នគរបាលខេត្តស្ទឹងត្រែង៦រូប រងទណ្ឌកម្មវិន័យដោយដកហូតតំណែង និងបន្ថយស័ក្តិ

ក្រសួងមហាផ្ទៃ ដាក់ទណ្ឌកម្មវិន័យលើនគរបាលខេត្តស្ទឹងត្រែងចំនួន ៦រូប ដែលក្នុង​នោះ​​ម្នាក់​មានឋានន្តរស័ក្តិជាឧត្តមសេនីយ៍ត្រី ក្រោយរកឃើញថា ប្រព្រឹត្តល្មើសវិន័យកងកម្លាំងនគរបាលជាតិ។ តាមប្រកាសរបស់រដ្ឋមន្ត្រីក្រសួងមហាផ្ទៃ ទណ្ឌកម្មដែលដាក់លើនគរបាលទាំងនោះ គឺការដក​តំណែង និង​បន្ថយ​ឋានន្តរស័ក្តិ​។

ប្រកាស​ស្តី​ពី​ការ​អនុវត្ត​ទណ្ឌកម្ម​ចំនួន ៣ដាច់ដោយឡែកពីគ្នា ចុះកាលពីថ្ងៃទី១២ ខែមករា ឆ្នាំ២០២៦ បានបង្ហាញថា នគរបាលដែលរងទណ្ឌកម្មនេះ គឺលោកឧត្តមសេនីយ៍ត្រី ចាន់ សុ​ផា ត្រូវបានដកហូត​មុខ​តំណែងពី​ស្នងការ​រង ទទួល​ការងារ​ព្រំដែន នៃ​ស្នងការដ្ឋាន​នគរបាល​ខេត្តស្ទឹងត្រែង ឱ្យមក​ជា​មន្ត្រី។

ខណៈមន្ត្រី៤រូបទៀត ត្រូវបានដកហូតតំណែង ឱ្យមក​ជា​មន្ត្រី និងបន្ថយឋានន្តរស័ក្តិ១ថ្នាក់ រួមមាន៖ ១.វរសេនីយ៍ត្រី ទិព្វ និ​ទ្ធី ដកហូតតួនាទីពីមេបញ្ជាការ​រងវរ​សេនា​តូច​នគរបាលការពារ​ព្រំដែន​គោក​លេខ​៧០១​ និង​បន្ថយឋានន្តរស័ក្តិ​មក​នៅ​ត្រឹម​ថ្នាក់​អនុសេនីយ៍ឯក ២.អនុសេនីយ៍ឯក ឋាន វិចិត្រ ដកតួនាទីពី​នាយ​រង​ផ្នែក​សុខាភិបាល នៃ​វរ​សេនាតូច​នគរបាល​ការពារ​ព្រំដែន​គោក​លេខ​៧០១ និង​បន្ថយ​ឋានន្តរស័ក្តិ​មក​នៅ​ត្រឹម​ថ្នាក់អនុសេនីយ៍ទោ ៣.អនុសេនីយ៍ទោ សៅ សុភាព ដកហូតតួនាទីពី​នាយ​រង​ប៉ុស្តិ៍​នគរបាល​ការពារ​ព្រំដែនគោក​ណា​អូ​ង នៃ​វរ​សេនា​តូច​នគរបាល​ការពារ​ព្រំដែន​គោកលេខ​៧០១ និង​បន្ថយ​ឋានន្តរស័ក្តិ​មក​នៅ​ត្រឹម​ថ្នាក់អនុសេនីយ៍ត្រី និង៤.អនុសេនីយ៍ត្រី ចាន់ សុ​ភ័​ក្រ ត្រូវបានបន្ថយឋានន្តរស័ក្តិមក​នៅ​ត្រឹម​ថ្នាក់ព្រិ​ន្ទ​បាល​ឯក​។

ដោយឡែកលោកវរសេនីយ៍ទោ ចាន់ សុធា មេបញ្ជាការ​រងវរ​សេនា​តូច​នគរបាល​ការពារ​ព្រំដែន​គោក​លេខ​៧៩១ នៃ​ស្នងការដ្ឋាន​នគរបាល​ខេត្តស្ទឹងត្រែង ក៏ត្រូវបានឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ សម្រេច​ផ្អាក​ការងារ​ជាបណ្តោះអាសន្ន។ ផ្អាកការងារត្បិតថា វរសេនីយ៍ទោ ចាន់ សុធា បានប្រព្រឹត្តខុសតួនាទីដោយល្មើសនឹងវិន័យនគរបាលជាតិផងដែរ៕  

អត្ថបទ៖ ធឿន វ៉ាន់សុង