ព័ត៌មានជាតិ

អគ្គមេបញ្ជាការទ័ពម៉ាឡេស៊ីគាំទ្រការដោះស្រាយបញ្ហាជាមួយថៃដោយសន្តិវិធី ខណៈជំរុញបង្កើនកិច្ចសហការយោធាជាមួយកម្ពុជា

បានផុស

១៥ វិនាទី មុន

នៅ

ថ្ងៃសៅរ៍ ១១ កក្កដា ២០២៦

ដោយ

អគ្គមេបញ្ជាការទ័ពរដ្ឋសហព័ន្ធម៉ាឡេស៊ីលោក Tan Sri Dato’ Seri Haji Malek Razak bin Sulaiman បានគាំទ្រជំហររបស់កម្ពុជាក្នងុការដោះស្រាយបញ្ហាព្រំដែនដោយសន្ដិវិធីជាមួយថៃ ខណៈបានវាយតម្លៃខ្ពស់ដល់ទំនាក់ទំនងកម្ពុជានិងម៉ាឡេស៊ី ជាពិសេសលើទំនាក់ទំនងយោធានៃប្រទេសទាំងពីរ។ លោកបានជំរុញឱ្យមានកិច្ចសហការយោធារវាងកម្ពុជានិងម៉ាឡេស៊ីកើនឡើងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងជំនួបជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន នៅព្រឹកថ្ងៃទី១១ ខែកក្កដា ឆ្នាំ២០២៦នេះ លោក Malek Razak បានលើកឡើងដោយកោតសរសើរ និងគោរពចំពោះបទពិសោធន៍ និងការដឹកនាំរបស់របស់សម្ដេចតេជោចំពោះការដោះស្រាយបញ្ហាជាមួយថៃ ជាពិសេសគឺជំហរដោះស្រាយបញ្ហាដោយសន្តិវិធី។

តាមការឱ្យដឹងពីអ្នកនាំពាក្យសម្ដេចតេជោលោក ជា ធីរិទ្ធ បានបញ្ជាក់ថា៖ «ឯកឧត្តមក៏បានគាំទ្រពេញទំហឹងចំពោះជំហររបស់កម្ពុជា ក្នុងការដោះស្រាយបញ្ហាព្រំដែនជាមួយនឹងថៃដោយសន្តិវិធី»។

ក្នុងជំនួបនៅព្រឹកនេះ សម្ដេចតេជោ ហ៊ុន សែន បានបង្ហាញនូវការដឹងគុណចំពោះនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលក្នុងពេលដែលលោកធ្វើជាប្រធានអាស៊ានបានចូលរួមយ៉ាងសកម្មក្នុងការដោះស្រាយជុំវិញជម្លោះព្រំដែនរវាងកម្ពុជា និងថៃ ជាពិសេសគឺការបង្កើត ក្រុមអ្នកសង្កេតការណ៍អាស៊ានដែលជាមរតកដែលកើតឡើងក្នុងអំឡុងពេលដែលម៉ាឡេស៊ីបានធ្វើជាប្រធានអាស៊ាន។

សម្ដេចក៏បានចែករំលែកអំពីស្ថានការណ៍ព្រំដែនកម្ពុជា និងថៃផងដែរ ដែលសម្ដេចបានបញ្ជាក់នូវគោលជំហររបស់កម្ពុជា ក្នុងការដោះស្រាយបញ្ហាព្រំដែនកម្ពុជា និងថៃដោយឈរលើការដោះស្រាយដោយសន្តិវិធី និងឈរលើមូលដ្ឋានច្បាប់អន្តរជាតិ។

ក្នុងឱកាសនោះដែរសម្ដេចក៏បានលើកឡើងពីទំនាក់ទំនងទ្វេភាគីរវាងកម្ពុជានិងម៉ាឡេស៊ី ដោយសម្ដេចបានលើកឡើងថា បច្ចុប្បន្ននេះកម្ពុជា និងម៉ាឡេស៊ី មានកំណើនសេដ្ឋកិច្ចគួរឱ្យកត់សម្គាល់ ហើយទំនាក់ទំនងនៅក្នុងវិស័យការពារជាតិ ក៏មានការរីកចម្រើនគួរឲ្យកត់សម្គាល់ផងដែរ។

ទាក់ទងនឹងកិច្ចសហប្រតិបត្តិការយោធានេះលោក Malek Razak បានបង្ហាញយ៉ាងច្បាស់ថា ប្រទេសកម្ពុជា និងម៉ាឡេស៊ីមានទំនាក់ទំនងដ៏ល្អរវាងគ្នា និងគ្នាហើយជាពិសេសនៅក្នុងក្របខណ្ឌនៃទំនាក់ទំនងកងទ័ព នៃប្រទេសទាំងពីរ។ លោកក៏បានជម្រាបជូនសម្ដេចតេជោផងដែរថាក្នុងពេលដែលលោកជជែកជាមួយនឹងថ្នាក់ដឹកនាំនៃក្រសួងការពារជាតិរបស់កម្ពុជាគឺបានជំរុញយ៉ាងណាឱ្យប្រទេសទាំងពីរពង្រឹងបន្ថែមទៀតនូវកិច្ចការក្នុងវិស័យការពារជាតិ ដើម្បីជាប្រយោជន៍ដល់ប្រជាជាតិជាតិទាំងពីរក៏ដូចជាសហគមន៍អាស៊ានទាំងមូល៕