ព័ត៌មានអន្ដរជាតិ

NGO ជាង១៧០ ថ្កោលទោសប្រព័ន្ធជំនួយនៅហ្គាហ្សា GHF ថាជា«យន្តការជំនួយដ៏មរណៈ»

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

Chheang

អង្គការមនុស្សធម៌អន្តរជាតិជាង១៧០ ដូចជា Oxfam, Médecins Sans Frontières, Save the Children និង Amnesty International ជាដើម បានអំពាវនាវឲ្យផ្អាកជាបន្ទាន់នូវប្រព័ន្ធចែកចាយជំនួយដែលគាំទ្រដោយសហរដ្ឋអាមេរិក និងអ៊ីស្រាអែលនៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍រួមកាលពីថ្ងៃទី១ខែកក្កដា ពួកគេបានពណ៌នាអំពីការរៀបចំបច្ចុប្បន្នថាជា«យន្តការជំនួយដ៏មរណៈ» ដែលកំពុងធ្វើឲ្យជនស៊ីវិលបាត់បង់ជីវិតកាន់តែច្រើនឡើងថែមទៀត។

អង្គការទាំងនេះ អះអាងថា ប្រព័ន្ធជំនួយដែលត្រូវបានបង្កើតឡើងកាលពីចុងខែឧសភា និងសម្របសម្រួលដោយ «មូលនិធិមនុស្សធម៌ហ្គាហ្សា (GHF)» ដោយមានការគាំទ្រពីអាមេរិក និងអ៊ីស្រាអែល បានបណ្តាលឲ្យជនជាតិប៉ាឡេស្ទីនជាង ៥០០នាក់ស្លាប់ និងរាប់ពាន់នាក់ផ្សេងទៀតរងរបួស ព្រោះតែការបាញ់ប្រហារពីកងកម្លាំងអ៊ីស្រាអែល។ ការស្លាប់នេះ ត្រូវបានគេរាយការណ៍ថាបានកើតឡើងនៅពេលដែលជនស៊ីវិលបានប្រមូលផ្តុំគ្នានៅតំបន់ចែកចាយដែលគ្រប់គ្រងដោយអ៊ីស្រាអែល។

ក្នុងសេចក្ដីថ្លែងការណ៍រួមដដែលនេះ ក្រុមអង្គការទាំងជាង១៧០ បានលើកឡើងថា «នេះមិនមែនជាជំនួយមនុស្សធម៌ទេ។ វាគឺជាប្រព័ន្ធនៃការដាក់ទណ្ឌកម្ម។ វាបំពានច្បាប់មនុស្សធម៌អន្តរជាតិ ហើយបង្អាក់ភ្នាក់ងារមនុស្សធម៌ពីអព្យាក្រឹតភាព និងសមត្ថភាពការពារជនស៊ីវិល»។

មន្ត្រីកំពូលនៅអង្គការសហប្រជាជាតិ រួមទាំងប្រមុខអង្គការ UNRWA លោក Philippe Lazzarini ក៏បានថ្កោលទោសប្រព័ន្ធជំនួយ GHF នេះផងដែរ។ លោក Lazzarini បាននិយាយថា ជំនួសឲ្យការជួយមនុស្សដោយសុវត្ថិភាព ប្រព័ន្ធជំនួយ GHF កំពុងធ្វើឲ្យជីវិតរបស់ជនជាតិប៉ាឡេស្ទីនប្រឈមនឹងហានិភ័យ បង្ខំឲ្យពួកគេត្រូវជ្រើសរើសរវាង ភាពអត់ឃ្លាន ឬប្រឈមមុខនឹងគ្រោះថ្នាក់ដ៏ហឹង្សា ដើម្បីទទួលបានអាហារ។ លោកបានអំពាវនាវឲ្យមានការស្ដារឡើងវិញពេញលេញនៃការសម្របសម្រួលជំនួយដែលដឹកនាំដោយអង្គការសហប្រជាជាតិ៕

ដោយ៖ ឈាង

ចុចអាន៖ ត្រាំ ប្រកាសថា អ៊ីស្រាអែល យល់ព្រមបទឈប់បាញ់៦០ថ្ងៃនៅហ្គាហ្សាហើយ ចាំតែក្រុមហាម៉ាសប៉ុណ្ណោះ