ព័ត៌មានអន្ដរជាតិ

អ៊ីរ៉ង់ និងរុស្ស៊ី ចុះហត្ថលេខាលើកិច្ចព្រមព្រៀងនុយក្លេអ៊ែរតម្លៃ២៥ពាន់លានដុល្លារ

បានផុស

៩ ខែ មុន

នៅ

ថ្ងៃសៅរ៍ ២៧ កញ្ញា ២០២៥

ដោយ

Chheang

ទីភ្នាក់ងារសារព័ត៌មានរដ្ឋ IRNA បានរាយការណ៍កាលពីថ្ងៃសុក្រទី២៦កញ្ញាថា ប្រទេសអ៊ីរ៉ង់បានចុះហត្ថលេខាលើកិច្ចព្រមព្រៀងតម្លៃ ២៥ពាន់លានដុល្លារជាមួយសាជីវកម្មនុយក្លេអ៊ែររដ្ឋ Rosatom របស់រុស្ស៊ី ដើម្បីសាងសង់រោងចក្រថាមពលនុយក្លេអ៊ែរចំនួន៤ នៅភាគអាគ្នេយ៍ប្រទេសអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងដែលបានចុះហត្ថលេខានៅទីក្រុងមូស្គូ គ្របដណ្តប់លើការសាងសង់ម៉ាស៊ីនរ៉េអាក់ទ័រជំនាន់ទី៣ លើផ្ទៃដី៥០០ហិកតានៅក្នុងតំបន់ Sirik នៃខេត្ត Hormozgan។ នៅពេលសាងសង់រួច រោងចក្រទាំងនោះត្រូវបានគេរំពឹងថានឹងអាចផលិតថាមពលអគ្គិសនីបានចំនួន ៥០០០មេហ្គាវ៉ាត់។

Rosatom បានឲ្យដឹងកាលពីដើមសប្តាហ៍នេះថា ខ្លួនបានចុះហត្ថលេខាលើអនុស្សរណៈនៃការយោគយល់គ្នាជាមួយទីក្រុងតេហេរ៉ង់ ស្តីពីរោងចក្រថាមពលនុយក្លេអ៊ែរខ្នាតតូច ប៉ុន្តែមិនបានបញ្ជាក់ពីទំហំនៃគម្រោងនោះទេ។

បច្ចុប្បន្នអ៊ីរ៉ង់ដំណើរការរោងចក្រថាមពលនុយក្លេអ៊ែរតែមួយគត់គឺរោងចក្រ Bushehr ដែលសាងសង់ដោយរុស្ស៊ីនៅភាគខាងត្បូងដែលបង្កើតថាមពលប្រហែល១ជីហ្គាវ៉ាត់។

កិច្ចព្រមព្រៀងនេះ បានគូសបញ្ជាក់អំពីទំនាក់ទំនងកាន់តែស៊ីជម្រៅរវាងទីក្រុងមូស្គូ និងក្រុងតេហេរ៉ង់។ រុស្ស៊ីបានថ្កោលទោសការវាយប្រហារតាមអាកាសរបស់អាមេរិក និងអ៊ីស្រាអែលទៅលើទីតាំងនុយក្លេអ៊ែរអ៊ីរ៉ង់កាលពីខែមិថុនា ដែលអ៊ីស្រាអែលបានអះអាងថា អ៊ីរ៉ង់ជិតឈានដល់ការអភិវឌ្ឍអាវុធនុយក្លេអ៊ែរ។ ទីក្រុងតេហេរ៉ង់បានបដិសេធម្តងហើយម្តងទៀតថា ខ្លួនមានបំណង់ចង់បង្កើតអាវុធបរមាណូ ដោយទទូចថា កម្មវិធីនុយក្លេអ៊ែររបស់ខ្លួនគឺសម្រាប់គោលបំណងសន្តិភាពប៉ុណ្ណោះ។

គម្រោងនេះ គឺជាកិច្ចព្រមព្រៀងថាមពលដ៏ធំបំផុតមួយរវាងប្រទេសទាំងពីរ ហើយអាចបង្កើនភាពតានតឹងបន្ថែមទៀតជាមួយរដ្ឋាភិបាលលោកខាងលិច ដែលប្រឆាំងនឹងមហិច្ឆតានុយក្លេអ៊ែររបស់អ៊ីរ៉ង់ជាយូរមកហើយ៕

ដោយ៖ ឈាង

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា