ព័ត៌មានជាតិ

ទេសរដ្ឋមន្ត្រី គន់ គីម កោតសរសើរស្មារតីក្ដីសង្ឃឹមរបស់អ្នកភូមិរង់ចាំ

បានផុស

២៨ វិនាទី មុន

នៅ

ថ្ងៃសៅរ៍ ១១ កក្កដា ២០២៦

ដោយ

អនុប្រធានទី១ គណៈកម្មការធិការជាតិគ្រប់គ្រងគ្រោះមហន្តរាយ ទេសរដ្ឋមន្ត្រី គន់ គឹម បានបង្ហាញការកោតសរសើរចំពោះគំរូនៃការតស៊ូនិងច្នៃប្រឌិតរបស់ប្រជាពលរដ្ឋភៀសសឹករស់នៅភូមិរង់ចាំ បន្ទាប់ពីបានឃើញការរៀបចំគេហដ្ឋាន បង្កើតមុខរបរ ចិញ្ចឹមសត្វ និងដាំដុះនៅតាមផ្ទះដែលបានធ្វើចែកជូនពលរដ្ឋនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពេលដែលចុះពិនិត្យស្ថានភាពរបស់ពលរដ្ឋដែលរស់នៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ កាលពីថ្ងៃទី៩ ខែកក្កដា ឆ្នាំ២០២៦ កន្លងទៅ ទេសរដ្ឋមន្ត្រី គន់ គីម បានលើកឡើងថា សកម្មភាពរបស់ពលរដ្ឋទាំងនេះមិនត្រឹមតែជាការដោះស្រាយជីវភាពរស់នៅប្រចាំថ្ងៃប៉ុណ្ណោះទេ ប៉ុន្តែវាជាសក្ខីភាពបញ្ជាក់ពីភាពរឹងមាំនៃស្មារតីរបស់ប្រជាពលរដ្ឋដែលមិនរង់ចាំតែជំនួយ ប៉ុន្ដែចេះបង្កើតឱកាសដោយខ្លួនឯង។

លោកថា៖ «ខ្ញុំពិតជាមានមោទកភាពយ៉ាងខ្លាំង ដែលបានឃើញបងប្អូនប្រជាពលរដ្ឋរបស់យើងមិនបោះបង់ចោលក្តីសង្ឃឹម។ បងប្អូនបានរៀបចំលំនៅឋានប្រកបដោយសោភ័ណភាព បង្កើតមុខរបរលក់ដូរតាមខ្នងផ្ទះ ព្រមទាំងខិតខំដាំដុះដំណាំ និងចិញ្ចឹមសត្វ ដើម្បីបង្កើនជីវភាពគ្រួសារ»។

លោកក៏បានចុះពិនិត្យដំណើរការសាងសង់ផ្ទះបណ្ដោះអាសន្នបន្ថែម ដើម្បីធានាដល់ការរស់នៅរបស់ប្រជាពលរដ្ឋ និងហេដ្ឋារចនាសម្ព័ន្ធក្នុងភូមិរួមមានបណ្ដាញផ្លូវថ្នល់ ទឹកស្អាត មណ្ឌលសុខភាព សាលារៀន និងផ្សារបណ្ដោះអាសន្នផងដែរ។

របាយការណ៍ក្រសួងមហាផ្ទៃគិតត្រឹមព្រឹកថ្ងៃទី១១ ខែកក្កដានេះ មានពលរដ្ឋភៀសសឹកចំនួន ២០ ៨៤៩នាក់ ក្នុងនោះស្រ្តី ១០ ៦២៥នាក់ និងកុមារ ៦ ០៦៦នាក់នៅពុំទាន់អាចវិលត្រលប់ទៅលំនៅឋានវិញនៅឡើយទេ បន្ទាប់ពីភូមិករ និងផ្ទះសំបែងត្រូវបានយោធាថៃចូលកាន់កាប់ និងបំផ្លិចបំផ្លាញខុសច្បាប់ ក្រោយបទឈប់បាញ់ចូលជាធរមាន៕