រយៈពេល៤ខែ CMAC រកឃើញគ្រាប់មីន និងយុទ្ធភណ្ឌមិនទាន់ផ្ទុះជាង១ម៉ឺនគ្រាប់

នៅក្នុងរយៈពេល ៤ ខែដើមឆ្នាំ ២០២១ មជ្ឈមណ្ឌលកំចាត់មីនកម្ពុជា (CMAC) បានរកឃើញគ្រាប់មីន និងយុទ្ធភណ្ឌមិនទាន់ផ្ទុះចំនួន ១៥ ៣៤៨ គ្រាប់ ក្នុងទំហំផ្ទៃដីជាង ៣៥ លានម៉ែត្រក្រឡា។

លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា (CMAC) ថ្លែងថា សម្រាប់៤ខែ (មករា-មេសា ២០២១) ​ដើមឆ្នាំ២០២១នេះ អង្គភាពCMAC សម្រេចបានលទ្ធផលប្រកបដោយជោគជ័យ គួរឲ្យកត់សម្គាល់ ទោះបីជាស្ថិតក្នុងស្ថានភាពការរាតត្បាតនៃជម្ងឺកូវីដ-១៩ (ព្រឹត្តិការណ៍សហគមន៍ ២០ កុម្ភៈ ២០២១) ដែលគំរាមកំហែងដល់សុខភាពសាធារណៈ និងកិច្ចប្រតិបត្តិការរបស់អង្គភាព CMAC យ៉ាងណាក្តី។

លោក ហេង រតនា បញ្ជាក់ថា លទ្ធផលប្រតិបត្តិការក្នុងរយៈពេល៤ខែនេះ អង្គភាព CMAC ធ្វើការរំដោះផ្ទៃដី​ចម្ការមីន និងចម្ការគ្រាប់សរុបចំនួនជាង៣៥.៦៥២.០០០ម៉ែត្រក្រឡា ដែលស្មើនឹង៩៤,១៣ ភាគរយ នៃផែនការ៤ខែ ឬស្មើនឹង៣១,៣៨ភាគរយ នៃផែនការប្រចាំឆ្នាំ២០២១។ 

ក្នុងនោះរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន១៥.៣៤៨គ្រាប់។ ទន្ទឹមនឹងនេះ ក៏បានធ្វើការអប់រំយល់ដឹងពីគ្រោះថ្នាក់ដោយសារគ្រាប់មីន និងសំណល់ជាតិផ្ទុះពីសង្គ្រាម ដល់ក្រុមគោលដៅបានចំនួន៥.៨១៨លើក ស្មើនឹង១៩៨.៧៣៧ខ្នងផ្ទះ។

អគ្គនាយកមជ្ឈមណ្ឌលកំចាត់មីនកម្ពុជា (CMAC) លោក ហេង រតនា អះអាងថា ការគិតគូរជាយុទ្ធសាស្ត្ររបស់​ CMAC គឺត្រូវខិតខំរៀនរស់នៅតាមប្រក្រតីកម្មថ្មី ដោយត្រូវធ្វើការងារ និងប្រតិបតិ្តការជាមួយបរិស្ថានថ្មី នៃវីរុស​កូវីដ-១៩៕

កោះកែវ