ព័ត៌មានជាតិ

អ្នកនាំពាក្យក្រសួងការងារថាកម្ពុជានៅសល់ការងាររាប់សិបម៉ឺនកន្លែងទៀត

បានផុស

៧ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

អ្នកនាំពាក្យក្រសួងការងារលោក ស៊ុន មេសា បានលើកឡើងថាកម្ពុជាឆ្នាំ២០២៥មិនមែនជាកម្ពុជាកាលពី៣០ឆ្នាំមុននោះទេ។ លោកបញ្ជាក់ថាបច្ចុប្បន្នកម្ពុជានៅសល់កន្លែងការងាររាប់សិបម៉ឺនកន្លែងទៀតដែលក្រសួងកំពុងធ្វើការផ្សព្វផ្សាយនិងសម្របសម្រួលពលរដ្ឋឱ្យទទួលបានការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងកិច្ចសម្ភាសន៍ជាមួយកម្ពុជាថ្មីកាលពីថ្ងៃទី១១ ខែវិច្ឆិកា ឆ្នាំ២០២៥ លោក ស៊ុន មេសា បានបញ្ជាក់ថា គ្រាន់តែតួលេខដែលក្រុមហ៊ុនសហគ្រាសបានចុះជាមួយក្រសួងដើម្បីប្រកាសរកកម្មករនិយោជិកពេលនេះគឺនៅសល់ជាង៧ម៉ឺន៥ពាន់នាក់ទៀត ខណៈក្នុងរយៈពេល១០ខែមកនេះមានរោងចក្រសហគ្រាសដែលបានគ្រោងបើកថ្មីនៅកម្ពុជានាឆ្នាំបន្ទាប់ជាង៥០០រយ ដែលនឹងបង្កើតការងារជូនពលរដ្ឋដល់ទៅជាង៤០ម៉ឺនកន្លែងបន្ថែមទេ។ នេះនៅមិនទាន់រាប់ដល់ការរើសបុគ្គលិកនៅតាមហាងលក់ដូរ និងអាជីវកម្មនៃអ្នកសេដ្ឋកិច្ចក្រៅប្រព័ន្ធនៅឡើយទេ។

លោកថា៖ «យើងមិនខ្វះការងារជូនបងប្អូនប្រជាពលរដ្ឋទេ! កម្ពុជាឆ្នាំ២០២៥មិនមែនជាកម្ពុជាឆ្នាំ១៩៨០ ឬឆ្នាំ១៩៩០ទេ ឱកាសការងារយើងច្រើន។ អ្វីដែលសំខាន់មានចំណេះ មានជំនាញ និយាយភាសាសាមញ្ញមានកម្លាំង នោះការងារសំបូរបែប»។

ដើម្បីបំពេញតម្រូវការងារក្នុងស្រុក ជាពិសេសដើម្បីជួយដល់ពលករចំណាកស្រុកដែលមកពីប្រទេសថៃនៅក្នុងខេត្តបាត់ដំបង បន្ទាយមានជ័យ និងសៀមរាប ចាប់ពីថ្ងៃទី១៦ ដល់៣០វិច្ឆិកា ក្រសួងការងារនិងចុះទៅធ្វើពិព័រណ៍ការងារក្នុងខេត្តទាំងបីដើម្បីផ្ដល់ឱកាសការងារ ការអប់រំបច្ចេកទេស និងវិជ្ជាជីវៈ ព្រមទាំងអត្ថប្រយោជន៍នៃរបបសន្តិសុខសង្គម ដល់ពលរដ្ឋក្នុងខេត្តទាំងបីនេះទៀតផងដែរ។

តាមគម្រោងគឺនៅថ្ងៃទី១៦ និង១៧ ខែវិច្ឆិកា រៀបចំនៅបាត់ដំបង ថ្ងៃទី២២ និង២៣ ខែវិច្ឆិកា រៀបចំនៅខេត្តបន្ទាយមានជ័យ និងថ្ងៃទី២៩ និង៣០ រៀបចំនៅខេត្តសៀមរាប។

អ្នកនាំពាក្យក្រសួងការងារលោក ស៊ុន មេសា បានអំពាវនាវដល់ពលរដ្ឋឱ្យចូលរួមឱ្យបានកុះករដើម្បីទទួលបានព័ត៌មានពីការងារ ការយល់ដឹងពីសេវារបបសន្ដិសុខសង្គម និងធ្វើសម្ភាសន៍ផ្ទាល់នៅទីនោះតែម្ដង។ លោកសុំឱ្យពលរដ្ឋត្រៀមតែអត្តសញ្ញាណប័ណ្ណ ឬលិខិតបញ្ជាក់កំណើតប៉ុណ្ណោះ។

លោកបញ្ជាក់ថា៖ «អ្វីដែលយើងត្រូវការពីបងប្អូនទាំងអស់គ្នាសុំតែបងប្អូនចូលរួម! អ្វីៗគឺថ្នាក់ក្រសួង អាជ្ញាធរមូលដ្ឋាន អ្នកពាក់ព័ន្ធទាំងអស់បានត្រៀមរួចជាស្រេចហើយបាទ»។

លោកបន្ថែមថា៖ «ជាទឹកចិត្តរបស់សម្ដេចនាយករដ្ឋមន្ត្រីចង់ឱ្យបងប្អូនយើងមានការងារធ្វើ បងប្អូនអាចរស់បានកាន់តែប្រសើរ មានជំនាញដែលបងប្អូនអាចរស់បាន ពេលនោះហើយជីវភាពបងប្អូនក៏រីកចម្រើន សេដ្ឋកិច្ចកម្ពុជាក៏រីកចម្រើនបន្ថែមទៀត។ ខ្ញុំអាចនិយាយបានថាបងប្អូនគឺជាដុំមាសរបស់កម្ពុជាហើយពេលនេះដុំមាសនេះបានវិលត្រលប់មកកម្ពុជាវិញហើយ យើងត្រូវតែកែច្នៃដុំមាសនោះឱ្យមានតម្លៃ ព្រោះគាត់មានជំនាញ គាត់ជាកម្លាំងពលកម្មពេញវ័យ គាត់គឺជាអ្នករួមចំណែកកសាងសង្គមជាតិរបស់យើង»។

បើតាមលោក ស៊ុន មេសា យុទ្ធនាការផ្សព្វផ្សាយឱកាសការងារនេះបានរៀបចំតាំងពីខែមិថុនាមកម្ល៉េះដែលរួមមានទាំងការតាំងពិព័រណ៍ផង ការចុះទៅតាមភូមិឃុំផងដែរ។ លោកថាយន្តការនេះមិនមែនជាយន្តការភ្លើងចំបើងនោះទេ គឺជាយន្តការភ្លៀងរលឹមដែលធ្វើរហូតជាមួយនឹងផែនការច្បាស់លាស់៕

អត្ថបទដោយ ហ៊ុន សិរីវឌ្ឍន៍

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា