ត្រឹមមួយខែ ពលរដ្ឋប៉ាឡេស្ទីន​ជិត​ ៦០០​នាក់​ ត្រូវអ៊ីស្រាអែល​សម្លាប់ ពេលកំពុងចាំយក​ជំនួយ

ត្រឹមរយៈពេលមួយខែប៉ុណ្ណោះ គិតចាប់ពីថ្ងៃទី២៧ខែឧសភាមក មានពលរដ្ឋប៉ាឡេស្ទីនដល់ទៅជិត ៦០០នាក់ ត្រូវស្លាប់ក្រោមដៃកងកម្លាំង IDF របស់អ៊ីស្រាអែល ពេលពួកគេកំពុងរង់ចាំយកជំនួយនៅទីតាំងចែករបស់អង្គការមនុស្សធម៌ ក្នុងតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Al Jazeera ដោយដកស្រង់ប្រភពពីក្រសួងសុខាភិបាលប្រចាំតំបន់ហ្គាហ្សា, ពលរដ្ឋប៉ាឡេស្ទីនចំនួន ៥៨៣នាក់ត្រូវបានសម្លាប់និង ៤ ១៨៦នាក់រងរបួស ពេលរង់ចាំយកជំនួយនៅកន្លែងចែក ដែលគ្រប់គ្រងដោយអង្គការមនុស្សធម៌ GHF ក្រោមការឧបត្ថម្ភដោយសហរដ្ឋអាមេរិកនិងអ៊ីស្រាអែល។

ទន្ទឹមនោះ ក្រុមប្រឹក្សាជនភៀសខ្លួនន័រវែស (NRC) និងសារព័ត៌មាន AP ក៏ចេញតួលេខដូចគ្នានេះដែរ ហើយលើកឡើងថា អ៊ីស្រាអែល បានសម្លាប់អ្នករង់ចាំយកជំនួយសឹងរាល់ថ្ងៃ គ្រាន់តែថ្ងៃខ្លះមានមនុស្សស្លាប់តិច និងថ្ងៃខ្លះស្លាប់ច្រើនប៉ុណ្ណោះ។

ទោះបីជាយ៉ាងណាក៏ដោយ ទាហានអ៊ីស្រាអែលនិយាយថា កងទ័ពទទួលបញ្ជាឲ្យបាញ់ទៅលើហ្វូងមនុស្ស និងប្រើធម៌ក្តៅលើជនទាំងឡាយដែលមិនស្តាប់ការព្រមាន ឬបង្កការគំរាមកំហែង។

សូមជម្រាបថា GHF បានរៀបចំទីតាំងធំៗដើម្បីចែកជំនួយត្រឹមតែ៤កន្លែងប៉ុណ្ណោះ ពោលគឺ៣កន្លែងនៅភាគខាងត្បូង និង១កន្លែងនៅកណ្តាលតំបន់ហ្គាហ្សា។ នៅភាគខាងជើងគឺមិនមានទេ ព្រោះស្ថានភាពនៅទីនោះគ្រោះថ្នាក់ខ្លាំង។

យោធាអ៊ីស្រាអែលបង្កើនយុទ្ធនាការកាន់តែខ្លាំង​ឡើងៗ ដោយបំផ្លិចបំផ្លាញតំបន់ហ្គាហ្សាសឹងរាបដូចកន្ទេល ចាប់តាំងពីសង្គ្រាម​ផ្ទុះ​​ឡើង​នៅខែតុលាឆ្នាំ​២០២៣។

យោងតាមអាជ្ញាធរប៉ាឡេស្ទីន មនុស្សជាង ៥៦ ០០០​នាក់ត្រូវបានសម្លាប់ចាប់តាំងពីផ្ទុះជម្លោះ។ ការវាយប្រហារជាច្រើន កើតឡើង​នៅ​តំបន់ជនស៊ីវិល ដោយបង្កើនក្តីបារម្ភជាអន្តរជាតិលើការរំលោភច្បាប់មនុស្សធម៌អន្តរជាតិ៕

អត្ថបទ៖ សុខ សុវណ្ណ

ចុចអាន៖ NGO ជាង១៧០ ថ្កោលទោស​ប្រព័ន្ធជំនួយ​នៅ​ហ្គាហ្សា GHF ថា​ជា«យន្តការជំនួយដ៏មរណៈ»