ព្យុះកំពុងវាយប្រហារធ្ងន់ធ្ងរផង ថៃ ត្រូវជួបរញ្ជួយដីផ្ទួនៗ ២លើកថែមទៀត

ស្របពេលព្យុះ Kajiki កំពុងវាយប្រហារយ៉ាងដំណំនិងជះឥទ្ធិពលខ្លាំងក្លាលើប្រទេសថៃនោះ ស្រាប់តែគ្រោះធម្មជាតិមួយទៀតបានកើតឡើងនៅខេត្តភាគខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Star, រញ្ជួយដីកម្រិតស្រាល១.៥និង២.៤រ៉ិចទ័រ បានកើតឡើងក្នុងខេត្ត Chiang Rai និង Mae Hong Son នៅថ្ងៃពុធទី២៧ខែសីហា។

នាយកដ្ឋានតាមដានគ្រោះរញ្ជួយដីថៃ បានឲ្យដឹងថា ការរញ្ជួយដីលើកដំបូងកើតឡើងនៅម៉ោង ១:៤០នាទីរំលងអាធ្រាត្រ ជាមួយជម្រៅ៣គីឡូម៉ែត្រ មានចំណុចកណ្តានៅស្រុក Phan ខេត្ត Chiang Rai។

នៅ៤នាទីក្រោយមក ការរញ្ជួយដីមួយទៀតបានកើតឡើង ដោយមានកម្លាំង២.៤រ៉ិចទ័រ ជាមួយជម្រៅ៣គីឡូម៉ែត្រដូចគ្នានេះ និងមានចំណុចកណ្តាលនៅស្រុក Pai ខេត្ត Mae Hong Son។

ដ្បិតតែកម្លាំងរបស់វាធ្វើឲ្យរង្គើដល់តំបន់ខ្លះនៃខេត្តទាំងពីរ ប៉ុន្តែរញ្ជួយដីនេះ មិនបង្កការខូចខាតឬបណ្តាលឲ្យមានមនុស្សរងគ្រោះនោះទេ។

កាលពីសប្តាហ៍មុន ខេត្ត Mae Hong Son ប្រទេសថៃក៏រងឥទ្ធិពលពីគ្រោះរញ្ជួយដីកម្រិត៥.៤រ៉ិចទ័រ នៅប្រទេសមីយ៉ាន់ម៉ាដែរ ដ្បិតវាមិនបង្កផលប៉ះពាល់ខ្លាំងក៏ដោយ។

រញ្ជួយដីនោះ កើតឡើងនៅម៉ោង១១:៥៦នាទីព្រឹកថ្ងៃសុក្រ ជាមួយជម្រៅ១០គីឡូម៉ែត្រ ដោយមានចំណុចកណ្តាល ស្ថិតនៅចម្ងាយ៥៩៩គីឡូម៉ែត្រភាគពាយព្យសាលាស្រុក Mae Hong Son។

ចំណែកកាលពីថ្ងៃព្រហស្បតិ៍ រញ្ជួយដីកម្រិត៥.៤រ៉ិចទ័រដូចគ្នានេះ បានវាយប្រហារឆ្នេរសមុទ្រមីយ៉ាន់ម៉ា ហើយឥទ្ធិពលរបស់វាធ្វើឲ្យរង្គើដល់ទីក្រុងបាងកកប្រទេសថៃឯណោះ៕

អត្ថបទ៖ សុខ សុវណ្ណ

ចុចអាន៖ ថៃ រងទុក្ខផ្ទួនៗ ឆេះអគារពាណិជ្ជកម្មនៅកណ្តាលក្រុងបាងកក ចំពេលព្យុះក៏កំពុងវាយប្រហារខ្លាំង