ព័ត៌មានជាតិ

បទយកការណ៍៖ ការងាររោងចក្រក្នុងស្រុកកែប្រែផ្នត់គំនិតពលករខ្មែរមកពីថៃពីស្ថានភាពការងារនៅកម្ពុជា

បានផុស

៤ ខែ មុន

នៅ

ថ្ងៃចន្ទ ២៦ មករា ២០២៦

ដោយ

«នៅកម្ពុជាល្អច្រើនជាង(ថៃ) យើងអស់តែផ្ទះជួល និងទិញបាយហូបខ្លួនឯង យើងឈឺអីទៅ យើងទៅពេទ្យមាន ប.ស.ស. អត់អស់លុយស្រួល។ ហើយនៅប្រទេសយើងៗអត់ភ័យខ្លាចថាប៉ូលិសចាប់អីអ៊ីចឹងណាយើងចង់ទៅណាក៏បាន។ (តើចង់ទៅថៃវិញទេ?) អត់ទេ!បង ខ្ញុំអត់ចង់ទៅទៀតទេ» ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការលើកឡើងរបស់អ្នកស្រី អៀម អេម ជាអ្នកខេត្តបាត់ដំបង ធ្លាប់ជាអតីតពលករខ្មែរនៅប្រទេសថៃ បច្ចុប្បន្នជាកម្មកររោងចក្រមួយ ស្រុកសំរោងទង ខេត្តកំពង់ស្ពឺ។ អ្នកស្រីបានឱ្យដឹងថាបន្ទាប់ពីចូលកម្ពុជាក្នុងអំឡុងខែកក្កដា អ្នកស្រីពុំមានការងារច្បាស់លាស់ធ្វើទេ រហូតដល់ពេលមួយដែលអ្នកស្រីទទួលបានព័ត៌មានពីលេខទំនាក់ទំនងរកការងាររបស់ក្រសួងការងារ ១២៩៧ ដោយបានហៅទូរស័ព្ទរៀបរាប់ពីការលំបាកស្វែងរកការងារ និងការខ្វះខាតឯកសាររបស់ខ្លួន ក្រោយមកក៏ត្រូវបានក្រសួងការងារផ្គូផ្គងការងារជូនអ្នកស្រីបានមកធ្វើការនៅរោងចក្រនេះតែម្ដង។

អ្នកស្រី អៀម អេម៖ «ក្រសួងរៀបចំបានល្អ! ហើយខ្ញុំអរគុណគាត់ទៀត គាត់បានជួយខ្ញុំឱ្យមក គាត់ជួយជួលបន្ទប់អីឱ្យខ្ញុំស្នាក់នៅ បើសិនជាអត់មានគាត់ខ្ញុំអត់បានមកធ្វើការនៅរោងចក្រនេះទេ»។

មិនត្រឹមតែអ្នកស្រី អៀម អេម ទេដែលបានការងារនៅរោងចក្រនេះ ស្វាមីរបស់គាត់ដែលធ្លាប់ជាអតីតពលករមកពីថៃដូចគ្នាក៏បានចូលធ្វើការជាមួយប្រពន្ធគាត់ដែរ។ អ្នកស្រីបានឱ្យដឹងក្នុងមួយខែ២នាក់ប្ដីប្រពន្ធអាចទទួលចំណូលបានជាង៦០០ដុល្លារ ដែលអាចឱ្យពួកគាត់អាចទ្រទ្រង់ជីវភាពបាន និងសល់លុយផ្ញើទៅឱ្យកូនស្រីនៅឯស្រុកផងដែរ។

អ្នកស្រីបន្ថែមថា៖ «មកធ្វើនៅទីនេះខ្ញុំសប្បាយចិត្តព្រោះបើកលុយបានច្រើន! បើយើងគិតជាថ្ងៃថៃបានច្រើនជាងហើយវាក៏អស់ច្រើនដូចគ្នា។ នៅថៃយើងត្រូវធ្វើការរាល់ថ្ងៃទើបបាន។ នៅនេះ(កម្ពុជា)យើងបានឈប់ថ្ងៃអាទិត្យ ហើយបានឈប់ថ្ងៃបុណ្យទៀត បើនៅថៃថ្ងៃបុណ្យអត់ឈប់ទេ»។

អាចថាជាភាពចៃដន្យមួយរបស់អ្នកស្រី និងស្វាមីដោយសារតែបានការងារនៅរោងចក្រ Ventura ដែលជាដៃគូររបស់ក្រសួងការងារក្នុងកម្មវិធីរៀនដេរបានលុយ ដែលធ្វើឱ្យអ្នកស្រីនិងស្វាមីទទួលបានកម្រៃតាំងពីថ្ងៃដំបូងនៅពេលចូលរៀន បូករួមទាំងការជូនដំណើរ បន្ទប់ស្នាក់នៅ និងអាហារហូបចុកដោយឥតគិតថ្លៃផងដែរក្នុងអំឡុងពេលនៃការរៀននោះ។ កម្មវិធីនេះចាប់ផ្ដើមនៅខែធ្នូ ឆ្នាំ២០២៥ រហូតដល់ថ្ងៃទី២២ ខែមីនា ឆ្នាំ២០២៦ខាងមុខដែលនឹងផ្ដល់ជូនដល់មនុស្សចំនួន២៣០០នាក់។

អ្នកនាំពាក្យក្រសួងការងារលោក ស៊ុន មេសា បានឱ្យដឹងថារហូតមកដល់ចុងខែមករាមានអតីតពលករខ្មែរពីប្រទេសថៃប្រមាណជាង៥០០នាក់ហើយដែលស្ថិតក្នុងគម្រោងនេះ ក្នុងនោះជិត១០០នាក់បានការងារនៅរោងចក្រ Ventura នេះ។

អតីតពលករខ្មែរនៅប្រទេសថៃម្នាក់ទៀតដែលស្ថិតក្នុងគម្រោងនេះគឺលោក ម៉ែន កូឡូណែល អាយុ៤៦ឆ្នាំ ធ្លាប់ធ្វើការនៅថៃដល់ទៅ២៦ឆ្នាំជាកម្មករសំណង់ បច្ចុប្បន្នបានផ្លាស់ប្ដូរអាជីពថ្មីជាកម្មកររោងចក្រកាត់ដេរ។ លោកស្ទើរតែមិនសង្ឃឹមថារោងចក្រទទួលលោកចូលរៀននិងធ្វើការផងដោយសារលោកមានវ័យចំណាស់ដែរ តែដោយសារការសម្របសម្រួលពីក្រសួងការងារ និងទទួលការបណ្ដុះបណ្ដាលនោះធ្វើឱ្យលោកបានទទួលការងារយ៉ាងពេញចិត្តនៅទីនេះ។

លោកថា៖ «កាលខ្ញុំមកស្រុកខ្មែរ៣ខែ ខ្ញុំរកការងារធ្វើអត់បានក៏ខ្ញុំទាក់ទងទៅក្រសួង ក៏គាត់ទាក់ទងមកថាគាត់ចាំរកការងារឱ្យធ្វើព្រោះការងារមានច្រើន តែគាត់ឱ្យមកធ្វើនៅរោងចក្រសិនមក។ ខ្ញុំថារោងចក្រខ្ញុំអត់សូវចេះធ្វើទេមេ! គាត់ថាមកធ្វើសិនមកដើម្បីបានស្គាល់ការងារ ព្រោះយើងអត់ដែលបានធ្វើនៅក្នុងស្រុកផង។ […] មកធ្វើបាន១ខែជាងមកដូចជាមានការសប្បាយចិត្តខ្លះដែរ ព្រោះកន្លះខែគាត់បើកលុយម្ដង អ៊ីចឹងយើងក៏ថាហូបគ្រប់គ្រាន់អ៊ីចឹងណា។ យើងអត់ខ្វះបើថាមួយខែបើកម្ដងទៅយើងអាចខើចមុខខើចក្រោយចុងខែអី ដល់កន្លះខែអាចទប់បានអ៊ីចឹងទៅវាម៉ាល្មម រស់ទៅអត់អីទេ! យូរៗទៅទម្លាប់ដូចតែគេហើយ គេនៅរាប់ពាន់នាក់គេនៅបានរឿងអីយើងនៅមិនបាន»។ 

ក្រោយបានការងារលោកក៏បានណែនាំអតីតពលករពីថៃ៤-៥នាក់ទៀតបានចូលធ្វើការជាមួយគ្នាផងដែរ។ លោកបានផ្ញើសារជូនអតីតពលករខ្មែរនៅថៃដែលមិនទាន់បានការងារធ្វើសូមធ្វើការទំនាក់ទំនងមកក្រសួងការងារ ឬលេខទូរស័ព្ទ១២៩៧ដើម្បីទទួលបានការងារធ្វើ។

លោក កូឡូណែល សង្ឃឹមថានាពេលខាងមុខប្រសិនជាមានរោងចក្រកាត់ដេរបើកនៅខេត្តបាត់ដំបង លោកប្រហែលនឹងទៅធ្វើនៅទីនោះវិញព្រោះក្នុងខេត្តកំណើត។

ប្រធានផ្នែកធនធានមនុស្សនៃរោងចក្រ Ventura កញ្ញា ជ័យ ប៊ុនផលលាភ បានឱ្យដឹងថាកញ្ញាគាំទ្រដល់គម្រោងរបស់ក្រសួងការងារដែលជំរុញដល់អតីតពលករចំណាកស្រុកឱ្យចូលមកធ្វើការតាមរោងចក្រនានាក្នុងប្រទេស។ កញ្ញាបន្ថែមថាគម្រោងនេះក៏ស្របពេលដែលរោងចក្រកញ្ញាកំពុងរកបុគ្គលិកបន្ថែមដែលត្រូវការដល់ទៅជាង១ពាន់នាក់ផងដែរ។ កញ្ញាសំណូមពរដល់អតីតពលករខ្មែរដែលត្រលប់ពីប្រទេសថៃដែលនៅមិនទាន់មានការងារធ្វើសូមទាក់ទងទៅកាន់ក្រសួងការងារដើម្បីទទួលបានឱកាសការងារក្នុងស្រុក។

កញ្ញាថា៖ «សូមជឿថាស្រុកខ្មែរយើងអត់ខ្ចះការងារធ្វើទេ ហើយនៅពេលដែលបងប្អូនអត់មានជំនាញខាងយើងក៏មានបង្រៀនដល់ពួកគាត់ទៀត។ អ៊ីចឹងសូមបងប្អូនជឿទុកចិត្តលើរាជរដ្ឋាភិបាលក៏ដូចជារោងចក្រផ្ទាល់ព្រោះអីចំណូលដែលយើងរកបាននៅទីនេះក្នុងស្រុកក៏អត់ចាញ់នៅក្រៅស្រុកដែរ»។

ប្រធានសហភាពពលកម្មជាតិកម្ពុជាលោក សំ សឿន មានប្រសាសន៍ថាស្ថានភាពការងារនៅកម្ពុជាកាន់តែប្រសើរជារៀងរាល់ឆ្នាំ ជាមួយប្រាក់ចំណូលសមរម្យ និងលក្ខខន្តការងារកាន់តែល្អ។ លោកបន្ថែមថា បើពិនិត្យលើស្ថានភាពទាំងនេះធៀបទៅនឹងការងារនៅប្រទេសថៃគឺកម្ពុជាល្អប្រសើរជាងច្រើន។

លោកបន្ថែមថា៖ «ប្រាក់ឈ្នួលមិនខុសគ្នាប៉ុន្មានទេតែធ្វើការនៅកម្ពុជាទទួលបាននូវរបបថែទាំងសុខភាពតាមរយៈ ប.ស.ស. ប្រាក់សោធននិវត្តន៍ បងប្អូនទៅថៃគឺគ្មានប្រាក់សោធននិវត្តន៍ទេ បងប្អូនចាស់ទៅត្រលប់មកកម្ពុជាវិញគឺគ្មានប្រាក់ទ្រទ្រង់ជីវិតទេ។ តែចំពោះកម្មករកម្ពុជាគាត់ធ្វើការ ទោះគាត់បាត់បង់កាយសម្បទាក្ដី គាត់ចូលនិវត្តន៍ក្ដីមានប្រាក់សោធននិវត្តន៍សម្រាប់ទ្រទ្រង់ជីវភាពរស់នៅកាន់តេប្រសើរនៅពេលដែលគាត់បាត់បង់សមត្ថភាពការងារឬចូលនិវត្តន៍ បងប្អូនក៏អាចទៅព្យាបាលជំងឺដោយមិនបង់ប្រាក់ពេលដែលចូលនិវត្តន៍»។

លោកថាជំរុញដល់អតីតពលករទាក់ទងមកក្រសួងការងារដើម្បីទទួលបានការងារ ទទួលចំណូលក្នុងស្រុក ចាយក្នុងស្រុក បង្កើនចំណូលក្នុងស្រុកជាជាងទៅធ្វើការឱ្យបរទេស យកលុយចាយបង្កើនសេដ្ឋកិច្ចបរទេសដែលមើលងាយកម្ពុជានោះ។

បន្ទាប់ពីកម្ពុជាមានជម្លោះព្រំដែនជាមួយថៃ និងការមាក់ងាយពីប្រជាជនថៃលើពលរដ្ឋខ្មែរនៅប្រទេសថៃនោះ ពលករចំណាកស្រុកជាង៩៥ម៉ឺននាក់បានត្រលប់ចូលកម្ពុជាវិញ ក្នុងនោះមានកុមារចន្លោះពី៥ទៅ៦ម៉ឺននាក់ និងមនុស្សអាយុ៤៥ឆ្នាំឡើងជាង២៥ម៉ឺននាក់។ តាមរបាយការណ៍ក្រសួងការងាររហូតមកដល់ខែធ្នូ ឆ្នាំ២០២៥ ក្រសួង និងស្ថាប័នឯកជនក្នុងស្រុកបានសម្របសម្រួលរកការងារ និងផ្ដល់ការងារជូនអតីតពលករខ្មែរបានចូលធ្វើការប្រមាណ៦២ម៉ឺននាក់ហើយ។

អ្នកនាំពាក្យក្រសួងការងារលោក ស៊ុន មេសា បានឱ្យដឹងថាបញ្ហាប្រឈមដែលធ្វើឱ្យពលករចំណាកស្រុកផ្សេងទៀតមិនទាន់អាចរកការងារធ្វើបាននោះគឺមិនបានទទួលព័ត៌មាន និងលេខទូរស័ព្ទទាក់ទងមកក្រសួង ខណៈមួយចំនួនពិបាកសម្របខ្លួនទៅនឹងរបៀបរបបការងារនៅកម្ពុជាដោយសារពួកគេទៅធ្វើនៅថៃយូរឆ្នាំមកហើយ ពុំមានជំនាញ និងខ្លះទៀតពុំមានឯកសារគ្រប់គ្រាន់សម្រាប់ស្វែងរកការងារនោះទេ។ យ៉ាងណាក្ដីលោកថាបញ្ហាទាំងនេះគឺអាចដោះស្រាយបានប្រសិនជាអតីតពលករទាំងនោះទាក់ទងមកក្រសួង។

លោកបន្ថែមថា ជាការងារទៅមុខទៀតក្រសួងនៅតែបន្តជួយសម្របសម្រួលដល់អតីតពលករ បណ្ដុះបណ្ដាលជំនាញបច្ចេកទេស រៀបចំវេទិកាការងារ ផ្សព្វផ្សាយពីការឱកាសការងារក្នុងស្រុកជាបន្តទៀតដើម្បី ជំរុញការងារក្នុងស្រុក និងទប់ស្កាត់ការធ្វើចំណាកស្រុកខុសច្បាប់របស់ពលរដ្ឋ។

លោកថា៖ «ឆ្នាំ២០២៦ យើងនឹងបន្តវេទិការបស់យើងដដែលយើងនឹងធ្វើ៦៦លើកបន្ថែមទៀតក្នុងឆ្នាំ២០២៦ ដែលយើងគ្រោងជំហាននេះត្រឹមខែឧសភា ២០២៦ ដើម្បីបន្តស្រូបទាញបងប្អូនអតីតពលករមួយចំនួនដែលពួកគាត់មិនទាន់សម្រេចចិត្តនៅក្នុងការស្វែងរកការងារធ្វើឬមិនទាន់សម្រេចចិត្តក្នុងការធ្វើការងារនៅក្នុងស្រុកឬក៏ប្រកបរបរអាជីវកម្មនិងបង្កើតរបរដោយខ្លួនឯងនេះជាវិធានការចាំបាច់នឹងសំខាន់ៗដែលយើងបានដាក់ចេញ»។

ត្រលប់ទៅអ្នកស្រី អៀម អេម វិញដោយបានឆ្លើយយ៉ាងពេញចិត្តចំពោះការងារដែលកំពុងធ្វើបច្ចុប្បន្ន អ្នកស្រីរំពឹងថាតាមរយៈចំណូលដែលមានភាពនឹងនពីការងារដែលទទួលបាននេះ នឹងជួយឱ្យស្ថានភាពគ្រួសាររបស់អ្នកស្រីរីកចម្រើន កូនស្រីរបស់អ្នកស្រីបានរៀនសូត្របានខ្ពង់ខ្ពស់។

អ្នកស្រី អៀម អេម៖ «ជួយយើងបានច្រើនដែរ បានខ្ញុំផ្ញើឱ្យកូនរៀន កូនបានចូលរៀនអង់គ្លេសបានអីដែរណាបង។ ខ្ញុំចង់ឱ្យកូនខ្ញុំរៀនឱ្យចប់»៕

អត្ថបទដោយ ហ៊ុន សិរីវឌ្ឍន៍

ព័ត៌មានអន្ដរជាតិ២២ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា