ព័ត៌មានជាតិ

សង្គ្រាមឈ្លានពានសៀមមកលើកម្ពុជា បណ្តាលឱ្យសាលារៀនជិត ១ ១០០ កន្លែង បិទទ្វារ ប៉ះពាល់សិស្ស និងគ្រូជាង ២៦ ម៉ឺននាក់

បានផុស

៦ ខែ មុន

នៅ

ថ្ងៃពុធ ១៧ ធ្នូ ២០២៥

ដោយ

ក្រសួងអប់រំ យុវជន និងកីឡា បានឱ្យដឹងថា គិតត្រឹមថ្ងៃទី ១៧ ខែធ្នូ ឆ្នាំ ២០២៥ នេះ មានសាលារៀនជាប់បន្ទាត់ព្រំដែនចំនួន ១ ០៩១ សាលា នៃខេត្តចំនួន ៧ ត្រូវបានបិទទ្វារ ប៉ះពាល់គ្រូបង្រៀន ១១ ៩២២ នាក់ និង សិស្សានុសិស្ស ២៥៤ ៤៨០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃទី ១៦ ខែធ្នូ ឆ្នាំ ២០២៥ មានសិស្សភៀសសឹក បានចុះឈ្មោះចូលរៀនបណ្ដោះអាសន្នចំនួន ៦ ៣៨៨ នាក់ នៅគ្រឹះស្ថានសិក្សា ១ ១៦៣ សាលា រាជធានី-ខេត្ត ២០ ខណៈមានជនភៀសសឹកកើនដល់ ១៣១ ៦៧២ គ្រួសារ ស្មើនឹង ៤៣៨ ៩៥៣ នាក់ ក្នុងនោះ ស្ត្រីមាន ២២៥ ៥៧២ នាក់ និងកុមារមាន ១៣៤ ៦០២ នាក់។

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានធ្វើការអំពាវនាវដល់មាតាបិតា អាណាព្យាបាលភៀសសឹកទាំងអស់ នាំកូនទៅចុះឈ្មោះចូលរៀនបណ្ដោះអាសន្ននៅតាមគ្រឹះស្ថានសិក្សានានាដែលមានទីតាំងនៅជិតបំផុតនឹងទីជម្រកសុវត្ថិភាពបណ្ដោះអាសន្នរបស់លោកអ្នក។

នៅក្នុងសារអំពាវនាវមួយដែលបង្ហោះកាលពីថ្ងៃទី ១៦ ធ្នូ លោកឧបនាយករដ្ឋមន្ត្រី បានឱ្យដឹងថា«តាងនាមក្រសួងអប់រំ យុវជន និងកីឡា សូមអំពាវនាវដល់គ្រឹះស្ថានសិក្សាទាំងអស់ បន្តកិច្ចសហការជាមួយ មន្ទីរអប់រំ យុវជន និងកីឡា ទាំងអស់ ដើម្បីចូលរួមសម្របសម្រួលគាំពារដល់សិស្សានុសិស្សដែលភៀសសឹក ឱ្យបានចុះឈ្មោះចូលរៀនគ្រប់ៗ គ្នា ស្ថិតក្នុងគ្រាដ៏លំបាក នៃជម្លោះព្រំដែនរវាងកម្ពុជា-ថៃ សូមឱ្យមាតាបិតា អាណាព្យាបាលភៀសសឹកទាំងអស់ នាំកូនទៅចុះឈ្មោះចូលរៀនបណ្ដោះអាសន្ននៅតាមគ្រឹះស្ថានសិក្សានានាដែលមានទីតាំងនៅជិតបំផុតនឹងទីជម្រកសុវត្ថិភាពបណ្ដោះអាសន្នរបស់លោកអ្នក»។

ជាមួយគ្នានេះដែរ លោកឧបនាយករដ្ឋមន្ត្រី បានអំពាវនាវសូមបន្តពង្រឹងសាមគ្គីភាពគ្នារក្សាស្មារតីជាតិដ៏រឹងមាំ និងជឿទុកចិត្តលើរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងខ្មាំងឈ្លានពានដែលរំលោភបូរណភាពដែនដីរបស់កម្ពុជា។

លោកឧបនាយករដ្ឋមន្ត្រី បញ្ជាក់ថា «សៀមវាយយើងដើម្បីបំបាក់យើងឱ្យខ្លបខ្លាច ដូចនេះ សូមកុំខ្លបខ្លាច សូមមានភាពក្លាហាន ហើយងើបឈរឡើង ដើម្បីគាំទ្ររាជរដ្ឋាភិបាល គាំទ្រកងកម្លាំងប្រដាប់អាវុធវីរយុទ្ធជនយើង ដើម្បីប្រយុទ្ធប្រឆាំងខ្មាំងឈ្លានពាន និងត្រូវខិតខំប្រឹងប្រែងបណ្តុះបណ្តាលធនធានមនុស្សឱ្យមានគុណភាព មានតែធនធានមនុស្សដែលមានគុណភាពទេ ទើបយើងអាចកសាងកម្ពុជាមួយដែលមានសេដ្ឋកិច្ច ការអភិវឌ្ឍ មានភាពរុងរឿង និងយកឈ្នះមាសត្រូវរបស់យើង»៕

អត្ថបទ ៖ សំអឿន