៧ វិធី ការពារគ្រួសតម្រងនោម

គ្រួសក្នុងតម្រងនោមជាបញ្ហាសុខភាពមួយជះឥទ្ធិពលទៅលើមនុស្សប្រហែល ១២ភាគរយទូទាំងពិភពលោក ។ សម្រាប់អ្នកចង់កាត់បន្ថយហានិភ័យជំងឺគ្រួសតម្រងនោម ៧វិធី នេះជាអ្វីដែលអ្នកគួរដឹង ៖

១. ផឹកទឹកច្រើន

គ្រួសក្នុងតម្រងនោម ភាគច្រើនបណ្ដាលមកពីផឹកទឹកមិនគ្រប់គ្រាន់។ ពេលគ្មានទឹកបញ្ចេញសារជាតិរ៉ែនឹងផ្ដុំគ្នាបង្កទៅជាគ្រួស ។ ហើយទឹកដែលជួយការពារគ្រួសក្នុងតម្រងនោមរួមមាន ៖ ទឹកក្រូចឆ្មា ទឹកក្រូចស្រស់ និងស៊ុប ។

២. កាត់បន្ថយអាហារប្រៃ

អាហារទាំងនេះអាចរារាំងដល់ការស្រូបយកជាតិកាល់ស្យូមឡើងវិញនៅក្នុងតម្រងនោមដែលបង្កទៅជាគ្រួស ។ មនុស្សពេញវ័យគួរទទួលទានសូដ្យូមតិចជាង ២,៣០០មីលីក្រាម ក្នុងមួយថ្ងៃ ឬស្មើនឹងមួយស្លាបព្រាកាហ្វេ ។

៣. កំណត់ការទទួលទានប្រូតេអ៊ីនសត្វ

ប្រូតេអ៊ីនសត្វដូចជាសាច់ បសុបក្សី និងត្រី គឺជាប្រភពសម្បូរសារធាតុ purines ដែលជាសមាសធាតុបំបែកទៅជាអាស៊ីតអ៊ុយរិច ហើយនាំឱ្យកើតគ្រួសក្នុងតម្រងនោម បើសិនផ្ដុំគ្នាលើសកម្រិត ។

៤. ឈប់ប្រើថ្នាំមួយចំនួន

ថ្នាំបង្កឲ្យមានគ្រួសក្នុងតម្រងនោមមានដូចជា ថ្នាំបញ្ចុះទឹកនោម, ថ្នាំបញ្ចុះលាមក, ថ្នាំទប់ស្កាត់ប្រូតេអ៊ីន, ថ្នាំប្រឆាំងការប្រកាច់, និងថ្នាំស្ទេរ៉ូអ៊ីត ។

៥. ស្វែងរកថ្នាំបង្ការត្រឹមត្រូវ

អ្នកជំងឺមានគ្រួសក្នុងតម្រងនោមស្រាប់អាចប្រើថ្នាំបង្កាកុំមានឲ្យមានគ្រួសថ្មីៗ ចំណុចនេះត្រូវពិភាក្សាជាមួយគ្រូពេទ្យដើម្បីព្យាបាលទៅតាមប្រភេទគ្រួសរបស់អ្នក ។

៦. ប្រើរលកសំឡេង

ក្នុងករណីមានគ្រួសធំមួយក្នុងតម្រងនោម អ្នកមានហានិភ័យខ្ពស់ក្នុងការមានគ្រួសថ្មីណាស់ ។ វិធីព្យាបាលគ្រួសធំៗគឺ ការប្រើរលកសំលេងមកបំបែកគ្រួសឲ្យតូចៗបង្ហូរចេញតាមទឹកនោម ។

៧. ចៀសវាងអាហារបំប៉នវីតាមីនស៊ី

អ្នកគប្បីងាកមកស្រូបយកវីតាមីនស៊ីពីផ្លែឈើវិញដូចជា ផ្លែក្រូច ផ្លែបឺរី និងផ្លែស្វាយជាដើម ទើបមិនប្រឈមនឹងមានគ្រួសក្នុងតម្រងនោម ។ ជៀសវាងប្រើប្រាស់វីតាមីនស៊ីម្សៅ និងគ្រាប់ព្រោះ វាងាយប្រឈមមុខខ្ពស់នឹងគ្រួសក្នុងតម្រងនោម ៕

ប្រែសម្រួលដោយ ៖ វារី

ចុចអាន ៖ ហេតុអ្វី​បានជាអ្នក​កើត​ជំងឺ​គ្រួស​ក្នុង​បង្ហូរ​នោម​