ថៃ ប្រុងជើងការខ្ពស់ ព្រោះព្យុះថ្មី អាចបង្កឲ្យមានទឹកជំនន់ និងបំណាក់ដីធ្ងន់ធ្ងរ ថែមទៀត

ប្រទេសថៃកំពុងប្រុងជើងការខ្ពស់ជាបន្តទៀត ដើម្បីទប់ទល់នឹងការមកដល់របស់ព្យុះថ្មី ដែលនឹងវាយប្រហារនៅចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Nation នៅថ្ងៃសុក្រទី២៩ខែសីហាឆ្នាំ២០២៥ បច្ចុប្បន្នព្យុះនេះ កំពុងស្ថិតនៅភាគខាងកើតនៃប្រទេសវៀតណាម ប៉ុន្តែដោយសារតែការព្យាករថា ឥទ្ធិពលរបស់វាក៏ខ្លាំងមិនចាញ់ព្យុះ Kajiki ប៉ុន្មាននោះ ទើបថៃ ព្រមានឲ្យការប្រុងប្រយ័ត្នខ្ពស់។

នាយកដ្ឋានឧតុនិយមថៃ នៅថ្ងៃសុក្របានចេញការជូនដំណឹងអំពីហានិភ័យនៃគ្រោះទឹកជំនន់ បំណាក់ដីធ្ងន់ធ្ងរ និងខ្យល់កន្ត្រាក់ ទូទាំងប្រទេស។

សម្រាប់អ្នកនៅសមុទ្រ នាយកដ្ឋានបានព្រមានដល់អ្នកនេសាទកុំចេញទូក និងទេសចរកុំធ្វើដំណើរទៅកោះឲ្យសោះ ព្រោះតែរលកសមុទ្រនឹងមានកម្ពស់ខ្ពស់ បង្កគ្រោះថ្នាក់ធ្ងន់ធ្ងរ។

ក្នុងសេចក្តីប្រកាសនោះដែរបានបង្ហាញថា ខេត្តដែលនឹងរងគ្រោះខ្លាំងដោយសារព្យុះថ្មីនេះ គឺខេត្តភាគខាងត្បូងដូចជា Mae Hong Son, Chiang Mai, Chiang Rai, Phayao និង Nan។

ដូច្នេះហើយ ជាវិធានការប្រុងប្រៀបខ្លួន អាជ្ញាធរបានដាក់ពង្រាយកម្លាំងឲ្យឈរជើងរួចស្រេច ត្រៀមជួយសង្គ្រោះប្រជាជនក្នុងករណីមានរឿងអាសន្នណាមួយកើតឡើង។

លើសពីនេះ មនុស្សមួយចំនួននៅតាមបណ្តាខេត្តមានហានិភ័យ បានជម្លៀសខ្លួនរួចទៅហើយ ខណៈមួយចំនួនទៀតរង់ចាំស្តាប់បញ្ជា បើស្ថានការណ៍ធ្ងន់ធ្ងរ៕

អត្ថបទ៖ សុខ សុវណ្ណ

ចុចអាន៖ ថៃ រកឃើញមនុស្សស្លាប់ច្រើនឡើងៗ ក្នុងគ្រោះបំណាក់ដីនៅ ឈៀងម៉ៃ