​២០២៣។

លោក ត្រាំ បានស្នើ​កាល​ពី​ថ្ងៃទី​២៥​ខែមករាថា អេហ្ស៊ីប និងហ្ស៊កដានី គួរតែទទួលយកជនជាតិប៉ាឡេស្ទីនពីតំបន់ហ្គាហ្សា។ ក្រោយមក លោក​បានស្នើ​ឲ្យ​អាមេរិកកាន់កាប់តំបន់ហ្គាហ្សា និង​ផ្លាស់ទីលំនៅអចិន្ត្រៃយ៍របស់ជនជាតិប៉ាឡេស្ទីនចេញពី​ហ្គាហ្សា​ដោយគ្មានសិទ្ធិត្រឡប់មកវិញ​ទេ។

ក្រុមសិទ្ធិមនុស្ស និង​អង្គការ​សហ​ប្រជាជាតិ បាន​ចាត់​ទុក​ទង្វើ​នេះ​គឺ​ជា​ការបោសសម្អាតជនជាតិភាគតិច និង​បាន​ថ្កោលទោស​​ចំពោះ​​ការលើកឡើងរបស់លោក ត្រាំ។

ក្រសួង​សុខាភិបាល​ហ្គាហ្សា ​បាន​ឲ្យ​ដឹង​ថា ការ​វាយ​ប្រហារ​យោធា​របស់​អ៊ីស្រាអែល​លើ​តំបន់​ហ្គាហ្សា​មុន​ត្រូវ​​​​ផ្អាក​ដោយ​បទ​ឈប់​បាញ់​ដ៏​ផុយស្រួយ​ បាន​សម្លាប់​ប្រជាជន​ប៉ាឡេស្ទីន​ជាង ៤៧ ០០០​នាក់​ក្នុង​រយៈពេល ១៦​ខែ​កន្លង​មក ហើយ​​ត្រូវ​បាន​​មជ្ឈដ្ឋាន​អន្តរជាតិ​ចោទ​​ប្រកាន់​​ថា​ជា​​​អំពើ​ប្រល័យ​ពូជសាសន៍ និង​ឧក្រិដ្ឋកម្ម​សង្គ្រាម។ យ៉ាងណា ​​អ៊ីស្រាអែល​​បាន​បដិសេធ​​ចំពោះ​ការ​ចោទ​ប្រកាន់​នេះ។

សង្គ្រាម​នេះ ​បាន​ធ្វើ​ឲ្យ​ប្រជាជន​ស្ទើរ​តែ​ទាំង​​អស់​នៃ​តំបន់​ហ្គាហ្សា​ផ្លាស់​ទី​លំនៅ និង​បង្ក​ឲ្យ​មាន​វិបត្តិ​ស្រេក​​ឃ្លាន។

ការបង្ហូរឈាមចុងក្រោយបំផុតនៅក្នុងជម្លោះអ៊ីស្រាអែល-ប៉ាឡេស្ទីនដែលមានអាយុកាលរាប់ទសវត្សរ៍ ត្រូវបានបង្កឡើងនៅថ្ងៃទី​៧​ខែតុលា​ឆ្នាំ​២០២៣ នៅពេលដែលពួកសកម្មប្រយុទ្ធហាម៉ាសប៉ាឡេស្ទីនបានវាយប្រហារអ៊ីស្រាអែលដោយបានសម្លាប់មនុស្ស ១ ២០០​នាក់ និងចាប់ចំណាប់ខ្មាំងចំនួន ២៥០នាក់៕

ដោយ៖ ឈាង