ព័ត៌មានជាតិ

អាជ្ញាធរខណ្ឌកំបូល បន្តចុះរៀបចំសណ្ដាប់ធ្នាប់សាធារណៈ ណែនាំអាជីវករលក់ដូរចល័តតាមរ៉ឺម៉ករទេះ នៅផ្លូវជាតិលេខ ៤

បានផុស

៧ ខែ មុន

នៅ

ថ្ងៃពុធ ១៩ វិច្ឆិកា ២០២៥

ដោយ

កាលពីព្រឹកថ្ងៃទី ១៨ ខែវិច្ឆិកា ឆ្នាំ ២០២៥ លោក ទ្រី ណារ៉េត អភិបាលរង នៃគណៈអភិបាលខណ្ឌកំបូល បានដឹកនាំកម្លាំងអធិការនគរបាលខណ្ឌ មន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ រួមទាំងអាជ្ញាធរសង្កាត់ ចុះអធិការកិច្ចត្រួតពិនិត្យ និងរៀបចំសណ្ដាប់ធ្នាប់សាធារណៈតាមបណ្ដោយផ្លូវជាតិលេខ ៤ ក្នុងភូមិសាស្ត្រសង្កាត់កន្ទោក និង សង្កាត់កំបូល ខណ្ឌកំបូល រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទ្រី ណារ៉េត អភិបាលរងខណ្ឌ បានឱ្យដឹងថា សកម្មភាពនេះ ចំណុចសំខាន់ៗ ដូចជា ការរៀបចំសណ្ដាប់ធ្នាប់លើចិញ្ចើមផ្លូវ និងលើសួនច្បារសាធារណៈ ដែលក្លាយជាកន្លែងលក់ដូររបស់អាជីវករចល័តជាយូរមក។ កម្លាំងបានផ្សព្វផ្សាយ និងណែនាំឲ្យប្រជាពលរដ្ឋ និងអាជីវករលក់ដូរតាមរទេះ–រ៉ឺម៉ក កុំឱ្យរំខានដល់ចរាចរណ៍ ការរស់នៅ និងសណ្ដាប់ធ្នាប់សាធារណៈ។

លោក ទ្រី ណារ៉េត បានរំលឹកក្នុងឱកាសនេះថា ការរក្សាសណ្ដាប់ធ្នាប់សាធារណៈ និងទ្រព្យសម្បត្តិសាធារណៈ គឺជាកាតព្វកិច្ចរួមរបស់រដ្ឋ និងប្រជាពលរដ្ឋទាំងអស់។ លោក បានអំពាវនាវឲ្យអាជីវករ និងប្រជាជន បន្តសហការយ៉ាងល្អ ដើម្បីជួយបង្កើនសុវត្ថិភាពក្នុងការធ្វើចរាចរណ៍។

លោក ឈុន វិជ្ជា ជាពលរដ្ឋរស់នៅសង្កាត់កន្ទោក បានលើកឡើងថា ការចុះត្រួតពិនិត្យរបស់អាជ្ញាធរគឺល្អណាស់ ជួយឲ្យមានសណ្ដាប់ធ្នាប់កាន់តែប្រសើរ។ ពលរដ្ឋភាគច្រើន ក៏ពេញចិត្ត ព្រោះចរាចរណ៍កាន់តែធូរស្រាល មើលទៅស្អាតស្រួលភ្នែកជាងមុន។ លោក ក៏សង្ឃឹមថា អាជ្ញាធរ នឹងបន្តធ្វើការនេះជាប្រចាំដែរ៕

អត្ថបទ ៖ សំណាង