លោក ជុំ សុន្ទរី ក្លាយជាឯកអគ្គរាជទូតថ្មីរបស់កម្ពុជាប្រចាំប្រទេសជប៉ុន ជំនួសលោក ទុយ រី

អ្នកនាំពាក្យក្រសួងការបរទេស លោក ជុំ សុន្ទរី ត្រូវបានតែងតាំងជាឯកអគ្គរាជទូតថ្មីរបស់កម្ពុជាប្រចាំនៅប្រទេសជប៉ុន ដោយលោកបានទៅដល់ទីក្រុងតូក្យូកាលពីថ្ងៃទី៣ ខែធ្នូ ឆ្នាំ២០២៥ សម្រាប់បេសកកម្មការទូតនៅទីនោះ។ វត្តមានរបស់លោក ជុំ សុន្ទរី ជាការជំនួសតំណែងលោក ទុយ រី ដែលត្រូវបានចប់អាណត្តិការងារ ហើយត្រូវធ្វើមាតុភូមិនិវត្តន៍វិលចូលប្រទេសកម្ពុជាវិញ កាលពីថ្ងៃទី២៧ ខែវិច្ឆិកា។

មុនចេញទៅបំពេញតួនាទីជាឯកអគ្គរាជទូត លោក ជុំ សុន្ទរី មានឋានៈជារដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា។

ក្នុងតួនាទីជាឯកអគ្គរាជទូតពេលនេះ មិនមែនជាការងារថ្មីថ្មោងរបស់លោក ជុំ សុន្ទរី ឡើយ តែជាបេសកកម្មដែលលោកធ្លាប់បានទទួលពីមុនមកហើយ ពោលអ្នកការទូតរូបនេះ ធ្លាប់បានចេញទៅបំពេញបេសកកម្មការទូតនៅប្រទេសជាច្រើន ក្នុងតួនាទីជាឯកអគ្គរាជទូតកម្ពុជាប្រចាំប្រទេសរុស្ស៊ី អូស្ត្រាលី នូវែលសេហ្សង់ និងជាឯកអគ្គរាជទូតនៅសហរដ្ឋអាមេរិក ក្នុងចន្លោះឆ្នាំ២០១៨ ដល់ឆ្នាំ២០២១។

បើតាមប្រវត្តិ លោក ជុំ សុន្ទរី ចូលបម្រើការនៅក្រសួងការបរទេស តាំងពីឆ្នាំ១៩៨០ ជាមន្ត្រីនៃនាយកដ្ឋានព័ត៌មាន៕

អត្ថបទ៖ ធឿន វ៉ាន់សុង