សុខភាព

កត្តាប្រឈម និងមូលហេតុ ដែលបណ្តាលឲ្យកើតមានមហារីកសុដន់លើស្ត្រី!

បានផុស

៥ years មុន

នៅ

ថ្ងៃសៅរ៍ ២៨ វិច្ឆិកា ២០២០

ដោយ

បច្ចុប្បន្ន នៅលើពិភពលោក ជំងឺមហារីកសុដន់ ជាកង្វល់ទី១ ក្នុងចំណោមជំងឺមហារីករបស់ស្ត្រីទាំងអស់។ ចំណែកនៅប្រទេសកម្ពុជាយើងជំងឺនេះ គឺស្ថិតក្នុងចំណាត់ថ្នាក់ទី២ នៃជំងឺមហារីករបស់ស្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេសង្កេតឃើញជំងឺនេះ ច្រើនមាននៅលើស្ត្រីវ័យចំណាស់ ប៉ុន្តែស្ត្រីវ័យក្មេង ក៏អាចជួបប្រទះដែរ។ អត្រានៃអ្នកជំងឺមហារីកសុដន់មាន៖

– ១០% អាចកើតលើស្ត្រីវ័យក្រោម ៣៥ឆ្នាំ

– ២០% អាចកើតលើស្ត្រីវ័យក្រោម ៥០ឆ្នាំ

– ៥០% អាចកើតលើស្ត្រីវ័យចន្លោះ ៥០-៦៩ឆ្នាំ

– ២៨% អាចកើតលើស្ត្រីវ័យចន្លោះ ៦៩ឆ្នាំ ឡើងទៅ

១) កត្តាប្រឈម និងមូលហេតុ ដែលបណ្តាលឲ្យកើតមានមហារីកសុដន់លើស្ត្រី៖

ជំងឺមហារីកសុដន់ កើតឡើងពីការវិវត្តន៍ នៃកោសិកាក្រពេញដោះ។ កត្តាដែលអាចបង្កឲ្យមានជំងឺនេះរួមមាន៖

– កត្តាអ័រម៉ូនស្ត្រី: ស្ត្រីខ្លះឆាប់ពេញវ័យពេក (មុន១២ឆ្នាំ) និងស្ត្រីខ្លះទៀតអស់រដូវយូរពេក (ក្រោយ ៥៥ឆ្នាំ)

– ស្ត្រីដែលមានបុត្រទី១ ក្រោយអាយុ ៣០ឆ្នាំ

– ស្ត្រីដែលប្រើថ្នាំពន្យារការមានរដូវ

– បញ្ហាតំណពូជ

– របបចំណីអាហារ

• អ្នកមិនសូវទទួលទានបន្លែ

• អ្នកមិនបានហាត់កីឡា

• អ្នកធាត់ខ្លាំង

• អ្នកញាំស្រា ៥០០ml ក្នុងមួយថ្ងៃ

– ជក់បារី

– ប្រវត្តិក្រុមគ្រួសារ មានជំងឺមហារីកសុដន់ មហារីកដៃស្បូន (អត្រាអាចកើតជំងឺមហារីកសុដន់មានពី ២០%-៣០% ក្នុងលក្ខណៈតំណពូជ) ។

២) រោគសញ្ញា

– ដុំមួយ ឬច្រើននៅក្នុងសុដន់ ទំហំតូចឬធំគែមជុំវិញ ដុំមិនច្បាស់លាស់ រឆេងរឆូងមិនអាចរំកិលបានជាប់ស្អិតជាមួយសាច់ដុំ

– ស្បែកសុដន់រាងដូចសំបកក្រូច

– ក្បាលដោះផតចូលក្នុង

– ដោះប្រែប្រួលទំហំខុសធម្មតាខ្លាំង

– ចេញទឹកដោះលាយឈាម

– មានកូនកណ្តុរ នៅក្រោមក្លៀក

– សញ្ញាផ្សេងៗទៀត

ជួនកាលការធ្វើរោគវិនិច្ឆ័យ និងព្យាបាលយឺត នាំឲ្យដុំនោះអាចលូតលាស់រាលដាលទៅកន្លែងផ្សេង និងបណ្តាលឲ្យមានអាការៈក្អួតចង្អោរ ស្រកទម្ងន់ ស្បែកឡើងពណ៌លឿង ឈឺសន្លាក់ឆ្អឹង ឈឺក្បាល ក្អក។

“ ប្រសិនបើមានករណីសង្ស័យ ឬមានអាការៈដូចបានរៀបរាប់ខាងលើ មេត្តាប្រញាប់ជួបពិគ្រោះវេជ្ជបណ្ឌិតជំនាញរោគស្ត្រីនៅមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យ និងទទួលការព្យាបាលបានត្រឹមត្រូវ“៕

អត្ថបទ៖ រស្មី

សូមចុចអាន៖ ផលប៉ះពាល់ក្រពះពោះវៀន ដោយការប្រើប្រាស់ថ្នាំសសៃ

Related Topics:សុខភាព