ព័ត៌មានជាតិ

សភាប្រើភាសាបារាំង (APF)អំពាវនាវឱ្យគោរពអធិបតេយ្យភាពកម្ពុជា និងដោះស្រាយជម្លោះដោយសន្តិវិធី

បានផុស

១៣ វិនាទី មុន

នៅ

ថ្ងៃអាទិត្យ ១២ កក្កដា ២០២៦

ដោយ

សម័យប្រជុំប្រចាំឆ្នាំលើកទី៥១ នៃសភាប្រើភាសាបារាំង (APF) នៅថ្ងៃទី១១ ខែកក្កដា ឆ្នាំ២០២៦ បានអនុម័តសេចក្តីសម្រេចមួយ បញ្ជាក់ជាថ្មីនូវការគាំទ្រយ៉ាងរឹងមាំចំពោះអធិបតេយ្យភាព និងបូរណភាពទឹកដីរបស់ព្រះរាជាណាចក្រកម្ពុជា។ ក្នុងថ្ងៃដដែល អង្គប្រជុំក៏បានជ្រើសតាំងលោក អ៊ុច បូររិទ្ធ អនុប្រធានទី១ ព្រឹទ្ធសភាកម្ពុជា ជាប្រតិភូប្រចាំតំបន់អាស៊ី-ប៉ាស៊ីហ្វិក សម្រាប់អាណត្តិឆ្នាំ២០២៦-២០២៨ ផងដែរ។

សេចក្តីសម្រេចដែលធ្វើឡើងតាមសំណើរបស់គណៈកម្មាធិការនយោបាយ APF បានបញ្ជាក់ជាថ្មីនូវការប្តេជ្ញាចិត្តរបស់សភាប្រើភាសាបារាំង ក្នុងការគោរពសេចក្តីប្រកាសទីក្រុងបាម៉ាកូ និងទីក្រុងសាំង-បូនីហ្វាស ច្បាប់អន្តរជាតិ ព្រមទាំងសាលក្រមរបស់តុលាការយុត្តិធម៌អន្តរជាតិ (ICJ) ចុះថ្ងៃទី១៥ ខែមិថុនា ឆ្នាំ១៩៦២ និងថ្ងៃទី១១ ខែវិច្ឆិកា ឆ្នាំ២០១៣។ សេចក្តីសម្រេចក៏បានលើកឡើងពីសារៈសំខាន់នៃរបៀបវារៈ «ស្ត្រី សន្តិភាព និងសន្តិសុខ» និងតួនាទីរបស់ស្ត្រី ក្នុងការបង្ការជម្លោះ និងការកសាងសន្តិភាពផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបតំណាង

ជុំវិញស្ថានការណ៍តានតឹងនៅតាមព្រំដែនកម្ពុជា-ថៃ ដែលបានបន្តតាំងពីខែកក្កដា ឆ្នាំ២០២៥ APF បានសម្តែងការព្រួយបារម្ភ ចំពោះការបាត់បង់ជីវិតមនុស្ស ការផ្លាស់ទីលំនៅរបស់ប្រជាពលរដ្ឋស៊ីវិល ការរំលោភលើបទឈប់បាញ់ និងការប៉ះពាល់ដល់បូរណភាពទឹកដីរបស់កម្ពុជា ព្រមទាំងការខូចខាតដល់ទីតាំងវប្បធម៌ និងសាសនាមួយចំនួន ដែលត្រូវបានចុះបញ្ជីជាបេតិកភណ្ឌពិភពលោករបស់អង្គការយូណេស្កូ។ សេចក្តីសម្រេចក៏បានកត់សម្គាល់ការសាងសង់ហេដ្ឋារចនាសម្ព័ន្ធស៊ីវិល និងយោធា ការរៀបចំពិធីសាសនា និងគំនិតផ្តួចផ្តើមបែងចែកដីធ្លីនៅ ក្នុងតំបន់ទាំងនោះផងដែរ។

ជាមួយគ្នានេះ APF បានអំពាវនាវឱ្យគោរពយ៉ាងម៉ឺងម៉ាត់នូវអធិបតេយ្យភាពរបស់កម្ពុជា ជៀសវាងរាល់សកម្មភាពឯកតោភាគី ដែលអាចធ្វើឱ្យភាពតានតឹងកាន់តែធ្ងន់ធ្ងរ និងអនុវត្តឱ្យបានពេញលេញនូវសេចក្តីថ្លែងការណ៍រួម ដែលនាយករដ្ឋមន្ត្រីនៃកម្ពុជា និងថៃ បានចុះហត្ថលេខានៅទីក្រុងគូឡាឡាំពួរ កាលពីថ្ងៃទី២៦ ខែតុលា ឆ្នាំ២០២៥។ សេចក្តីសម្រេចក៏បានសម្តែងការសោកស្តាយចំពោះទុក្ខវេទនារបស់ប្រជាពលរដ្ឋស៊ីវិល និងបានរំលឹកថា ការបំផ្លិចបំផ្លាញបេតិកភណ្ឌវប្បធម៌ ដែលជាកេរដំណែលរួមរបស់មនុស្សជាតិ អាចប៉ះពាល់ដល់ការកសាងសន្តិភាព និងការផ្សះផ្សាប្រកបដោយចីរភាព។

លើសពីនេះ APF បានទាមទារឱ្យមានការបន្ធូរបន្ថយភាពតានតឹងជាបន្ទាន់ បន្តកិច្ចសន្ទនា និងដកកងកម្លាំងប្រដាប់អាវុធចេញពីតំបន់ជម្លោះ ដោយបញ្ជាក់ការគាំទ្រចំពោះយន្តការទ្វេភាគីដែលមានស្រាប់ ជាពិសេសគណៈកម្មការចម្រុះព្រំដែន (JBC) និងជំរុញឱ្យដោះស្រាយវិវាទ ដោយសន្តិវិធី ស្របតាមច្បាប់អន្តរជាតិ។

រូបតំណាង

APF ក៏បានគាំទ្រការធ្វើឱ្យទំនាក់ទំនងរវាងកម្ពុជា និងថៃវិលត្រឡប់ទៅរកភាពប្រក្រតីឡើងវិញ ដោយផ្អែកលើការគោរពអធិបតេយ្យភាព បូរណភាពទឹកដី ភាពមិនអាចរំលោភបាននៃព្រំដែន និងការខណ្ឌសីមាព្រំដែនស្របតាមលិខិតូបករណ៍គតិយុត្តអន្តរជាតិ។

ឆ្លើយតបនឹងការអនុម័តសេចក្តីសម្រេចនេះ លោក អ៊ុច បូររិទ្ធ បានថ្លែងអំណរគុណយ៉ាងជ្រាលជ្រៅ តាងនាមព្រឹទ្ធសភា រដ្ឋសភា និងប្រជាជនកម្ពុជា ចំពោះគណៈប្រតិភូទាំងអស់នៃ APF ដែលបានគាំទ្រសេចក្តីសម្រេចស្តីពីការគោរពបូរណភាពទឹកដីរបស់កម្ពុជា។ លោកបានបញ្ជាក់ថា ការអនុម័តនេះ គឺជាសក្ខីភាពនៃការរួបរួមរបស់សភាប្រើភាសាបារាំង ក្នុងការគោរពច្បាប់អន្តរជាតិ អធិបតេយ្យភាពរដ្ឋ និងការដោះស្រាយវិវាទដោយសន្តិវិធី ព្រមទាំងជាសារមួយផ្ញើទៅកាន់សហគមន៍អន្តរជាតិ អំពីសាមគ្គីភាព និងការប្តេជ្ញារួមក្នុងការលើកកម្ពស់សន្តិភាព និងនីតិរដ្ឋ។

នៅរសៀលថ្ងៃដដែល អង្គប្រជុំក៏បានអនុម័តជ្រើសតាំងលោក អ៊ុច បូររិទ្ធ ជាប្រតិភូប្រចាំតំបន់អាស៊ី-ប៉ាស៊ីហ្វិក របស់សភាប្រើភាសាបារាំង (APF) សម្រាប់អាណត្តិរយៈពេលពីរឆ្នាំ ចាប់ពីឆ្នាំ២០២៦ ដល់ឆ្នាំ២០២៨៕