WHO ថា ជំងឺកូវីដបំប្លែងខ្លួនថ្មីកាន់តែសាហាវ និងកើតមានច្រើនឡើងៗ ហើយកំពុងបន្តរាលដាលពេញពិភពលោក

អង្គការសុខភាពពិភពលោក (WHO) និយាយថា ជំងឺកូវីដ ១៩ បំប្លែងខ្លួនប្រភេទថ្មីនៅតែបន្តរាលដាលពាសពេញពិភពលោក ។

ស្ថាប័នសុខាភិបាលអន្តរជាតិបានហៅវីរុស ៣ ប្រភេទដែលត្រូវបានរកឃើញដំបូងនៅចក្រភពអង់គ្លេស បន្ទាប់មកនៅអាហ្រ្វិកខាងត្បូង និងប្រេស៊ីល ថាជា “វ៉ារ្យង់នៃការព្រួយបារម្ភ” ។

នៅក្នុងការធ្វើបច្ចុប្បន្នភាពរោគរាតត្បាតប្រចាំសប្តាហ៍របស់ខ្លួនដែលបានចេញផ្សាយកាលពីថ្ងៃអង្គារ WHO បាននិយាយថា វ៉ារ្យ៉ង់ចក្រភពអង់គ្លេសឥឡូវនេះបានរីករាលដាលដល់ប្រទេស និងដែនដីចំនួន  ១៣០ ពោលកើនឡើងបន្ថែមចំនួន ៥ ។

វ៉ារ្យ៉ង់អាហ្រ្វិកខាងត្បូងត្រូវបានបញ្ជាក់នៅក្នុងប្រទេស និងតំបន់ចំនួន ៨០ កើនឡើងបន្ថែមចំនួន ៥ ផងដែរ ហើយវ៉ារ្យង់ប្រេស៊ីលមានចំនួន ៤៥ កើនឡើងបន្ថែមចំនួន ៤ ។

ទីភ្នាក់ងារនេះកំពុងតាមដានស្ថានការណ៍នេះយ៉ាងដិតដល់ ខណៈការផ្លាស់ប្តូរហ្សែនរបស់វ៉ារ្យង់ទាំងនេះអាចជះឥទ្ធិពលដល់ភាពស៊ាំរបស់មនុស្ស ហើយវីរុសអាចឆ្លងកាន់តែខ្លាំងឡើងៗ ។

ទន្ទឹមនោះ WHO បានហៅវ៉ារ្យ៉ង់ ៦ ផ្សេងទៀតថាជាការប៉ះពាល់ ។ ពួកគេរាប់បញ្ចូលទាំងវ៉ារ្យង់ដែលត្រូវបានរកឃើញនៅហ្វីលីពីន និងជប៉ុនក្នុងខែកុម្ភៈ និងមួយទៀតត្រូវបានរកឃើញនៅប្រទេសបារាំងក្នុងខែមករា ។

បន្ថែមពីនេះចំនួនករណីឆ្លងថ្មីនៃជំងឺកូវីដ ១៩ នៅតែបន្តកើនឡើងជាលំដាប់លើពិភពលោក ខណៈប្រទេសដែលមានចំនួនឆ្លងសរុបខ្ពស់បំផុតគឺសហរដ្ឋអាមេរិក ប្រេស៊ីល ឥណ្ឌា បារាំង និងប៉ូឡូញ ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ សរុបចំនួន ១២៩,៤៦២,៧៥៧ ករណី និងមានអ្នកស្លាប់សរុប ២,៨២៨,០៣៤ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ WHO ថា ប្រភពដើមជំងឺកូវីដទំនងកើតក្នុងកសិដ្ឋានចិញ្ចឹមសត្វនៅអាស៊ីអាគ្នេយ៍ មិនមែននៅចិនឡើយ

ចុចអាន ៖ មេ WHO ឲ្យប្រទេសអ្នកមានទទួលខុសត្រូវផ្ទាល់ចំពោះការស្លាប់ដោយសារកូវីដនៅប្រទេសផ្សេងទៀត