ព័ត៌មានជាតិ
ទីផ្សារអចលនទ្រព្យកម្ពុជារំពឹងថា នឹងមានកំណើនខ្លាំងឡើងវិញនៅឆ្នាំ ២០២២ ខាងមុខ
ទីផ្សារអចលនទ្រព្យកម្ពុជាត្រូវបានអ្នកជំនាញមើលឃើញថានឹងមានកំណើនខ្លាំងក្លាឡើងវិញនៅឆ្នាំ២០២២ខាងមុខ បន្ទាប់ពីប្រជាពលរដ្ឋបានទទួលការចាក់វ៉ាក់សាំងគ្រប់គ្នាដើម្បីការពារជំងឺកូវីដ១៩។
នៅក្នុងសន្និសីទសារព័ត៌មានតាមកម្មវិធី zoom ស្ដីពី «បច្ចុប្បន្នភាពនៃទីផ្សារអចលនវត្ថុ ក្នុងកំឡុងពេលកូវីដ១៩» កាលពីថ្ងៃទី២០ ខែឧសភា ឆ្នាំ២០២១ លោក ច្រឹក សុខនីម ប្រធានសមាគមអ្នកវាយតម្លៃ និងអចលនវត្ថុកម្ពុជា មានប្រសាសន៍ថា៖ «ទីផ្សារអចលនវត្ថុនឹងងើបឡើងវិញនៅឆ្នាំ២០២២ ក្រោយពីប្រជាពលរដ្ឋទូទៅបានទទួលការចាក់វ៉ាក់សាំងគ្រប់គ្នាដើម្បីការពារជំងឺកូវីដ១៩។ បន្ទាប់ពីបានចាក់វ៉ាក់សាំងគ្រប់គ្នាហើយ អ្វីៗគ្រប់យ៉ាងនឹងវិលត្រឡប់មកស្ថានភាពមុនកូវីដ១៩ឡើងវិញ។»
លោក ច្រឹក សុខនីម បានបន្តថា បច្ចុប្បន្នបើទោះជាការទិញលក់អចលនវត្ថុមានការធ្លាក់ចុះមួយចំនួន ប៉ុន្តែតម្លៃមិនទាន់រងផលប៉ះពាល់ខ្លាំងនោះទេ។ តម្លៃដីឡូតិ៍ និងលំនៅដ្ឋានតម្លៃទាប និងមធ្យមមិនមានការប្រែប្រួលខ្លាំងនោះទេ ដោយសារទីផ្សារនេះផ្ដោតលើប្រជាជនក្នុងស្រុកដែលកំពុងមានតម្រូវការខ្ពស់។
ទន្ទឹមគ្នានេះ លោក លឹម សុជាតិ ប្រធានក្រុមប្រឹក្សាភិបាលសមាគមអចលនទ្រព្យកម្ពុជាបានលើកឡើងថា ក្នុងឆ្នាំ២០២០ខាងមុខ នៅពេលដែលស្ថានភាពកូវីដ១៩នៅក្នុងស្រុក និងក្រៅស្រុកមានភាពធូរស្បើយជាមួយនឹងកម្មវិធីចាក់់វ៉ាក់សាំង ប្រទេសចិននឹងងាកមកវិនិយោគលើវិស័យអចលនទ្រព្យកម្ពុជាឡើងវិញ។
លោក លឹម សុជាតិ បានបន្តថា ប្រទេសចិននៅតែបន្តវិនិយោគលើវិស័យអចលនទ្រព្យកម្ពុជា ពីព្រោះបើប្រៀបធៀបនឹងប្រទេសថៃ ម៉ាឡេស៊ី និងសឹង្ហបុរី តម្លៃដីនៅប្រទេសយើងនៅធូរថ្លៃជាងប្រទេសទាំងនោះនៅឡើយ។ ម្យ៉ាងទៀត កម្ពុជាមានច្បាប់អនុញ្ញាតឱ្យជនបរទេសអាចធ្វើជាម្ចាស់អគារសហកម្មសិទ្ធចាប់ពីជាន់ទីមួយទៅ និងអនុញ្ញាតឱ្យសហគ្រិនបរទេសចូលសញ្ជាតិខ្មែរបាន។
បើទោះជាស្ថិតក្នុងបរិបទនៃជំងឺកូវីដ១៩ក្ដី អ្នកវិនិយោគនៅតែមានភាពជឿជាក់លើទីផ្សារដីធ្លីប្រទេសកម្ពុជា។ យោងតាមរបាយការណ៍ស្រាវជ្រាវរបស់ក្រុមហ៊ុន ឃី រៀល អុីស្ទេត បានបង្ហាញថា ថ្វីត្បិតទីផ្សារខុនដូររងផលប៉ះពាល់ដោយសារការរឹតត្បិតការធ្វើដំណើរ តម្លៃដីធ្លីនៅក្នុងខណ្ឌដង្កោ ខណ្ឌកំបូល និងសែនសុខមានការកើនឡើង ១៧% ៨% និង៧% រៀងគ្នា ចំណែកតម្លៃដីធ្លីជាមធ្យមនៅក្នុងរាជធានីភ្នំពេញមានកំណើន១.៩ភាគរយក្នុងឆមាសទីពីរឆ្នាំ២០២០ ធៀបនឹងរយៈពេលដូចគ្នាកាលពីឆ្នាំ២០១៩។
លោក ស៊ន សៀប អគ្គនាយកក្រុមហ៊ុន ឃី រៀល អុីស្ទេត មានសុទិដ្ឋិនិយមថា នៅឆ្នាំ២០២២ខាងមុខ តម្លៃដីធ្លីនៅជាយក្រុងភ្នំពេញនឹងបន្តកើនឡើងថែមទៀត ចំណែកអចលនទ្រព្យផ្សេងៗទៀតដូចជាលំនៅដ្ឋានជាដើម នឹងមានសន្ទុះខ្លាំងក្លាឡើងវិញ ក្រោយពេលដែលវ៉ាក់សាំងកូវីដ១៩ត្រូវបានចាក់យ៉ាងទូលំទូលាយនៅក្នុងប្រទេសកម្ពុជា និងនៅលើពិភពលោក។ វិនិយោគិនចិន និងបរទេសផ្សេងទៀតនឹងអាចធ្វើដំណើរមកទិញអចលនទ្រព្យនៅកម្ពុជាដូចគ្រាមុនកូវីដ១៩។
អត្ថបទ៖ វ៉ាត វិន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ