ព័ត៌មានជាតិ

មន្ត្រីជាន់ខ្ពស់ក្រសួងព័ត៌មាន ជំរុញ លោកគ្រូ អ្នកគ្រូ អាណាព្យាបាល បន្តអប់រំយុវជនកុំឲ្យប្រើប្រាស់បារីអេឡិចត្រូនិក

បានផុស

៦ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

ថ្លែងបើកយុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន នៅខេត្តសៀមរាប នាថ្ងៃទី ២៨ ខែវិច្ឆិកា ឆ្នាំ ២០២៥ នេះ លោក កៅ អ៉ីមរ៉ន រដ្ឋលេខាធិការក្រសួងព័ត៌មាន បានជំរុញ លោកគ្រូ អ្នកគ្រូ និងអាណាព្យាបាល បន្តផ្សព្វផ្សាយ អប់រំ និងណែនាំយ៉ាងទូលំទូលាយដល់សិស្សានុសិស្ស ជាពិសេសយុវជន កុំឲ្យប្រើប្រាស់បារីអេឡិចត្រូនិក (Vape) និងស៊ីហ្សា ដែលអាចប៉ះពាល់យ៉ាងធ្ងន់ធ្ងរដល់សុខភាព និងប្រព័ន្ធប្រសាទរបស់យុវវ័យជាទំពាំងស្នងឫស្សី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កៅ អ៉ីមរ៉ន បានបញ្ជាក់ថា សម្រាប់យុទ្ធនាការដ៏មានសារៈសំខាន់នេះ រៀបចំឡើងក្នុងគោលបំណងបំផុសចលនាឲ្យសកម្មក្នុងសហគមន៍ ដើម្បីចូលរួមជាមួយរាជរដ្ឋាភិបាល ក្នុងការអប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀន។ យុទ្ធនាការនេះដែរ ក៏ជាការជំរុញស្មារតី និងចលនាជាតិតែមួយ ដើម្បីចូលរួមផ្សព្វផ្សាយ អប់រំ ឲ្យបានសកម្មគ្រប់មជ្ឈដ្ឋាន អំពីផលប៉ះពាល់ នៃគ្រឿងញៀន ដោយម្នាក់ៗ មិនត្រូវពាក់ព័ន្ធនឹងគ្រឿងញៀន។

លោករដ្ឋលេខាធិការ ក៏បានណែនាំដល់គ្រប់អាជ្ញាធរពាក់ព័ន្ធក្នុងមូលដ្ឋាន និងប្រជាពលរដ្ឋគ្រប់រូប ជាពិសេសយុវជន ចូលរួមទាញយក និងប្រើប្រាស់កម្មវិធីទូរស័ព្ទដៃ NoDrug សម្រាប់ជាបណ្ដុំ នៃមេរៀនសំខាន់ៗ និងជាមធ្យោបាយរាយការណ៍ដ៏សម្ងាត់បំផុតអំពីករណីប្រើប្រាស់ និងចែកចាយគ្រឿងញៀនដ៏មានប្រសិទ្ធភាព។ ជាពិសេសជាងនេះទៀត ការបន្តចូលរួមទប់ស្កាត់ខ្សែរយៈចែកចាយទៅក្នុងសហគមន៍ និងជនបទ ដោយឈរលើគោលការណ៍ ៣ កុំ ១ រាយការណ៍ គឺ កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍។

លោក ក៏បានលើកទឹកចិត្តឲ្យវិស័យឯកជនក្នុងមូលដ្ឋាន ចូលរួមឲ្យបានផុសផុលលើការងារលើកកម្ពស់ ការផ្សព្វផ្សាយអប់រំអំពីបញ្ហាគ្រឿងញៀន តាមគ្រប់មធ្យោបាយ និងគ្រប់រូបភាព។ ក្នុងនោះ មាតាបិតា អាណាព្យាបាល និងលោកគ្រូ អ្នកគ្រូ ចាស់ព្រឹទ្ធាចារ្យ ត្រូវបន្តពន្យល់ អប់រំ ណែនាំជារឿយៗ ជាប់ជាប្រចាំដល់កូនៗ សមាជិកគ្រួសារ និងសិស្សានុសិស្ស ឲ្យយល់ដឹងកាន់តែច្បាស់អំពីផលប៉ះពាល់ជាអវិជ្ជមានរបស់គ្រឿងញៀន ចំពោះខ្លួនឯង គ្រួសារ និងសង្គមជាតិ។

ជាមួយនេះ លោកឧត្ដមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំ និងទំនាក់ទំនងសាធារណៈ នៃអគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវដល់អ្នកចូលរួមទាំងអស់ បន្តធ្វើការផ្សព្វផ្សាយបន្តដល់ក្រុមគ្រួសារ មិត្តភ័ក្ដិ និងមនុស្សជាទីស្រឡាញ់ទាំងអស់ ដើម្បីជៀសឆ្ងាយពីគ្រឿងញៀន រាយការណ៍យកគ្រឿងញៀនចេញពីសហគមន៍។ ក្នុងនោះ សូមឲ្យសាធារណជនទូទៅប្រើប្រាស់កម្មវិធីទូរស័ព្ទដៃ ឬហៅថា APP ដែលមានឈ្មោះថា NO DRUGS ដើម្បីរួមគ្នាពង្រឹង និងពង្រីកវិសាលភាព នៃការផ្សព្វផ្សាយអប់រំ ឲ្យបានទៅដល់ប្រជាពលរដ្ឋស្ទើរគ្រប់អ្នកមានទូរស័ព្ទដៃប្រើ មិនថា ចាស់ ឬក្មេង នៅទីប្រជុំជន នៅជនបទ ឬនៅក្រៅប្រទេសឡើយ។

បើតាម លោក ឌី រ៉ាដូ អភិបាលរងខេត្ត បានឲ្យដឹងថា រយៈពេល ៩ ខែ ឆ្នាំ ២០២៥ ក្រោមកិច្ចសហប្រតិបត្តិការរបស់ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត មន្ទីរ-អង្គភាពពាក់ព័ន្ធ អាជ្ញាធរមូលដ្ឋាន និងអង្គការមិនមែនរដ្ឋាភិបាល បានផ្សព្វផ្សាយ និងអប់រំអំពីខ្លឹមសារប្រយុទ្ធប្រឆាំងនឹងគ្រឿងញៀនចំនួន ៦ ០៤៤ លើក អ្នកចូលរួមសរុប ៣៩៨ ៦៩៧ នាក់។

លោកក៏បានសំណូមពរដល់កងកម្លាំងប្រដាប់អាវុធគ្រប់ប្រភេទ រដ្ឋបាលក្រុងស្រុក ឃុំសង្កាត់ និងមន្ទីរអង្គភាពពាក់ព័ន្ធ លោកគ្រូ អ្នកគ្រូ សិស្សានុសិស្ស ប្រជាពលរដ្ឋ វិស័យឯកជននានា សហការ និងចូលរួមចំណែកដល់ការអនុវត្តការងារប្រយុទ្ធប្រឆាំងគ្រឿងញៀនឲ្យបានព្រមៗ គ្នា ដើម្បីជីវិត និងសហគមន៍គ្មានគ្រឿងញៀន៕

អត្ថបទ ៖ គឿនវេត