មិននឹកស្មានថាការហែលទឹក មានប្រយោជន៍ច្រើនដល់ម្ល៉ឹង!

ការសិក្សាជាច្រើនបង្ហាញថា ការហែលទឹកមានអត្ថប្រយោជន៍យ៉ាងច្រើនសម្រាប់សុខភាពទូទៅរបស់យើង។ វាធ្វើឲ្យសុខភាពផ្លូវចិត្តនិងរាងកាយបាន​ប្រសើរ​ឡើង ព្រម​ទាំង​ជួយ​​ប្រ​ឆាំង​នឹងភាព​ចាស់ជាងវ័យផងដែរ។ មនុស្សភាគច្រើនយល់ឃើញថាការហែលទឹកគ្រាន់តែជាទម្រង់នៃការហាត់ប្រាណមួយប៉ុណ្ណោះ តែ​វា​ផ្ដល់​អត្ថ​ប្រយោជន៍​លើស​ពី​ការ​ស្មាន។ ខាងក្រោមនេះជា​អត្ថប្រយោជន៍ដ៏អស្ចារ្យមួយចំនួនដែល​បាន​មកពី​ការ​ហែល​ទឹក៖

អត្ថប្រយោជន៍ដល់បេះដូង

យោងតាមការស្រាវជ្រាវបានរកឃើញ ថាការហែលទឹកឬរត់មានផលល្អជាងគេក្នុងចំណោមប្រភេទនៃការ ហាត់ប្រាណ ទាំងអស់។ ការហែលទឹក គឺជាលំហាត់ប្រាណមួយដែលអាចជួយពង្រឹងបេះដូង បង្កើនលំហូរឈាមដើរ ល្អជម្រុញសុខភាពសរសៃឈាមបេះដូងទាំងមូលរបស់អ្នក។ គ្រាន់តែហែលទឹកកន្លះម៉ោងក្នុងមួយថ្ងៃអាចបន្ថយហានិភ័យនៃជំងឺបេះដូងបាន ៤០% ។

អត្ថប្រយោជន៍ដល់សួត

ការហែលទឹកអាចជួយបង្កើនសមត្ថភាពរបស់សួត និងជួយឱ្យសួតរបស់អ្នកស្រូបយកអុកស៊ីសែនបានច្រើន។ ក្រៅពីនេះ វាអាចជួយកាត់បន្ថយបញ្ហារបស់អ្នកជំងឺហឺតបានផងដែរ។

អត្ថប្រយោជន៍ដល់សន្លាក់

ការហែលទឹកមិនធ្វើឱ្យមានបញ្ហាលើសន្លាក់របស់យើងដូចការធ្វើលំហាត់ប្រាណដទៃទៀតឡើយ។ ជាពិសេស អ្នកដែលមានបញ្ហាជំងឺរលាកសន្លាក់នឹងទទួលបានអត្ថប្រយោជន៍ពីការហែលទឹកបានយ៉ាងខ្លាំង។ ការហែលទឹកនៅក្នុងអាងហែលទឹកដែលមានកម្តៅល្មម ជួយឱ្យសាច់ដុំនៅជុំវិញសន្លាក់កាត់បន្ថយនូវការរលាក ពិសេសមនុស្សវ័យចំណាស់ដែលងាយនឹងគ្រិច និងឈឺសាច់ដុំ។

អត្ថប្រយោជន៍ដល់សាច់ដុំ

ទឹកជួយបណ្តុះភាពស៊ាំទៅនឹងសាច់ដុំ។ ភាពស៊ាំដែលមាននៅក្នុងទឹក ជួយសម្រួលសាច់ដុំរបស់អ្នក និងផ្ដល់អត្ថប្រយោជន៍ជាច្រើនសម្រាប់អ្នកដែលមិនធ្វើលំហាត់ប្រាណទៀងទាត់ អ្នកធាត់ឬលើសទម្ងន់ និងមនុស្សចាស់។ ដើម្បីទទួលបានអត្ថប្រយោជន៍ដល់សាច់ដុំពីការហែលទឹក អ្នកត្រូវរៀនបច្ចេកទេសហែលទឹកឲ្យបានត្រឹមត្រូវ។

អត្ថប្រយោជន៍ដល់ផ្លូវចិត្ត

ការហែលទឹកគឺជាលំហាត់ប្រាណរាងកាយ ប៉ុន្តែមានអត្ថប្រយោជន៍ដល់សុខភាពផ្លូវចិត្តផងដែរ។ ។ ការហែលទឹកមានប្រយោជន៍ចំពោះផ្លូវចិត្តប្រហាក់ប្រហែលនឹងយូហ្គាដែរ។ វាជួយឲ្យអារម្មណ៍របស់អ្នកសប្បាយរីករាយនិងស្រស់ថ្លា។ គ្រាន់តែនៅក្នុងទឹក អាចធ្វើឲ្យខួរក្បាលយើងធូរស្បើយ និងជួយឲ្យមានការបញ្ចេញនូវអរម៉ូនអារម្មណ៍ល្អ ដែលជំរុញអារម្មណ៍របស់យើងឲ្យកាន់តែប្រសើរ។

ជួយប្រឆាំងភាពចាស់

ការសិក្សាបានបង្ហាញថា អ្នកហែលទឹកសកម្មមានសុខភាពជីវិតប្រសើរ ទាំងផ្នែករាងកាយនិងផ្លូវចិត្ត។ តាមការសិក្សាបង្ហាញទៀតថា មនុស្សដែលមិនចេះហែលទឹក សុខភាពរាងកាយរបស់ពួកទ្រុឌទ្រោមខ្លាំង បន្ទាប់ពីអាយុ៤៥ឆ្នាំ។ ទោះជាយ៉ាងណាក៏ដោយអ្វីដែលធ្វើឱ្យអ្នកស្រាវជ្រាវភ្ញាក់ផ្អើលបំផុត គឺភាពខុសគ្នានៃសុខភាពផ្លូវចិត្ត។ ប្រជាជនទូទៅដែលមិនមែនជាអ្នកហែលទឹក មានសុខភាពចុះខ្សោយស្ទើពេញជីវិតរបស់ពួកគេ ប៉ុន្តែអ្នកហែលទឹកសកម្ម មានសុខភាពល្អឡើងជាលំដាប់រហូតដល់អាយុលើសពី ៦៥ ឆ្នាំ៕

ប្រែសម្រួល៖ សន្យា

ចុចអាន៖ អត្ថប្រយោជន៍ដ៏អស្ចារ្យ ៧យ៉ាងពីការហាត់ Yoga

ចុចអាន៖ ពេលមេរោគបង្ខំាងយើងនៅផ្ទះ ស្ត្រេស? មានរឿងខ្លះយើងអាចធ្វើបាន!