ព័ត៌មានជាតិ

អភិបាលរងរាជធានី ស្នើខណ្ឌសង្កាត់ រៀបចំផែនការគម្រោងកម្មវិធីវិនិយោគបីឆ្នាំរំកិល ទៅប្រើឱ្យចំគោលដៅ

បានផុស

៩ ខែ មុន

នៅ

ថ្ងៃពុធ ៨ តុលា ២០២៥

ដោយ

លោកឯក ឃុនដឿន អភិបាលរងរាជធានីភ្នំពេញបានស្នើឱ្យអាជ្ញាធរខណ្ឌ សង្កាត់ ចេះច្នៃប្រឌិត រៀបចំផែនការ ក្នុងការយកថវិកា ពីគម្រោងកម្មវិធីវិនិយោគបីឆ្នាំរំកិល យកទៅប្រើប្រាស់ឱ្យចំគោលដៅ និងមានប្រសិទ្ធភាព ទៅតាមការចង់បានរបស់ប្រជាពលរដ្ឋនៅក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើបែបនេះរបស់លោកឯក ឃុនដឿន បានធ្វើឡើង ខណៈលោកអញ្ជើញជាអធិបតីតំណាងលោកឃួង ស្រេង អភិបាលរាជធានីភ្នំពេញ ក្នុងអង្គសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល ២០២៦-២០២៨ របស់សង្កាត់ ខណ្ឌ នាព្រឹកថ្ងៃទី០៨ តុលាឆ្នាំ២០២៥នេះ នៅសាលាខណ្ឌទួលគោក។

លោកឯក ឃុនដឿន បានមានប្រសាសន៍លើឡើងថា អាជ្ញាធរខណ្ឌ សង្កាត់ ត្រូវចេះច្នៃប្រឌិត ក្នុងការរៀបចំផែនការ ដើម្បីយកថវិកា ពីគម្រោងកម្មវិធីវិនិយោគបីឆ្នាំរំកិលទៅប្រើប្រាស់ឱ្យចំគោលដៅ និងមានប្រសិទ្ធភាព ពិសេសគឺឱ្យចំគោលដៅ ដែលប្រជាពលរដ្ឋចង់បាន។ មិនមែនធ្វើឱ្យតែរួចៗខ្លួននោះទេ លោកឯក ឃុនដឿន បានលើកជាឧទាហរណ៍ថា យើងមិនអាចយកថវិកា ពីគម្រោងកម្មវិធីវិនិយោគបីឆ្នាំរំកិល ទៅប្រើប្រាស់តែលើការស្ថាបនាផ្លូវតែមួយខ្សែ ហើយអស់ថវិកានោះទេ យើងត្រូវចេះច្នៃប្រឌិត និងគិតគូរឱ្យបានគ្រប់ជ្រុងជ្រោយពីការប្រើប្រាស់ថវិកាទាំងនេះ។មិនមែនសូម្បីតែ ត្រូវការស្តារលូរំដោះការលិចលង់នៅក្នុងមូលដ្ឋាន ក៏យើងមិនមានថវិកាក្នុងការស្តារនោះទេ។

លោកឯក ឃុនដឿន បានមានប្រសាសន៍ទៀតថា ការរៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល ២០២៦-២០២៨ របស់សង្កាត់ ខណ្ឌនេះឡើង មានគោលបំណង ដើម្បីផ្សព្វផ្សាយគម្រោងវិនិយោគជាអាទិភាពឆ្នាំ២០២៥ របស់រដ្ឋបាលខណ្ឌ ផ្សព្វផ្សាយគម្រោងវិនិយោគជាអាទិភាពឆ្នាំ២០២៦ របស់រដ្ឋបាលសង្កាត់ និងការស្នើសុំការគាំទ្រគម្រោង ពីមន្ទីរ អង្គភាពជំនាញ អង្គការដៃគូអភិវឌ្ឍន៍នានា វិស័យឯកជន និងសប្បុរសជន ដើម្បីគាំទ្រគម្រោងអភិវឌ្ឍន៍របស់សង្កាត់ និងខណ្ឌ។

លោកបន្តថា ជារៀងរាល់ឆ្នាំ នៅតាមសាលាខណ្ឌនីមួយៗ តែងតែបាន រៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលរបស់សង្កាត់ ខណ្ឌ តាមការណែនាំរបស់ថ្នាក់ជាតិ ហើយឆ្នាំនេះសិក្ខាសាលាសមាហរណកម្មបានចាប់ផ្តើមពី ថ្ងៃទី៦ ដល់ថ្ងៃទី១៦ ខែតុលា ឆ្នាំ២០២៥ នៅតាមសាលាខណ្ឌនីមួយៗ។

លោកឯក ឃុនដឿន បន្តថា ការអនុវត្តគម្រោងនៅមូលដ្ឋានពិតជាត្រូវការការចូលរួមដោយខ្វះមិនបានពីតួអង្គសង្គមពាក់ព័ន្ធនានា ដែលរួមមាន មន្ទីរជំនាញ, សមាគម-អង្គការសង្គមស៊ីវិល ដៃគូអភិវឌ្ឍ វិស័យឯកជន ក៏ដូចជាសប្បុរសជនផងដែរ។

លោក ចាន់ បណ្ឌិត អភិបាលរងខណ្ឌទួលគោក ក្នុងឱកាសនោះ ក៏បានមានប្រសាសន៍លើកឡើងដែរថា សិក្ខាសាលាសមាហរណកម្មនៃកម្មវិធីវិនិយោគបីឆ្នាំរំកិល២០២៦-២០២៨ របស់សង្កាត់ ខណ្ឌ បានរៀបចំឡើង ស្របតាមផែនការអភិវឌ្ឍន៍៥ឆ្នាំ ទាំងរបស់សង្កាត់ និងខណ្ឌ ដែលចាំបាច់ត្រូវមានការចូលរួមគាំទ្រពី សំណាក់ដៃគូអភិវឌ្ឍន៍ វិស័យឯកជន និងសប្បុរសជននានា ដើម្បីឱ្យគម្រោងដែលបានរៀបចំ ឆ្លុះបញ្ចាំងពីតម្រូវការជាអាទិភាពនៅថ្នាក់មូលដ្ឋាន។

ការរៀបចំគម្រោងផែនការអភិវឌ្ឍន៍ ខណ្ឌ និងសង្កាត់ ទទួលបានជោគជ័យ លុះត្រាតែមានការចូលរួម និងគាំទ្រពីប្រជាពលរដ្ឋក្នុងមូលដ្ឋាន មន្ទីរ អង្គភាពជំនាញ ដៃគូអភិវឌ្ឍន៍ វិស័យឯកជន និងសប្បុរសជននានា។

គួរបញ្ជាក់ថា ការអនុវត្តគម្រោងកម្មវិធីវិនិយោគបីឆ្នាំរំកិល របស់រដ្ឋបាលខណ្ឌទួលគោក ដែលទទួលបានការគាំទ្រក្នុងសិក្ខាសាលាសមាហរណកម្មឆ្នាំ២០២៤ ដែលបានអនុវត្តឆ្នាំ២០២៥នេះ និងគម្រោងជា អាទិភាពសម្រាប់ឆ្នាំ២០២៦ ទទួលបានការគាំទ្រសរុបចំនួន ៨៥ គម្រោង អនុវត្តសម្រេចបាន ៨៣គម្រោងស្មើ៩៧,៦% ក្នុងនោះរួមមាន៖ ផ្នែកសេដ្ឋកិច្ចចំនួន ២០ គម្រោង លើ ២១គម្រោង។

ផ្នែកសង្គមកិច្ចចំនួន ២៩ គម្រោង លើ ២៩គម្រោង។

ផ្នែកធនធានធម្មជាតិ បរិស្ថាន និងការប្រែប្រួលអាកាសធាតុ ចំនួន១៤ គម្រោង លើ ១៥ គម្រោង។

ផ្នែករដ្ឋបាល និងសន្តិសុខសណ្តាប់ធ្នាប់សាធារណៈ

ចំនួន២០គម្រោង លើ២០គម្រោង។

គម្រោងជាអាទិភាព ឆ្នាំ២០២៦ មានចំនួន ៨៥គម្រោង ក្នុងនោះរដ្ឋបាលខណ្ឌមានថវិកាគាំទ្រ ចំនួន ២៤គម្រោង និងគម្រោងដែលត្រូវដាក់ស្នើសុំការគាំទ្រនៅក្នុងសិក្ខាសាលាសមាហរណកម្មនាពេលនេះ មានចំនួន៥៩គម្រោង ក្នុងនោះរួមមាន៖ ផ្នែកសេដ្ឋកិច្ចចំនួន២២ គម្រោង,ផ្នែកសង្គមកិច្ចចំនួន ២៨គម្រោង,ផ្នែកគ្រប់គ្រងដីធ្លីធនធានធម្មជាតិបរិស្ថានចំនួន ១៦គម្រោង,ផ្នែកសេវាកម្ម រដ្ឋបាល និងសន្តិសុខចំនួន ១៩គម្រោង៕

ដោយ ៖ ស្រីរ័ត្ន