ព័ត៌មានជាតិ

ឧប. ស សុខា កំណត់ពេល៤៨ម៉ោងឱ្យនគរបាលមានវិធានការចាប់ខ្លួនក្មេងទំនើងដែលបង្កហេតុ ឬរត់គេចខ្លួន

បានផុស

៤ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

រដ្ឋមន្ត្រីមហាផ្ទៃ ឧបនាយករដ្ឋមន្ត្រី ស សុខា បានបញ្ជាឱ្យស្នងការដ្ឋានរាជធានីខេត្តទាំងអស់ចាត់វិធានការបង្ក្រាប ចាប់ខ្លួនក្មេងទំនើងដែលបង្កផលប៉ះពាល់ដល់សន្តិសុខសណ្ឋាប់ធ្នាប់ឱ្យបានយ៉ាងយូរ៤៨ម៉ោង។ នេះបើតាមការបញ្ជាក់របស់អ្នកនាំពាក្យរដ្ឋមន្ត្រីមហាផ្ទៃ លោក រ៉េន រតនៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រ៉េន រតនៈ បានស្រង់ប្រសាសន៍របស់លោករដ្ឋមន្ត្រីមហាផ្ទៃដែលប្រជុំនៅថ្ងៃទី១៨ ខែកុម្ភៈមកថា៖ «សូម្បីក្រុមឆបោកតាមប្រព័ន្ធអនឡាញ នៅតែសមត្ថកិច្ចយើងអាចបោសសម្អាតបានជាបន្តបន្ទាប់ ដូច្នេះ ត្រឹមក្មេងទំនើងឱ្យតែយើងមានឆន្ទៈមុតមាំ រឿងអ្វីយើងមិនអាចក្របួចចាប់ពួកគេយកទៅផ្ដន្ទាទោសបាន»។

អ្នកស្រាវជ្រាវការអភិវឌ្ឍន៍សង្គមលោកបណ្ឌិត ប៉ា ច័ន្ទរឿន មានប្រសាសន៍ថា ចំណាត់ការកន្លងមករបស់រដ្ឋាភិបាលលើបញ្ហាក្មេងទំនើងនេះគឺជាការប្រតិកម្មតបលើបញ្ហាដែលកើតឡើងហើយប៉ុណ្ណោះ មិនមែនជាវិធានការបង្ការទេ ដែលនៅតែធ្វើឱ្យបញ្ហាក្មេងទំនើងនេះនៅតែជាបញ្ហាដដែល។

លោកថា៖ «យើងមានតែយន្តការបង្ក្រាប តែយើងគ្មានយន្តការធ្វើមិចកែប្រែពួកគាត់ឱ្យក្លាយជាក្មេងល្អ ហើយក៏ខ្វះយន្តការក្នុងការបង្ការវាភាគច្រើនយើងព្យាបាលតែនៅពេលវាមានបញ្ហាទេ តែគ្មានវិធានការការពារភាសាសាមញ្ញគឺយើងខ្វះវ៉ាក់សាំងក្នុងការបង្ការ។ ចំណុចមួយទៀតដែលធំនោះគឺការអប់រំផ្នែកសីលធម៌ក្នុងសង្គមយើងនេះមើលទៅដូចគ្មានប្រសិទ្ធភាព»។

លោកឱ្យជាយោបល់ថារដ្ឋាភិបាលគួរតែមានកិច្ចពិភាក្សាថ្នាក់ជាតិមួយដែលទាញយកធាតុចូលទាំងអស់ពីគ្រប់ភាគីពាក់ព័ន្ធ រួមទាំងអង្គការសង្គមស៊ីវិល សាលារៀន ឪពុកម្ដាយ សាសនា និងយុវជនផងដែរ ដើម្បីស្វែងរកដំណោះស្រាយ រួមទាំងការធ្វើការស្រាវជ្រាវលំអិតមួយលើករណីនេះដែលជាបង្គោលសម្រាប់ឱ្យរដ្ឋាភិបាលដាក់គោលនយោបាយចំទិសដៅផងដែរ។

របាយការណ៍ក្រសួងមហាផ្ទៃគិតពីថ្ងៃទី១៥ ខែថ្ងៃទី២១ ខែមករា ឆ្នាំ២០២៦ នគរបាលជាតិបានបង្ក្រាបក្មេងទំនើងបាន២១ករណី ដោយឃាត់ខ្លួនមនុស្សចំនួន៧០នាក់ទៅតុលាការ ករណីបង្ក្រាប់នេះភាគច្រើនមានក្នុងមូលដ្ឋាន រាជធានីភ្នំពេញ ខេត្តកណ្ដាល កំពង់ស្ពឺ កំពត តាកែវ ត្បូងឃ្មុំ ស្វាយរៀង ក្រចេះ បាត់ដំបង និងខេត្តពោធិ៍សាត់៕