ក្រសួងយុត្តិធម៌ស្នើកិច្ចសហការគាំទ្របន្ថែមពី UNDP ក្នុងការកែទម្រង់ប្រព័ន្ធយុត្តិធម៌នៅកម្ពុជា

រដ្ឋមន្ត្រីក្រសួងយុត្តិធម៌ស្នើកិច្ចសហការគាំទ្របន្ថែមទៀតពីស្ថាប័ន UNDP ក្នុងការពង្រឹងប្រសិទ្ធភាព និងការកែទម្រង់ប្រព័ន្ធយុត្តិធម៌នៅកម្ពុជា។ ការស្នើរបស់រដ្ឋមន្ត្រីយុត្តិធម៌ បានធ្វើឡើងក្នុងជំនួបជាមួយយលោក Enrico Gaveglia អ្នកតំណាងកម្មវិធីអភិវឌ្ឍន៍សហប្រជាជាតិថ្មី (UNDP) ប្រចាំនៅកម្ពុជា។

ក្នុងជំនួបដែលបានធ្វើឡើងកាលពីថ្ងៃទី៩ ខែតុលា ឆ្នាំ២០២៥ នៅទីស្តីការក្រសួងយុត្តិធម៌ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងលោក Enrico Gaveglia បានផ្ដោតការពិភាក្សាអំពីកិច្ចសហការរវាងក្រសួងយុត្តិធម៌ និង UNDP ពាក់ព័ន្ធនឹងការពង្រឹងប្រសិទ្ធភាពនៃប្រព័ន្ធយុត្តិធម៌នៅកម្ពុជា ដើម្បីលើកកម្ពស់នីតិរដ្ឋ អភិបាលកិច្ចល្អ និងការបង្កើនជំនឿទុកចិត្តរបស់ប្រជាពលរដ្ឋលើប្រព័ន្ធយុត្តិធម៌ ពិសេសលើការកែទម្រង់ច្បាប់ និងប្រព័ន្ធយុត្តិធម៌ ដែលស្របនឹងយុទ្ធសាស្រ្តបញ្ចកោណរបស់រាជរដ្ឋាភិបាកកម្ពុជា។

លោក កើត រិទ្ធ បានអរគុណចំពោះ UNDP ដែលបន្តផ្ដល់ជំនួយ និងផ្តល់កិច្ចសហការយ៉ាងល្អប្រសើរ និងជាដៃគូយ៉ាងជិតស្និទ្ធជាមួយក្រសួងយុត្តិធម៌ ក៏ដូចជាក្រសួង ស្ថាប័នដទៃទៀតរបស់រាជរដ្ឋាភិបាលកម្ពុជា។ លោក ថា នេះគឺជាការរួមចំណែកយ៉ាងសំខាន់ក្នុងការសម្រេចសមិទ្ធផលការងារជាអាទិភាពជាច្រើនក្នុងបុព្វហេតុនៃការអភិវឌ្ឍរបស់កម្ពុជា។

ផ្អែកលើភាពជាដៃគូដ៏ល្អនេះ លោករដ្ឋមន្ត្រីក្រសួងយុត្តិធម៌ បានសម្តែងនូវការសង្ឃឹមជឿជាក់ថា ក្នុងអាណត្តិបេសកកម្មថ្មីរបស់លោក Enrico Gaveglia នៅកម្ពុជា UNDP នឹងបន្តសហការគាំទ្រយ៉ាងសកម្មបន្ថែមទៀតចំពោះកិច្ចការងារកែទម្រង់ប្រព័ន្ធយុត្តិធម៌របស់រាជរដ្ឋាភិបាល។

លោក បានសង្កត់ធ្ងន់ដល់កិច្ចសហប្រតិបត្តិការលើជំនួយផ្នែកច្បាប់ កិច្ចសហប្រតិបត្តិការពាក់ព័ន្ធនឹងអាជ្ញាធរជាតិដោះស្រាយវិវាទក្រៅប្រព័ន្ធតុលាការ ការលើកកម្ពស់សមត្ថភាពធនធានមនុស្សក្នុងវិស័យយុត្តិធម៌ និងលទ្ធភាពសហការគ្នាក្នុងកិច្ចការផ្សេងៗទៀតសំដៅគាំទ្រគោលនយោបាយកំណែទម្រង់របស់រាជរដ្ឋាភិបាល និងលើកកម្ពស់គោលការណ៍នីតិរដ្ឋនៅកម្ពុជា៕