ព័ត៌មានអន្ដរជាតិ

អាមេរិកបញ្ចប់សមយុទ្ធនៅហ្វីលីពីន តែអត់ទាន់យកប្រព័ន្ធមីស៊ីលទៅវិញ

បានផុស

១ នាទីute មុន

នៅ

ថ្ងៃព្រហស្បតិ៍ ១២ មិថុនា ២០២៥

ដោយ

Chheang

យោងតាមការចុះផ្សាយកាលពីថ្ងៃទី១១ខែមិថុនារបស់ Japan Times ទោះសមយុទ្ធយោធារួម Balikatan ប្រចាំឆ្នាំរវាងកងកម្លាំងអាមេរិក និងហ្វីលីពីនបានបញ្ចប់ជាផ្លូវការទៅហើយកាលពីថ្ងៃសុក្រសប្ដាហ៍មុន ប្រព័ន្ធការពារមីស៊ីលប្រឆាំងនឹងនាវារបស់ក្រុងវ៉ាស៊ីនតោននៅតែបន្តដាក់ពង្រាយនៅលើទឹកដីសម្ព័ន្ធមិត្តរបស់ខ្លួនលើសពីការគ្រោងទុក។

ប្រព័ន្ធការពារដែនអាកាស NMESIS (រូបថត៖ Marine Corps)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធ «Balikatan 2025» មានទាហានចូលរួមប្រហែល ១៤ ០០០នាក់មកពីអាមេរិក និងហ្វីលីពីន ព្រមទាំងអ្នកសង្កេតការណ៍ពីអូស្ត្រាលី និងជប៉ុន។ សកម្មភាពរួមមាន សមយុទ្ធបាញ់គ្រាប់ពិត ការការពារយន្តហោះគ្មានមនុស្សបើក និងប្រតិបត្តិការផ្លូវអាកាស-ដែនសមុទ្ររួមគ្នានៅខេត្ត Zambales និងក្នុងដែនទឹកភាគខាងជើងក្បែរកោះតៃវ៉ាន់។

ជាការកត់សម្គាល់ សមយុទ្ធនេះ មានការដាក់ពង្រាយប្រព័ន្ធមីស៊ីលប្រឆាំងនាវាតាមឆ្នេរសមុទ្រ NMESIS ជាលើកដំបូងដែលមិនធ្លាប់មាន នៅលើកោះ Batan ដោយបង្កើនសមត្ថភាពវាយប្រហារដែនសមុទ្ររយៈចម្ងាយឆ្ងាយ។

មន្ត្រីការពារជាតិអាមេរិក និងហ្វីលីពីន បានបញ្ជាក់ថា ប្រព័ន្ធមីស៊ីល NMESIS នឹងស្ថិតនៅទីតាំងដដែល ទោះសមយុទ្ធបានបញ្ចប់។ អ្នករៀបចំផែនការយោធាចាត់ទុកប្រព័ន្ធនេះថាជាការរារាំងដ៏សំខាន់ ដែលមានសមត្ថភាពបាញ់មីស៊ីលបានចម្ងាយជាង ១៨០គីឡូម៉ែត្រឯណោះ។

អ្នកនាំពាក្យកងទ័ពជើងទឹកហ្វីលីពីនលោក John Percie Alcos បាននិយាយកាលពីថ្ងៃអង្គារថា ប្រព័ន្ធមីស៊ីលប្រឆាំងនាវាចល័តទំនើបរបស់អាមេរិក «នៅតែស្ថិតក្នុងប្រទេស ហើយវានឹងបន្តប្រើប្រាស់ដោយកងម៉ារីនហ្វីលីពីនសម្រាប់គោលបំណងហ្វឹកហាត់»។

សូមបញ្ជាក់ថា កន្លងមក ប្រទេសចិនបានរិះគន់ម្តងហើយម្តងទៀតចំពោះការដាក់ពង្រាយប្រព័ន្ធមីស៊ីលរបស់អាមេរិកនៅក្បែរកោះតៃវ៉ាន់ ដោយទុកថាវាជាការគ្មានទំនួលខុសត្រូវ និងព្រមានថា ប្រព័ន្ធមីស៊ីលទាំងនោះបង្កើនភាពតានតឹង និងអស្ថិរភាពនៅសមុទ្រចិនខាងត្បូង៕

ដោយ៖ ឈាង