រដ្ឋមន្ត្រីការបរទេសកម្ពុជា ដឹកនាំអង្គទូតចុះមើលទីតាំងដែលថៃទម្លាក់គ្រាប់ដោយយន្តហោះ F-16

ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា នៅថ្ងៃទី១ ខែសីហានេះ បានដឹកនាំប្រមុខបេសកកម្មការទូតបរទេសប្រចាំកម្ពុជា ចុះទៅកាន់តំបន់ព្រំដែន ក្នុងខេត្តឧត្តរមានជ័យ ដែលជាទិសសមរភូមិប្រយុទ្ធគ្នារវាងកម្ពុជា និងថៃ ក្នុងរយៈពេល៥ថ្ងៃកន្លងមក ពិសេសទីតាំងដែលថៃទម្លាក់គ្រាប់ដោយយន្តហោះ F-16។

លើកឡើងនៅក្នុងសន្និសីទសារព័ត៌មាន នារសៀលថ្ងៃនេះ អ្នកនាំពាក្យក្រសួងការបរទេស លោក ជុំ សុន្ទរី បានថ្លែងឱ្យដឹងថា ដំណើរចុះពិនិត្យបញ្ហាតាមព្រំដែនរវាងកម្ពុជា និងថៃ ដែលដឹកនាំដោយប្រមុខការទូតកម្ពុជា លោកឧបនាយករដ្ឋមន្ត្រី ប្រាក់ សុខុន ប្រព្រឹត្តទៅក្នុងរយៈពេល២ថ្ងៃ គឺនៅថ្ងៃទី១ ខែសីហានេះ និងនៅថ្ងៃទី២ ខែសីហា ស្អែកនេះ។

បើតាមលោក ជុំ សុន្ទរី ដំណើរចុះពិនិត្យដោយមានការចូលរួមដោយអង្គទូត តំណាងអង្គការសហប្រជាជាតិ និងអង្គការអន្តរជាតិ នៅពេលនេះ គឺដើម្បីចុះត្រួតពិនិត្យតាមតំបន់រងផលប៉ះពាល់នៅខេត្តឧត្ដរមានជ័យ ដែលបង្កឡើងពីការវាយប្រហារដោយយោធាថៃ ពិសេសទីតាំងដែលយោធាថៃបានប្រើយន្តហោះ F-16 ទម្លាក់គ្រាប់បែកប្រភេទ MK-84 តែមិនទាន់ផ្ទុះនៅឡើយ និងទីតាំងភូមិដ្ឋាន វត្ត សាលា ដែលរងការខូចខាតដោយការទម្លាក់គ្រាប់នេះ។

ជាមួយគ្នានេះ ឧបនាយករដ្ឋមន្ត្រី ប្រាក់ សុខុន ក៏នឹងដឹកនាំអង្គទូត និងតំណាងអង្គការអន្តរជាតិ ដើម្បីចុះជួបសួរសុខទុក្ខ និងចែកអំណោយមួយចំនួនដល់កងទ័ពជួរមុខកម្ពុជា ដែលឈរជើងនៅសមរភូមិជួរមុខ ក្នុងខេត្តឧត្តរមានជ័យ ព្រមទាំងចុះសួរសុខទុក្ខជនភៀសសឹកផងដែរ៕ ដោយ៖ ធឿន វ៉ាន់សុង