ប្លុកទេសចរណ៍ដ៏ទាក់ទាញ ក្នុងរដូវកាលបៃតង

ដំណើរកម្សាន្តក្នុងរដូវកាលបៃតង ជាវេលាដែលទេសចរទទឹងរង់ចាំបំផុត ក៏ព្រោះតែទិដ្ឋភាពដ៏ស្រស់ត្រកាលនៃធម្មជាតិ ពិសេសតំបន់ព្រៃភ្នំ ក្នុងបណ្តាខេត្តទេសចរណ៍សក្តានុពលមួយចំនួននៅកម្ពុជា ពិសេស កោះកុង កំពត-កែប សៀមរាប ពោធិ៍សាត់ មណ្ឌលគីរី និងកំពង់ស្ពឺ ជាដើម ដែលសុទ្ធសឹងជាខេត្តមានសក្តានុពលទេសចរណ៍បំផុត ក្នុងរដូវកាលនេះ។

ក្នុងចំណោមខេត្តទាំងអស់របស់កម្ពុជា ដ្បិត កំពត-កែប និងកំពង់ស្ពឺ ជាតំបន់ទេសចរណ៍ដ៏ពេញនិយម និងអំណោយផលខ្លាំងសម្រាប់ទេសចរក្នុងការធ្វើដំណើរ ប៉ុន្តែខេត្តមួយចំនួនទៀត ក៏ទាក់ទាញទេសចរជាតិ និងអន្តរជាតិមិនធម្មតាដែរ តាមរយៈទេសចរណ៍ធម្មជាតិ។ ដូចនេះ កម្ពុជាថ្មី សូមលើកយកខេត្តទេសចរណ៍ ដែលគេពេញនិយមទៅកម្សាន្តខ្លាំងក្នុងរដូវកាលបៃតងនេះ។

១. កំពត-កែប
ទឹកដីទេសចរណ៍ដ៏ទាក់ទាញបំផុតរបស់កម្ពុជា ដែលអំណោយផលខ្លាំងពីធម្មជាតិ អាចផ្តល់ជូនការសម្រាកលំហែកាយដ៏ពេញលេញមួយសម្រាប់ទេសចរ ដូចជា៖
– សកម្មភាពកម្សាន្ត៖ ទេសចរអាចកម្សាន្តអារម្មណ៍ដោយការជិះទូកកម្សាន្តតាមដងព្រែកកំពត ជិះម៉ូតូទឹក និងកាយ៉ាក ឬអាចជិញទូកក្តោងនៅឆ្នេរកែបជាដើម។ ក្រៅពីនេះ នៅអាចរីករាយជាមួយនឹងការចាប់សត្វសមុត្រ នៅតំបន់ដ៏ពេញនិយមនៃខេត្តកែប “ឆ្នេរអង្កោល” ឬតំបន់កោះ, ទស្សនាព្រៃកោងកាង, ងូតទឹកកម្សាន្ត (សមុទ្រ; ទឹកជ្រោះ ឬទឹកឈូ), កម្សាន្តក្នុងល្អាងភ្នំ (ភ្នំទឹកធំ និង ភ្នំកំពង់ត្រាច) ឬជិះរទះភ្លើងរត់លើផ្លូវតូលនៅទំនប់ម្លិចជាដើម។   

– ការកម្សាន្តបែបពិកនិក៖ ទេសចរ អាចស្វែងរកការកម្សាន្តបែបពិចនិកតាមតំបន់ឆ្នេរ ឬ Resort នានាតាមបណ្តោយដងព្រែកកំពត ភ្នំ ឬតំបន់កោះក្នុងខេត្តកែប ទៅតាមចំណង់ចំណូលចិត្តរៀងខ្លួន។

២. កំពង់ស្ពឺ
គ្មានសមុទ្រ គ្មានការកម្សាន្តច្រើនសម្បូរបែបដូចកំពត-កែប ប៉ុន្តែកំពង់ស្ពឺមានតំបន់ទេសចរណ៍ដ៏ទាក់បំផុតមួយគឺ ឧទ្យានជាតិព្រះសុរាម្រិតកុសុមៈគិរីរម្យ ដែលទាក់ទាញទេសចរជាតិ-អន្តរជាតិរៀងរាល់សប្តាហ៍ ក៏ព្រោះតែសម្រស់នៃធម្មជាតិ និងប្លុកកម្សាន្តប្លែកភ្នែកជាច្រើនកន្លែងលើខ្នងភ្នំដ៏ធំមួយនេះ។

ក្រៅពីនេះ កំពង់ស្ពឺ នៅមានកន្លែងទាក់ទាញទេសចរណ៍ផ្សេងទៀត ដែលភាគច្រើនជាតំបន់ភ្នំ ដូចជា ខ្នងផ្សារ, តំបន់ភ្នំឱរ៉ាល់, តំបន់ទឹកធ្លាក់ជ្រាវ និងសហគមន៍ទេសចរណ៍ធម្មជាតិទឹកធ្លាក់ចំបក់ជាដើម ខណៈនៅមានការតាមតំបន់ជើងភ្នំដូចជា ទំនប់ស្លា, កន្លែងប្រណាំងឡាន ម៉ុងរិទ្ធីសែនជ័យ (ក្រៅពីអាចជិះប្រណាំងកម្សាន្ត នៅអាចលំហែរកាយគយគន់ទេសភាពថែមទៀត)។ ក្រៅពីនេះ នៅមានតំបន់ទេសចរណ៍ផ្សេងៗដូចជា តេទឹកពុះ, ទំនប់ស្លា និងរមណីយដ្ឋាន​អំពែភ្នំជាដើម។

៣. ពោធិ៍សាត់
បើនិយាយពីតំបន់ភ្នំធម្មជាតិ ស្រុកវាលវែង ជាតំបន់ទេសចរណ៍ដ៏មានសក្តានុពលមួយរបស់ខេត្តពោធិ៍សាត់ ដែលអាចទាក់ទាញទេសចរកម្សាន្តច្រើនបំផុត ដោយសារតែសម្រស់ព្រៃភ្នំធម្មជាតិ និងជ្រលងដងអូច្រើនកន្លែង ម៉្យាងតំបន់កម្សាន្តនីមួយៗ មិនសូវជានៅឆ្ងាយពីគ្នាប៉ុន្មានឡើយ។  

៤. សៀមរាប
មិនមែនតែកំឡុងខែវស្សាទេ ទឹកដីផ្សារភ្ជាប់ប្រវត្តិសាស្ត្រមួយនេះ តែងទាក់ទាញទេសចរជាតិ-អន្តរជាតិ មិនជិនណាយសោះឡើយ។ ក្រៅពីទស្សនាស្វែងយល់សំណង់បុរាណ សិល្បៈវប្បធម៌ អរិយធម៌ ទេសចរអាចស្វែងរកការកម្សាន្តជាច្រើនផ្សេងទៀត នៅតាមរមណីយដ្ឋាន ដូចជាទទួលទានអាហារប្រចាំតំបន់, ជិះខ្សែរ៉ត, កម្សាន្តទឹកជ្រោះ, ពិចនិក, ទស្សនាស្វែងយល់ក្នុងសារមន្ទីរនានា, កម្សាន្តក្នុងឧទ្យាននានា, មើលថ្ងៃរះ និងថ្ងៃលិច ពិសេសកម្សាន្តអារម្មណ៍ជាមួយការជិះទូកតាមព្រៃលិចទឹក នៅសហគមន៍ភូមិកំពង់ភ្លុក។

៥. មណ្ឌលគិរី
ដ្បិតឆ្ងាយជាងសៀមរាប និងមានចម្ងាយជាង ៣៨០គីឡូម៉ែត្រពីក្រុងដ៏សុីវិល័យ តែមណ្ឌលគិរី ទាក់ទាញទេសចររៀងរាល់រដូវ ពិសេសរដូវធ្លាក់ភ្លៀង ក៏ព្រោះតែខេត្តដែលប្រជុំដោយភ្នំតូចៗមួយនេះ កំពុងក្រាលគ្របដោយទេសភាពបៃតងបីគេគូរ។ ពិសេសពេលអ័ព្ទផ្សែងក្រាលលើតំបន់ព្រៃក្រាសនាព្រឹកព្រហាម ធ្វើឱ្យទិដ្ឋភាពកាន់តែវិសេសវិសាលក្រៃ ដូចឋានសួគ៌លើកលោកិយ។ ទេសចរអាចកម្សាន្តបែបនិក គយគន់ធម្មជាតិ សោយសុខនឹងភាពស្ងប់ស្ងាត់បានតាមចំណូលចិត្ត។

ជាមួយគ្នានេះ ក៏នៅមានតំបន់ទេសចរណ៍ទាក់ទាញធម្មជាតិផ្សេងទៀតរបស់ខេត្តព្រះវិហារ និងរតនគិរី។ ដ្បិតអី ខេត្តទាំងនេះ មិនត្រឹមតែជាទឹកដីផ្សារភ្ជាប់ប្រវត្តិសាស្ត្រប៉ុណ្ណោះទេ នៅជាទីពេញនិយមសម្រាប់ដំណើរកម្សាន្តបែបធម្មជាតិ ពិសេសលើខ្នងភ្នំត្បែង សម្រាប់ដំណើរកម្សាន្តបែបផ្សងព្រេងថែមទៀត។

ក្រៅពីខេត្តនៃតំបន់ភ្នំ និងធម្មជាតិខាងលើ ក៏នៅមានខេត្តតំបន់សមុទ្រ ដូចជា កោះកុង និង ព្រះសីហនុ ដែលទេសចរកម្រខកខាន។ តែទោះជាទេសភាពរដូវបៃតងនេះ លើកសម្រស់កោះយ៉ាងណាក៏ដោយ ចំពោះការធ្វើដំណើរកម្សាន្តតំបន់កោះ ត្រូវពឹងផ្អែកលើស្ថានភាពអាកាសធាតុខ្លាំង៕